Sığorta daxilolmalarında 15,4 faiz artım

Bakı:

20 °C

82 %

15 m/s

Əlaqə

AZ RU EN

Ana səhifə / Xəbər lenti / Sığorta daxilolmalarında 15,4 faiz artım

Sığorta daxilolmalarında 15,4 faiz artım

23.02.2024 [10:31]

Səbəb isə yeni iş yerlərinin yaradılmasıdır

Günel ABBAS

2024-cü ilin yanvar ayı ərzində məcburi dövlət sosial sığorta haqları üzrə daxilolmalarda proqnoza nisbətdə 52,9 mln. manat və ya 15,4 faiz artım qeydə alınıb. Dövlət Sosial Müdafiə Fondunun məlumatına görə, büdcə təşkilatları üzrə daxilolma ötən ilin müvafiq dövrü ilə müqayisədə 10,6 mln. manat və ya 10,9 faiz qeyri-büdcə təşkilatları üzrə isə 48,1 mln. manat və ya 19,9 faiz artımla olub.

Qeyd edək ki, məcburi dövlət sosial sığorta haqqı sığortalamaya görə sığortaçıya verilən pul vəsaitidir. Məcburi dövlət sosial sığortasında sığorta haqqı əmək ödənişinə (gəlirə) nisbətdə faizlə müəyyən edilir, sığortaedənin və sığortaolunanın vəsaiti hesabına ödənilir. “Sosial sığorta haqqında” Azərbaycan Respublikasının Qanununun 14.4-cü maddəsinin müddəaları nəzərə alınmaqla, muzdlu işdən əldə edilən gəlirlər üzrə məcburi dövlət sosial sığorta haqqı müəyyən dərəcələrlə ödənilir. Məsələn, sığortaedən tərəfindən ödənilən sığorta haqqı - hesablanmış əməyin ödənişi fondunun və məcburi dövlət sosial sığortasına cəlb olunan digər gəlirlərin 22 faizi və yaxud sığortaolunan tərəfindən ödənilən sığorta haqqı - işçinin əməkhaqqının və məcburi dövlət sosial sığortasına cəlb olunan digər gəlirlərinin 3 faizi ilə ödənilmə həyata keçirilə bilər.

Milli Məclisin iqtisadi siyasət, sənaye və sahibkarlıq komitəsinin üzvü Vüqar Bayramov “Yeni Azərbaycan”a açıqlamasında bildirib ki, 2024-cü ilin yanvar ayında dövlət sosial sığorta haqları üzrə daxilolmalarının proqnoza nisbətən 15,4 faiz artması yaradılan yeni iş yerlərinin sayının çoxalması ilə bağlıdır: “Belə ki, yanvar ayında yaradılan iş yerlərinin sayında ciddi artım var. Bu da təbii ki, sosial haqların məbləğinə təsir göstərir. Demək olar ki, hər il əvvəlki illə müqayisədə yeni yaradılan iş yerlərinin sayı, eləcə də bütövlükdə, məşğulluğun rəsmiləşməsi qeydə alınmaqdadır. Bütövlükdə, 2023-cü ildə əmək müqaviləsi ilə çalışan vətəndaşlarımızın sayı 1741000 nəfər olub. Onlardan 899000 dövlət sektorunda 842000 nəfəri isə özəl sektorda fəaliyyət göstərib. Bu da ondan xəbər verir ki, yaradılan yeni iş yerlərinin sayında artımlar müşahidə edilməkdədir”.

Yəni bir tərəfdən, xüsusən özəl sektorda yaradılan iş yerlərin sayının çox olması, digər tərəfdən, məşğulluğun rəsmiləşdirilməsi sosial haqların məbləğinə təsir göstərir. Millət vəkili vurğulayıb ki, çox vacib faktorlardan biri də bu sahədə şəffaflığın gücləndirilməsidir. “Çünki şəffaflığın gücləndirilməsi də yığımlara təsir göstərir və daha çox yığımlarda özünü ehtiva edir. Bu baxımdan biz praktiki olaraq bu istiqamətdə daha çox şəffaflığın və bütövlükdə, məşğulluğun leqallaşmasını müşahidə edirik. Eyni zamanda, 2024-cü il üçün də gözlənti ondan ibarətdir ki, yeni yaradılmış iş yerlərinin sayında artımlar olacaq. Bu da nəticə sosial haqlar üzrə artımların növbəti dövrlərdə də proqnoza nisbətən daha çox olacağından xəbər verir”, - deyə deputat fikirlərini yekunlaşdırıb.

Paylaş:

Baxılıb: 588 dəfə