Qurtuluşdan Zəfərə gedən yol

Bakı:

24 °C

63 %

12 m/s

Əlaqə

AZ RU EN

Ana səhifə / Arxiv / Qurtuluşdan Zəfərə gedən yol

Qurtuluşdan Zəfərə gedən yol

11.06.2026 [15:47]

Azərbaycan xalqının taleyində və müstəqillik tariximizdə dönüş nöqtəsi olan, dövlətimizin varlığını, bütövlüyünü və gələcəyini xilas edən 15 İyun – Milli Qurtuluş Günü hər birimiz üçün böyük fəxr mənbəyidir. Hər bir dövlətin tarixində onun gələcək müqəddəratını həll edən, xalqı böhranlardan çıxarıb tərəqqi yoluna yönəldən dahi şəxsiyyətlər və tarixi hadisələr olur. Azərbaycan xalqı üçün belə bir xilaskar missiyanı Ulu Öndər Heydər Əliyev və onun 1993-cü il iyunun 15-də gerçəkləşən tarixi qayıdışı yerinə yetirdi. Biz həmin dövrün hadisələrinə nəzər salanda Milli Qurtuluş Gününün nə dərəcədə böyük bir tarixi zərurətdən doğduğunu aydın görürük.

1990-cı illərin əvvəllərində müstəqilliyini yenicə bərpa etmiş gənc respublikamız daxili çəkişmələr, səriştəsiz idarəçilik, dərin iqtisadi tənəzzül və vətəndaş müharibəsi təhlükəsi ilə üz-üzə qalmışdı. Eyni zamanda, Ermənistanın torpaqlarımıza təcavüzü genişlənir, ölkədə yaranmış xaos isə dövlətçiliyimizin təməllərini sarsıdırdı. Müstəqilliyimizin itirilmək qorxusunun real olduğu belə bir ağır və taleyüklü məqamda xalqımız ayağa qalxdı və öz dahi oğlunu, zəngin dövlətçilik təcrübəsinə malik Heydər Əliyevi köməyə çağırdı. Xalqın təkidli tələbi ilə 1993-cü il iyunun 15-də Heydər Əliyevin Azərbaycan Respublikası Ali Sovetinin sədri seçilməsi ölkəmizdə yeni, parlaq bir dövrün əsasını qoydu. Ümummilli Lider fədakarlığı, cəsarəti və müdrik siyasəti ilə ilk növbədə ölkədəki daxili xaosu və anarxiyanı cilovladı. Qanunsuz silahlı qruplaşmalar ləğv edildi, cəmiyyətdə qanunun aliliyi təmin olundu və xalq öz dövlətinə, sabahına yenidən inanmağa başladı. Cəbhədə əldə edilən atəşkəs ölkəmizə daxili islahatlar aparmaq, ən əsası isə nizami, güclü və vahid komandanlığa tabe olan ordu quruculuğuna başlamaq üçün qızıl vaxt qazandırdı.Siyasi sabitliyin təmin olunması Azərbaycanın iqtisadi müstəqilliyinin də qapılarını açdı.

Heydər Əliyevin böyük uzaqgörənliyi sayəsində 1994-cü ildə imzalanan "Əsrin müqaviləsi" ölkəmizə nəhəng xarici investisiyaların axınını təmin etdi. Bu addım Azərbaycanı müflisləşmiş bir ölkədən dünyanın enerji təhlükəsizliyində rol oynayan strateji bir tərəfdaşa çevirdi. Qısa müddətdə ölkəmizin beynəlxalq nüfuzu artdı, Azərbaycan dünya birliyinin tamhüquqlu və söz sahibi olan bir üzvü kimi tanındı. Ümummilli Lider tərəfindən əsası qoyulan daxili və xarici siyasət müasir Azərbaycan dövlətinin sarsılmaz təməlinə çevrildi.Milli Qurtuluş fəlsəfəsinin ən böyük və möhtəşəm nəticəsini biz bu gün yaşayırıq.

Ulu Öndərin siyasi kursunun layiqli davamçısı, Müzəffər Ali Baş Komandan İlham Əliyevin rəhbərliyi ilə Azərbaycan öz tarixinin ən qüdrətli dövrünü yaşayır. 1993-cü ildə qorunub saxlanılan o müstəqillik toxumları, bu gün Qarabağda, Şuşada, Xankəndidə qürurla dalğalanan üçrəngli bayrağımızla özünün ən uca zirvəsinə çatmışdır. Vətən müharibəsində və antiterror əməliyyatlarında qazanılan tarixi Zəfər, torpaqlarımızın tam suverenliyinin bərpası məhz 15 İyun Qurtuluş ideyalarının, güclü dövlət və qüdrətli ordu strategiyasının məntiqi nəticəsidir. 15 iyun bizi parçalanmaqdan qoruyan, xalqımızı bir yumruq kimi birləşdirən və addım-addım böyük Zəfərə aparan yolun ilk və ən mühüm təməl daşıdır.Bu gün hər birimiz fəxrlə deyə bilərik ki, müstəqil Azərbaycan etibarlı əllərdədir.

Biz ulu öndər Heydər Əliyevin ideyalarına, onun siyasi kursuna sadiq qalaraq, Prezident İlham Əliyevin rəhbərliyi altında hələ çox böyük uğurlara imza atacağıq. 15 İyun Milli Qurtuluş Günü bizim keçmişimiz, bu günümüz və gələcəyimiz arasındakı qırılmaz mənəvi və siyasi körpüdür. Bu körpü bizi hər zaman zəfərlərə, inkişafa və milli həmrəyliyə aparacaqdır. Bu dövləti qorumaq, Heydər Əliyev ideyalarına sadiq qalaraq ölkəmizin inkişafına töhfə vermək hər birimizin vətəndaşlıq borcudur.

Dövlətimizin müstəqilliyi daimi, qurtuluşumuz əbədi və sarsılmaz olsun!

Əli Paşayev

YAP Tərtər Rayon Təşkilatının əməkdaşı

Paylaş:

Baxılıb: 251 dəfə