Fransa Hərbi Dəniz Qüvvələri Atlantik okeanında rus tankerini saxlayıb

Bakı:

33 °C

32 %

5 m/s

Əlaqə

AZ RU EN

Ana səhifə / Arxiv / Fransa Hərbi Dəniz Qüvvələri Atlantik okeanında rus tankerini saxlayıb

Fransa Hərbi Dəniz Qüvvələri Atlantik okeanında rus tankerini saxlayıb

01.06.2026 [23:17]

Fransa Hərbi Dəniz Qüvvələri Atlantik okeanında Rusiyadan gələn və beynəlxalq sanksiyalar siyahısında olan daha bir neft tankerini saxlayıb.

AZƏRTAC yerli mətbuata istinadla xəbər verir ki, “Tagor” adlı gəminin ələ keçirilməsi Fransa tərəfindən son on ay ərzində həyata keçirilən dördüncü belə əməliyyat olub. Fransa Prezidenti Emmanuel Makron iyunun 1-də verdiyi açıqlamada bildirib ki, “Tagor” tankeri bazar ertəsi səhər saatlarında Atlantik okeanında beynəlxalq hüquqa uyğun şəkildə saxlanılıb.z

“Fransa Hərbi Dəniz Qüvvələri Rusiyadan gələn və beynəlxalq sanksiyalar altında olan yeni bir tankeri – “Tagor”u ələ keçirib. Qətiyyətimiz dəyişməz və tamdır”, – deyə o, X platformasında yazıb.

Makronun sözlərinə görə, əməliyyat açıq dənizdə, Atlantik okeanında həyata keçirilib və bu zaman bir sıra tərəfdaş ölkələrin, eləcə də Böyük Britaniyanın dəstəyindən istifadə olunub. O qeyd edib ki, bütün tədbirlər dəniz hüququnun tələblərinə tam uyğun şəkildə icra olunub.

Makron əlavə edib ki, beynəlxalq sanksiyalardan yayınan, dəniz hüququnu pozan və Rusiyanın Ukraynaya qarşı dörd ildən artıqdır davam edən müharibəsini maliyyələşdirməyə xidmət edən gəmilərin fəaliyyəti qəbuledilməzdir. “Dəniz naviqasiyasının ən elementar qaydalarına əməl etməyən bu cür gəmilər həm ətraf mühit, həm də ümumi təhlükəsizlik üçün ciddi təhdid yaradır”, – deyə o, bildirib.

Fransa hökuməti aprelin 8-də “gizli donanma” kimi tanınan və sanksiyalardan yayınmaq üçün istifadə edilən gəmilərə qarşı mübarizəni gücləndirmək niyyətində olduğunu açıqlamışdı. Bu məqsədlə saxta bayraq istifadəsi və hüquq-mühafizə orqanlarının göstərişlərinə tabe olmama ilə bağlı cəzaların ikiqat artırılması nəzərdə tutulur.

Martın 20-də Fransa Hərbi Dəniz Qüvvələri Aralıq dənizinin qərb hissəsində Rusiyadan gələn “Deyna” adlı neft tankerini saxlamışdı. Gəmi saxta bayraq altında üzməkdə şübhəli bilinirdi. Daha sonra cərimə ödədikdən sonra onun yola davam etməsinə icazə verilmişdi.

Bundan əvvəl, yanvar ayında Murmansk limanından çıxan “Grinch” adlı başqa bir tanker də eyni səbəbdən saxlanılmışdı.

2025-ci ilin sentyabrında isə Bretan sahilləri yaxınlığında “Boracay” tankerinə əl qoyulmuşdu. Həmin vaxt Rusiya Prezidenti Vladimir Putin Fransa Hərbi Dəniz Qüvvələrinin əməliyyatını piratçılıq adlandıraraq sərt tənqid etmişdi.

Fransa Hərbi Dəniz Qüvvələrinin məlumatına görə, “Tagor” tankeri də əvvəlki hallarda olduğu kimi Murmansk limanından yola çıxıb. Gəminin göyərtəsinə çıxan müfəttişlər istifadə olunan bayraqla bağlı pozuntuları təsdiqləyiblər.

Tanker daha sonra nəzarət altında lövbərsalma nöqtəsinə qədər müşayiət olunub və yaxın saatlarda ətraflı texniki və hüquqi yoxlamadan keçiriləcək.

Hadisə ilə bağlı materialların Bretan bölgəsində yerləşən Brest şəhərinin prokurorluğuna təqdim edildiyi də bildirilib.

Paylaş:

Baxılıb: 525 dəfə