EPF Koalisiyası Ermənistanı dağ-mədən sektoru ilə bağlı materialları ictimailəşdirməyə çağırıb

Bakı:

15 °C

82 %

6 m/s

AZ RU EN

Ana səhifə / Xəbər lenti / EPF Koalisiyası Ermənistanı dağ-mədən sektoru ilə bağlı materialları ictimailəşdirməyə çağırıb

EPF Koalisiyası Ermənistanı dağ-mədən sektoru ilə bağlı materialları ictimailəşdirməyə çağırıb

18.01.2024 [16:12]

Cənubi Qafqazda ətraf mühitin mühafizəsi istiqamətində fəaliyyət göstərən “Environmental Protection First” (EPF) Koalisiyası Ermənistanın dağ-mədən sənayesində çalışan yerli və xarici şirkətləri Ətraf Mühitə Təsirlərin Qiymətləndirilməsi (ƏMTQ) sənədlərini, yaxud qiymətləndirmənin nəticələrini ictimaiyyətə açıqlamağa çağırıb.

AZƏRTAC Koalisiyanın bununla bağlı bəyanatını təqdim edir: “Cənubi Qafqaz regionunda ətraf mühitin mühafizəsi istiqamətində fəaliyyət göstərən “Environmental Protection First” (EPF) Koalisiyası bir müddət əvvəl Ermənistanın dağ-mədən sənayesində çalışan yerli və xarici şirkətləri Ətraf Mühitə Təsirlərin Qiymətləndirilməsi (ƏMTQ) sənədlərini tez bir zamanda öz rəsmi internet saytlarında yerləşdirməyə, yaxud qiymətləndirmənin nəticələrini ictimaiyyətə açıqlamağa çağırıb. Təəssüf ki, bu sənədlər hələ də ictimaiyyətə təqdim olunmayıb. Bu, Ermənistanın dağ-mədən sənayesindəki fəaliyyətinin şəffaflığı ilə bağlı suallar doğurur.

Biz Ermənistanda dağ-mədən sənayesində fəaliyyət göstərən şirkətləri Koalisiyamızla əlaqə qurmaqda açıq olmağa çağırırıq. EPF Koalisiyası regionumuzda daha geniş ekoloji çirklənmə ilə bağlı rəhbərliklə görüş istəmək üçün həmin şirkətlərin korporativ qərargahlarına müraciət etməyi planlaşdırır. “Environmental Protection First” (EPF) hesabatlılığın təmin edilməsinin zəruriliyini vurğulayır.

Biz BMT-nin Dayanıqlı İnkişaf Məqsədlərini rəhbər tutaraq, bir neçə ay əvvəl Ermənistanın baş nazirinə müraciətimizdə bu ölkənin dağ-mədən sənayesinin yaratdığı ciddi ekoloji vəziyyətlə bağlı dərin narahatlığımızı bildirmiş, hasilatın dərhal dayandırılmasını tələb etmişik.

BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasının - COP29-un Cənubi Qafqazda, Azərbaycanda keçiriləcəyini nəzərə alaraq, Ermənistan ətraf mühitin mühafizəsi məsələsində daha diqqətli olmalıdır.

Biz Ermənistanın vətəndaş cəmiyyəti təşkilatlarını və ətraf mühit üzrə fəallarını Cənubi Qafqazda təmiz ətraf mühitin təmin olunması naminə səylərimizi birləşdirməyə çağırırıq. Axı bu ekoloji fəlakətdən, ilk növbədə, Ermənistan əhalisi zərər görür. Gəlin unutmayaq ki, təbiət heç bir sərhəd tanımır və hamımız bir regionda yaşayırıq.

Ermənistan dağ-mədən sənayesində fəaliyyət göstərən həm yerli, həm də xarici şirkətlərin ƏMTQ sənədlərinin tam məzmununu ictimaiyyətə açıqlamalarını və ekoloji ədalət naminə məsuliyyətlə davranmalarını təmin etməlidir”.

Paylaş:

Baxılıb: 522 dəfə