Milli müqavimətin başlanğıc nöqtəsi

Bakı:

19°C

59%

10m/s

Əlaqə

AZ RU EN

Ana səhifə / Arxiv / Milli müqavimətin başlanğıc nöqtəsi

Milli müqavimətin başlanğıc nöqtəsi

26.09.2025 [21:19]

Toğrul Zeynalov,

YAP Ağdam rayon təşkilatının əməkdaşı

27 Sentyabr – Anım Günü, Azərbaycan xalqı üçün yalnız qəhrəman Şəhidlərimizi yad etmək günü deyil, eyni zamanda ədalətsizliyə, təcavüzə və illərlə davam edən erməni təxribatlarına qarşı milli müqavimətin başlanğıc nöqtəsini xatırladan bir gündür. Uzun illər boyunca Ermənistan tərəfindən həyata keçirilən təxribatlar, işğalçı siyasət və destruktiv davranışlar regionda sülh və sabitliyin qarşısında əsas maneəyə çevrilmişdir. Ermənistan təkcə 1990-cı illərdə Azərbaycanın Dağlıq Qarabağ və ətraf yeddi rayonunu işğal etməklə kifayətlənməmiş, illər boyunca atəşkəsi sistemli şəkildə pozaraq Azərbaycan ordusuna və sərhəd yaşayış məntəqələrinə qarşı silahlı hücumlar həyata keçirmişdir. Xüsusilə, 2020-ci ilin iyul ayında Tovuz istiqamətində törədilən təxribatlar və sentyabr ayında cəbhə xətti boyunca genişmiqyaslı hərbi fəallıq, Ermənistanın münaqişəni dinc yolla həll etmək niyyətində olmadığını bir daha ortaya qoymuşdur. Bu təxribatlar nəticəsində həm hərbi qulluqçular, həm də mülki şəxslər həlak olmuş, Azərbaycan tərəfinin səbr kasası daşmışdır. Ermənistan rəhbərliyinin məsuliyyətsiz bəyanatları, xüsusilə "Qarabağ Ermənistandır və nöqtə" kimi çıxışlar danışıqlar prosesini tamamilə mənasızlaşdırmış, münaqişənin hərbi yolla həllinə zəmin yaratmışdır. Azərbaycanın ərazi bütövlüyünü bərpa etməsinə səbəb olan 44 günlük Vətən müharibəsinin təməlində məhz bu təxribatlar, beynəlxalq hüququn və danışıqların açıq şəkildə tapdanması dayanır. Azərbaycan, dəfələrlə Ermənistanı danışıqlara və sülhə çağırsa da, bu çağırışlar cavabsız qalmış, əvəzində cavab atəşi, raket zərbələri və təxribatlar olmuşdur.

Prezident İlham Əliyev dəfələrlə çıxışlarında bu məqamları xüsusi vurğulayaraq bildirib ki, müharibəni başlayan tərəf Ermənistan olub və Azərbaycan sadəcə olaraq öz ərazi bütövlüyünü bərpa etmək, vətəndaşlarını qorumaq məqsədilə cavab tədbirləri görüb. Dövlət başçısı BMT, ATƏT və digər beynəlxalq təşkilatların mövqeyinə əsaslanaraq Azərbaycanın beynəlxalq hüquq çərçivəsində hərəkət etdiyini dəfələrlə qeyd etmiş, Ermənistanın təxribatçı siyasətinin konkret nümunələrlə ifşasını aparmışdır. Prezident İlham Əliyev Vətən müharibəsi dövründə və sonrasında verdiyi bəyanatlarda Ermənistanın danışıqları imitasiya etdiyini, "Qarabağ Ermənistandır" kimi iddialarla prosesə son qoyduğunu və nəticə etibarilə müharibəni qaçılmaz etdiyini açıq şəkildə ifadə etmişdir. Eyni zamanda o, bu müharibənin Azərbaycanın qanuni və legitim haqqı olduğunu vurğulamış, əks-hücum əməliyyatlarının məqsədinin yalnız işğala son qoymaq və regionda ədaləti bərpa etmək olduğunu bildirmişdir.

27 Sentyabr 2020-ci ildə baş vermiş genişmiqyaslı erməni hücumu isə artıq bıçağın sümüyə dirəndiyi an olmuş, Azərbaycan xalqı öz torpaqlarının müdafiəsi və ədalətin bərpası naminə bir yumruq kimi birləşərək haqq mübarizəsinə başlamışdır.Müzəffər ordumuz Ermənistan ordusuna Azərbaycanın nəyə qadir olduğunu ilk dəqiqələrdən göstərmiş ve düşmənin ordusu, zirehli texnikaları məhv edilərək mütləq qələbə qazanmışdır.Təbiiki hər bir döyüşdə,hər bir zəfərdə olduğu kimi bizimdə qələbəmiz itkilərsiz olmayıb. Qəhrəman Şəhidlərimizin qanı bahasına, igid Qazilərimizin canı bahasına, mərd,cəsur döyüşçülərimizin hünəri bahasına biz bu döyüşdə mütləq qələbə çaldıq. Allah bu günləri bizə yaşadan Şəhidlərimizə rəhmət etsin, Qazi və Veteranlarımıza sağlam can versin.

Paylaş:

Baxılıb: 164 dəfə