Danışır və göstərir Qarabağ!

Error:

Əlaqə

AZ RU EN

Ana səhifə / Xəbər lenti / Danışır və göstərir Qarabağ!

Danışır və göstərir Qarabağ!

05.10.2023 [11:43]

Qarabağda yayım üçün bir TV və bir radioya lisenziya verilib

Günel ABBAS

Oktyabrın 3-də Audiovizual Şuranın növbədənkənar iclasında Azərbaycan Respublikasının Qarabağ iqtisadi rayonunun ərazisində keçirdiyi uğurlu və sürətli lokal antiterror tədbirləri, bu tədbirlərdən sonra bölgədə yaranan vəziyyət, həmin bölgədə yaşayan əhalinin informasiya təminatının yaradılması və bölgənin ümumölkə informasiya məkanına reinteqrasiyasının təmin olunması, habelə lisenziyaların alınması üçün “Baku TV” MMC-nin və “Azərbaycan Televiziya və Radio Verilişləri” QSC-nin Azərbaycan Respublikası Audiovizual Şurasına müraciətləri müzakirə olunub.

Qarabağ iqtisadi rayonunun ərazisində yaşayan əhalinin obyektiv və operativ informasiya ilə təminatının yaradılmasının təxirəsalınmazlığını nəzərə alaraq Azərbaycan Respublikası Audiovizual Şurası “Baku TV” MMC-yə peyk yayımı həyata keçirən platforma yayımçısı (televiziya redaksiyasının adı “Baku TV”), “Azərbaycan Televiziya və Radio Verilişləri” QSC-yə ümumölkə yerüstü radio yayımıçısı (radio redaksiyanın adı “Azərbaycan Beynəlxalq Radiosu”) lisenziyalarının verilməsi haqqında müvafiq qərarlar qəbul edib.

Yevlax görüşünün daha bir nəticəsi

Milli Məclisin üzvü Tahir Rzayev “Yeni Azərbaycan”a açıqlamasında bildirib ki, Qarabağda yayım üçün bir TV və bir radioya lisenziya verilməsi günün reallığıdır və bu, bilavasitə informasiya şəbəkəsinin genişləndirilməsi, məlumatların yerli əhaliyə vaxtında çatdırılması, dünya hadisələrindən onların xəbərdar edilməsidir: “Biz çox şadıq ki, bu gün artıq Qarabağ torpaqları düşməndən azaddır. Keçirilən antiterror tədbirləri nəticəsində artıq Xankəndi şəhəri, Xocalı, eləcə də digər ərazilərimiz düşməndən tamamilə təmizləndi. Bundan sonra həmin ərazilərdə həyat canlanacaq. Tikinti-abadlıq və quruculuq genişlənəcək, eləcə də informasiya təminatının ödənilməsi üçün ciddi tədbirlər həyata keçiriləcək. Bu, Qarabağda yaşayan erməni əsilli əhali üçün çox vacibdir. Çünki onlar bu günə kimi anti-Azərbaycan təbliğatı altında millətçilik ruhunda tərbiyə olunublar və bu cür mübarizə aparıblar.

Azərbaycan həqiqətləri onlara səthi, dar mənada yanlış izah olunub və ölkədə gedən quruculuq işlərindən ermənilər o qədər də məlumatlı deyil. Ancaq Azərbaycan Prezidenti İlham Əliyev dəfələrlə çıxışlarında deyib ki, Azərbaycan vətəndaşlığını qəbul edən ermənilər bizim üçün bir vətəndaşdırlar və onlar üçün ölkədə hər cür imkan, şərait yaradılacaq. Eləcə də keçən görüşdə, icmaların görüşündə belə bir təklif irəli sürülmüşdü ki, həmin ərazidə televiziya və radio şəbəkəsi, verilişləri tətbiq edilsin. Həmin görüş artıq tez bir zamanda nəticələrini verir. Bu da sevindirici haldır və verilən vədə bir zəmanətdir, bir əməli tədbirdir. Sözsüz ki, bu, ilkin tədbirdir və elə bilirəm, az bir müddətdə Xankəndidə, Xocalıda, eləcə də digər ərazilərdə bütün televiziya yayımları təmin olunacaq. Orada yaşayanlar bütün hadisələrdən vaxtında və düzgün xəbər alacaqlar”.

Qarabağda yeni radio və tv yayımına ehtiyac var

Professor, media eksperti Qulu Məhərrəmlinin sözlərinə görə, Şuşada tezlikləri çox yeri əhatə edən bir radio fəaliyyət göstərir: “Amma hesab edirəm ki, o azdır. Ona görə ki, həm məzmun baxımından, həm verilişlərin rəngarəngliyi baxımından, həm də bölgədə yaranan yeni mədəni, mənəvi, psixoloji mühiti ifadə eləyə biləcək yeni radio yayımına və televiziya yayımına ehtiyac var. Lisenziya üçün müraciət edənlərin arasında hesab edirəm ki, region üçün gərəkli verilişlər hazırlaya bilən, insanları vahid mədəni mühitdə dialoq aparmağa sövq edə biləcək verilişlər hazırlayan kanallar, televiziya verilişləri lazımdır.

Mənə elə gəlir ki, Azərbaycan teleradioçuları arasında kifayət qədər yüksək imkanlı yayımçılar var. Lisenziyanı onlardan biri ala bilər. Bütövlükdə hesab edirəm ki, orada televiziya və radio kanalının açılmasına ehtiyac var. İnternetin bütün gücünə baxmayaraq, televiziyanın, radionun əhatə dairəsi insanların psixologiyasına, düşüncəsinə, davranışına təsiri klassik baxımdan daha böyük potensiala malikdir. Ona görə də belə bir yayım aparmağa böyük ehtiyac var. Bu işi nə qədər tez və sürətlə həll edə bilsək, bir o qədər yaxşı olar”.

Paylaş:

Baxılıb: 525 dəfə