Statistikaya çevrilən insan taleləri

Bakı:

26 °C

62 %

7 m/s

Əlaqə

AZ RU EN

Ana səhifə / Analitik / Statistikaya çevrilən insan taleləri

Statistikaya çevrilən insan taleləri

03.12.2021 [23:03]

Şöhrət El-Dəniz

Keçən ilin bu ayı idi.

Müharibədən sonra baş redaktorları yeni yaradılan “YAŞAT” Fonduna dəvət etdilər.

“ASAN xidmət”in rəhbəri Ülvi Mehdiyev bizimlə söhbətdə fondun məqsədini izah edərək onlara dəstək olmağımızı xahiş etdi. Və “YAŞAT” Fondunun yeni təyin olunan qazi rəhbəri Elvin Hüseynovu bizə təqdim etdi. Bir il bundan əvvəl həmin görüş barədə yazı hazırlamışdım. Və yazmışdım ki, kimisə “YAŞAT”maq üçün gərək o şəxsdə ürək, qeyrət, mərdlik və millətinə sahiblənmək gücü olsun: “Lozunqlarla, vədlərlə qazini, şəhid ailəsini “YAŞAT”maq olmur. Lozunqlar, vədlər dələduzların silahıdır. O silah ki, bu gün hamını kəsə-kəsə gedir. Şəhid ailəsinin haqqını kəsir, qazinin imtiyazını kəsir, veteranın ümidini kəsir. Kəsilən hissələrdən isə özünə mal-mülk yığır, imarət tikdirir, bahalı maşınlarda gəzir. Ona görə ah-nalədən var-dövlət qazananların nə Allahı olur, nə də imanı”.

Bir il bundan əvvəl yazdığım bu fikirlərin üstündə yenə də dururam.

“YAŞAT”maq üçün söz yox, konkret əməl lazımdır. Və mənim qənaətimə görə “YAŞAT” Fondu və rəhbərliyi son bir il ərzində bizə, yəni mediaya, qazilərə, şəhid ailələrinə və cəmiyyətə verdiyi sözü tutdu. Əminəm ki, gələcəkdə də tutacaq. Çünki bu fond ona görə “ASAN xidmət”in nəzarətində yaradıldı ki, sıravi vətəndaşların işini “ASAN” etməyin yolunu bilən, Vətən uğrunda canını, sağlamlığını qurban verənlərin işini də “ASAN” edəcək.

Bu bir il ərzində çətinliklər də, yersiz narazılıq və qınamalar da oldu.

Hələ yarananda demişdim, bu iş heç də “ASAN” olmayacaq.

İşi enişə-yoxuşa sürənlər olacaq.

Amma...

Dəstək də olacaq.

Bəli, biz sağlam mətbuat nümayəndələri dəstək olduq. İl ərzində gördükləri işləri nöqtə və vergülünə qədər işıqlandırdıq. Yazdıq, sağlam tənqid də oldu, tərif də.

Amma bir yerdə bacardıq.

Yaşamaq istəyənləri “YAŞAT”dıq.

Fonddan mənə göndərilən birillik hesabatı oxuyuram. İlk təəssürat yalnız rəqəmlərlə ifadə edilən fəaliyyət gözə çarpır. Kimləri nə vaxt, harada, nə qədər xərclə müalicə ediblər. Kimlərə yardım ediblər, kimlərə nə veriblər və sair.

Rəqəmlər, adlar, təşkilatlar, qurumlar

Qeyd edə bilərdim o rəqəmləri də, təşkilatların adlarını da.

Amma məqsəd o deyil ki, bu qədər rəqəmlər var.

Məqsəd odur ki, indi statistikaya çevrilən minlərlə şəhid ailəsinə, qazi taleyinə biganə qalınmadı. Onları “YAŞAT”maq üçün ağır işdən yorulmayan, giley-güzardan bezməyən, kaprizlərə dözən insanlar oldu.

Və indi də var.

Bir il nədir ki?

“YAŞAT”mağın ilk addımıdır.

Sağlam və dürüst yaşayın ki, yaşamaq istəyənləri də yaşada biləsiniz.

Paylaş:

Baxılıb: 1335 dəfə