Kənd təsərrüfatının inkişafı Azərbaycanın iqtisadi gücünü artırır

Bakı:

26 °C

61 %

10 m/s

Əlaqə

AZ RU EN

Ana səhifə / Arxiv / Kənd təsərrüfatının inkişafı Azərbaycanın iqtisadi gücünü artırır

Kənd təsərrüfatının inkişafı Azərbaycanın iqtisadi gücünü artırır

01.06.2026 [09:48]

Azərbaycan Respublikasında kənd təsərrüfatının inkişafı dövlət siyasətinin əsas istiqamətlərindən biridir. Prezident İlham Əliyevin kənd təsərrüfatı məsələlərinə həsr olunmuş müşavirədə səsləndirdiyi fikirlər göstərir ki, aqrar sektorun inkişafı həm ölkənin ərzaq təhlükəsizliyinin təmin olunması, həm də qeyri-neft sektorunun gücləndirilməsi baxımından mühüm əhəmiyyət daşıyır. Son illər həyata keçirilən məqsədyönlü tədbirlər nəticəsində kənd təsərrüfatında mühüm uğurlar əldə edilmiş, məhsul istehsalı artmış, ixrac imkanları genişlənmişdir.

Dövlət başçısının qeyd etdiyi kimi, aqroparkların yaradılması kənd təsərrüfatının inkişafında çox böyük rol oynamışdır. Müasir texnologiyalar əsasında qurulan aqroparklar məhsuldarlığın yüksəlməsinə, torpaqlardan daha səmərəli istifadəyə və yeni iş yerlərinin açılmasına şərait yaratmışdır. Aqroparklarda tətbiq edilən innovativ yanaşmalar sayəsində həm əkinçilik, həm də heyvandarlıq sahəsində məhsul istehsalının həcmi və keyfiyyəti yüksəlmişdir. Bu isə daxili bazarın yerli məhsullarla təmin edilməsində mühüm rol oynayır.

Bu gün Azərbaycanda ərzaq təhlükəsizliyinin təmin olunması istiqamətində mühüm nailiyyətlər əldə olunmuşdur. Prezident İlham Əliyevin vurğuladığı kimi, digər dənli bitkilər üzrə vəziyyət prinsip etibarilə müsbətdir və ölkə özünü 95 faiz təmin edir. İdxalın cüzi həddə olması yerli istehsalın gücləndiyini göstərir. Bu göstərici kənd təsərrüfatı sahəsində həyata keçirilən dövlət dəstəyinin və subsidiyaların mühüm nəticəsi kimi qiymətləndirilə bilər.

Tərəvəz, bostan məhsulları, meyvə və giləmeyvə istehsalı sahəsində də müsbət dinamika müşahidə olunur. Azərbaycanın əlverişli iqlim şəraiti və münbit torpaqları bu sahələrin inkişafı üçün geniş imkanlar yaradır. Xüsusilə intensiv bağçılığın genişləndirilməsi məhsuldarlığın artırılmasına səbəb olmuşdur. Müasir suvarma sistemlərinin tətbiqi, yüksək məhsuldar tinglərdən istifadə və innovativ aqrotexniki üsulların tətbiqi nəticəsində bağçılıq məhsullarının keyfiyyəti və ixrac potensialı yüksəlmişdir.

İstixana komplekslərinin yaradılması da kənd təsərrüfatının inkişafına mühüm töhfə verir. Müasir istixanalarda ilboyu məhsul istehsal etmək mümkün olur ki, bu da həm daxili bazarın təminatına, həm də ixracın artırılmasına şərait yaradır. Azərbaycan pomidor və digər tərəvəz məhsullarının ixracında regionun aparıcı ölkələrindən birinə çevrilmişdir. Bu sahədə əldə olunan uğurlar ölkəyə əlavə valyuta axını təmin edir və kənd yerlərində məşğulluğun artmasına səbəb olur.

Heyvandarlıq sahəsində də mühüm nəticələr əldə edilmişdir. Prezident İlham Əliyevin qeyd etdiyi kimi, Azərbaycan özünü mal əti ilə 84 faiz təmin edir. Hazırda 150 min ton daxili istehsal mövcuddur və cəmi 30 min ton idxal həyata keçirilir. Bu göstəricilər yerli heyvandarlığın inkişaf etdiyini göstərir. Dövlət tərəfindən damazlıq heyvandarlığa göstərilən dəstək, yem bazasının möhkəmləndirilməsi və fermerlərə verilən subsidiyalar bu sahənin inkişafına müsbət təsir göstərir.

Torpaqlardan səmərəli istifadə məsələsi də kənd təsərrüfatının əsas prioritetlərindən biridir. Torpaq ehtiyatlarının qorunması, əkin dövriyyəsinin düzgün təşkili və müasir suvarma sistemlərinin tətbiqi məhsuldarlığın artırılmasına xidmət edir. Xüsusilə azad edilmiş ərazilərdə kənd təsərrüfatının inkişafı üçün böyük potensial mövcuddur. Həmin ərazilərdə müasir aqroparkların, emal müəssisələrinin və logistika mərkəzlərinin yaradılması nəzərdə tutulur.

Azərbaycan Respublikası Prezidentinin “Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026–2030-cu illər üçün Dövlət Proqramı”nın təsdiq edilməsi haqqında Sərəncamı aqrar sahənin gələcək inkişafı baxımından mühüm əhəmiyyət daşıyır. Dövlət Proqramı kənd təsərrüfatında innovasiyaların tətbiqini, məhsul istehsalının artırılmasını, emal sənayesinin inkişafını və ixrac potensialının genişləndirilməsini nəzərdə tutur. Eyni zamanda balıqçılıq və akvakultura sahələrinin inkişafı ölkənin ərzaq təminatının daha da möhkəmlənməsinə xidmət edəcəkdir.

Bütün bunlar göstərir ki, Prezident İlham Əliyevin rəhbərliyi ilə həyata keçirilən aqrar siyasət Azərbaycanın kənd təsərrüfatını yeni inkişaf mərhələsinə çıxarmışdır. Dövlət dəstəyi, müasir texnologiyaların tətbiqi və fermerlərin təşviqi nəticəsində aqrar sektor ölkə iqtisadiyyatının aparıcı sahələrindən birinə çevrilməkdədir. Qarşıdakı illərdə həyata keçiriləcək layihələr kənd təsərrüfatının daha da inkişaf etməsinə, ərzaq təhlükəsizliyinin möhkəmlənməsinə və Azərbaycanın ixrac imkanlarının genişlənməsinə mühüm töhfə verəcəkdir.

Anar Alışov

Yeni Azərbaycan Partiyası Yardımlı rayon təşkilatının sədri

Paylaş:

Baxılıb: 455 dəfə