ABŞ Argentinada hərbi baza quracaq

Bakı:

24 °C

76 %

13 m/s

Əlaqə

AZ RU EN

Ana səhifə / Analitik / ABŞ Argentinada hərbi baza quracaq

ABŞ Argentinada hərbi baza quracaq

25.09.2025 [09:16]

ABŞ Argentinada hərbi baza qura bilər. Belə ki, Argentina hökuməti maliyyə yardımı müqabilində ölkənin cənubundakı bazada ABŞ hərbçilərinin yerləşməsinə icazə verməyə hazırdır. Argentinanın “TN” telekanalının məlumatına görə, Argentina hakimiyyəti ölkənin cənubunda yerləşən Uşuaya şəhərində inşa edilən bazanın Amerika hərbçiləri tərəfindən istifadəsini müzakirə edir. Bu səbəbdən ölkə prezidenti Xavyer Mileylə birlikdə Nyu-Yorka gedən Argentina nümayəndə heyətinə müdafiə naziri Luis Petri də daxil edilib. Telekanal bildirib ki, Amerika tərəfi Pekinin Cənubi Amerika ölkəsindəki təsirini azaltmaq üçün Buenos-Ayresdən Çinlə valyuta mübadiləsindən imtina etməsini istəyir. Qeyd edək ki, çərşənbə axşamı günü Miley Nyu-Yorkda BMT Baş Assambleyasının 80-ci sessiyası çərçivəsində amerikalı həmkarı Donald Trampla görüşüb.

Beunos Airesin ABŞ-ın strateji və maliyyə dəstəyinə ehtiyacı yaranıb

Məsələ ilə bağlı politoloq Tural İsmayılov “Yeni Azərbaycan” qəzetinə şərhində qeyd edib ki, Argentina hökumətinin ABŞ-a öz ərazisində hərbi baza qurmaq təklifi sıradan bir addım deyil. Onun sözlərinə görə, bu, ilk növbədə Buenos Airesin maliyyə böhranından çıxış üçün Vaşinqtonun dəstəyinə ehtiyacının artması ilə bağlıdır. “ABŞ hərbi bazası demək, birbaşa təhlükəsizlik zəmanəti və siyasi himayə deməkdir. Argentina iqtisadiyyatı uzun müddətdir ki, dollar asılılığında çətinlik çəkir və beynəlxalq kreditlərə çıxış üçün ABŞ dəstəyini vacib görür. Belə bir baza qarşılığında ABŞ-dan ciddi maliyyə yardım paketlərinin gündəmə gəlməsi mümkündür. Buraya Beynəlxalq Valyuta Fondu (BVF) və Dünya Bankı vasitəsilə kreditlər də daxildir. Hərbi dəstək baxımından isə ABŞ Argentinaya texniki avadanlıq, modern silah sistemləri və kəşfiyyat imkanları təqdim edə bilər,” - deyə T.İsmayılov vurğulayıb ki, Argentinanın ABŞ-ın strateji dəstəyinə ehtiyacı var; “Bununla yanaşı, ABŞ Latın Amerikasında strateji mövqeyini gücləndirmək üçün yeni dayaq nöqtəsi qazanmış olacaq. Argentina bu addımla həm də regionda Braziliya və Meksika kimi aparıcı oyunçular qarşısında öz çəkisini artırmaq istəyir”.

ABŞ-ın Latın Amerikası strategiyasında Çin amili

Ekspert hesab edir ki, ABŞ-ın Latın Amerikası strategiyasında əsas motivi Çindir. “Son illərdə Çin Latın Amerikasında iqtisadi sərmayələr, infrastruktur layihələri və kredit siyasəti ilə nüfuzunu artırıb. Xüsusilə enerji və mədən sektorunda Çin kapitalı böyük paya sahibdir. ABŞ isə bunu öz təsir dairəsinə birbaşa təhlükə hesab edir. Argentina ilə hərbi baza razılaşması Çinin bölgədə iqtisadi ekspansiyasına qarşı siyasi balans yaratmaq məqsədi daşıyır. Vaşinqton Pekinin hegemon mövqeyinin yaranmasına imkan vermək istəmir. Bu, Latın Amerikada yeni soyuq müharibə elementlərinin formalaşmasına səbəb ola bilər,” - deyə T.İsmayılov vurğulayıb. Ekspert əlavə edib ki, Argentina ABŞ ilə münasibətləri möhkəmləndirməkdə bir sıra məqsədlər güdür. “Argentina üçün isə ABŞ-a yaxınlaşmaq həm maliyyə nəfəsi, həm də siyasi təhlükəsizlik qarantiyası deməkdir. Beləliklə, bu təşəbbüs həm ikitərəfli maraqlara, həm də qlobal güclər arasında geosiyasi rəqabətə xidmət edir. Nəticədə Argentina-ABŞ hərbi əməkdaşlığı bölgədə yeni güc balansı yarada bilər”.

Yunis ABDULLAYEV

Paylaş:

Baxılıb: 598 dəfə