Əli Kərimlinin erməni sevdası...

Bakı:

25 °C

83 %

2 m/s

Əlaqə

AZ RU EN

Ana səhifə / Xəbər lenti / Əli Kərimlinin erməni sevdası...

Əli Kərimlinin erməni sevdası...

28.12.2023 [10:30]

AXCP sədri Azərbaycan xalqına düşmən münasibəti bəsləyir

Ermənipərəst mərkəzlərin əlaltısına çevrilmiş redikül müxalifət Azərbaycanın milli maraqlarına qarşı düşmən münasibət bəsləməkdədir. Zaman-zaman atdığı addımları ilə hansı məqsədlərə xidmət göstərdiyini bəlli edən ünsürlər xüsusilə ərazi bütövlüyümüzün və suverenliyimizin bərpa olunmasını həzm edə bilmirlər - min bir yalan, təxribatçı, ermənipərəst fikirlər ilə özlərini ifşa edirlər.

Antimilli dairələrin, erməni lobbisinin ölkəmizə qarşı apardığı şər-böhtan kampaniyasının, yalan təbliğatın bir hissəsinə çevrilməklə milli mənafeni heçə saydıqlarını dəfələrlə sübuta yetirənlər arasında AXCP sədri Əli Kərimli xüsusilə “seçilir”. Onun erməni təəssübkeşliyindən qaynaqlanan bəzi fikirləri bir faktı tam şəkildə ortaya qoyur - Kərimli heç də siyasi rəqabət və ya siyasi mübarizə “axtarışında deyil”. Bu şəxs Azərbaycan dövlətinə, dövlətçiliyinə və xalqına qarşı düşmən mövqedədir...

İşğala “qələbə” deyən xain zehniyyət

Özünü “hüquqşünas” sayan, adını isə “siyasətçi” qoyan bu qısır təfəkkürlü şəxs vaxtilə Koçaryan-Sarkisyan cütlüyünün Azərbaycan torpaqlarını işğal etməsini bizim Vətən müharibəsində qazandığımızdan daha böyük Qələbə hesab edir. Özünü azərbaycanlı sayan bir şəxsin bu qədər ucuzlaşması demək olar ki, rast gəlinməmiş, nadir bir prosesdir.

Ə.Kərimli deyəsən Koçaryan-Sarkisyan cütlüyünün Azərbaycan torpaqlarını işğal etməsi üçün şəraitin məhz özünün də təmsil olunduğu hakimiyyət tərəfindən yaradıldığını “unudub”. İkinci bir tərəfdən, işğal faktını “qələbə” adlandıran bu mənəvi cəhətdən bitkin “siyasətçi” artıq xalqa qarşı düşmənçiliyini açıq kontekstdə irəli sürür - erməni işğalı zamanı qətlə yetirilən, vəhşicəsinə işgəncələrə məruz qalan insanlarımızdan belə utanmaması onun erməni güdükçülüyündə uğradığı deqredasiyanı ortaya qoyur. Erməni işğalına qələbə demək bu xalqdan, bu millətdən olmamağın ən bariz göstəricisidir.

İşğalçını “demokrat” adlandıran...

Əslində, onun bu kimi erməni sevdasından qaynaqlanan və yanmış təfəkkürə “əsaslanan” fikirləri az deyil - məsələn, vaxtilə işğal altında olan Şuşada “yallı gedən”, spirtli içkinin təsiri altında Azərbaycana meydan oxuyan, yeni torpaqlar üçün yeni işğallar ideyasını irəli sürən Paşinyanı “demokrat” adlandıran Əli Kərimli özünün bütün kartlarını açıq oynayır. Bu şəxs erməni sevgisini gizlətmir və işağalçını “demokrat” adlandırmaqla əsl simasını ortaya qoyur. Bu hansı standartın nümunəsidir - axı, işğalçı necə demokrat ola bilər? Əli Kərimlinin timsalında maddi gəlir üçün nəinki işğalçıya demokrat demək, hətta ona “pərəstiş” belə etmək mübahdır...

Açıq erməni təəssübkeşliyi

Ə.Kərimlinin erməni sevgisinin ən bariz sübutlarından biri də onun Azərbaycanın Müdafiə Nazirliyini “ölən erməni əsgərlərinin sayını artırmaqda” ittiham etməsi olmuşdu. Bu qədər aşınmanı özünə rəva görən AXCP sədri iddia edirdi ki, guya Müdafiə Nazirllyi erməni əsgərlərinin sayını çox göstərməklə özünün qələbəsini “şişirdir”. Maraqlıdır ki, Ermənistanın müvafiq strukturları da Azərbaycanın səsləndirdiyi rəqəmləri açıqlayırdı - ermənidən betər ermənilik etmək arzusundan daşınmayan Kərimli isə yenə də öz ampluasına “xəyanət etmirdi”.

Bəli, Ə.Kərimli bu kimi mövqe, qələbəmizə və bütövlüyümüzə münasibəti ilə bir daha hansı “simaya” malik olduğunu təqdim edir. Əslində onun xain mövqeyi Azərbaycan cəmiyyətinə yaxşı tanışdır - ermənilərlə belə əməkdaşlığa gedən, Xocalı faciəsini törədənləri “qalib” adlandıran birisi haqda geniş “təqdimata” ehtiyac duyulmur...

SADİQ

Paylaş:

Baxılıb: 541 dəfə