Cinayətkarların aqibəti...

Bakı:

23 °C

53 %

6 m/s

Əlaqə

AZ RU EN

Ana səhifə / Xəbər lenti / Cinayətkarların aqibəti...

Cinayətkarların aqibəti...

30.09.2023 [11:33]

Ruben Vardanyan törətdiyi qanunsuz əməllərinin cəzasını çəkir

N.TUNAR

Azərbaycan bütün müstəvilərdə ədalətin bərpası uğrunda mübarizə aparır və buna nail olur. Qarabağın separatçı rejiminin qondarma “dövlət naziri” olmuş Ruben Vardanyanın saxlanılması və istintaqa cəlb edilməsi də ədalətin bərpasının növbəti təntənəsidir. Azərbaycan xalqına qarşı cinayət törədənlər məhkəmə qarşısında cavab verir. Əslində, tarixi və ilahi ədalət hər zaman öz yerini tapır - hər kəs törətdiyi cinayətin məsuliyyətini daşımağa məhkumdur. Vardanyanın da məsuliyyətə cəlb olunması bunu təsdiqləyir.

Xatırladaq ki, ötən ilin sentyabrında Rusiyadan Ermənistana, oradan da Azərbaycanın Qarabağ ərazisinə qanunsuz daxil olan Ruben Vardanyan həmin ilin noyabrında qanunsuz rejimin “dövlət naziri” təyin olunmuşdu. O, öz istəyi ilə Rusiya vətəndaşlığından imtina edərək “Artsaxda qalacağını və müstəqillik uğrunda mübarizə aparacağını” demişdi. Vardanyan bu ilin əvvəlində isə həmin “vəzifəsindən” azad edilsə də, Qarabağı tərk etməyərək Azərbaycan dövləti əleyhinə fəaliyyətini, qanunsuz erməni hərbi birləşmələrinin maliyyələşdirilməsini davam etdirmişdi.

Bu il sentyabrın 19-20-də ordumuz tərəfindən keçirilən lokal antiterror tədbirləri nəticəsində separatçı rejim təslim oldu. R.Vardanyan isə aradan çıxıb Ermənistana keçmək istəyərkən sentyabrın 27-də “Laçın” dövlət sərhədindən buraxılış məntəqəsində Dövlət Sərhəd Xidmətinin (DSX) hərbi qulluqçularının sayıqlığı nəticəsində saxlanıldı. R.Vardanyan Xidmətin Çevik Hərəkət Qüvvələri əməkdaşlarının müşayiəti ilə Bakı şəhərinə gətirilib. DTX-nin Mətbuat xidmətinin yaydığı məlumata görə, Azərbaycan Respublikasının Rusiya sülhməramlı kontingentinin müvəqqəti yerləşdiyi ərazilərində fəaliyyət göstərmiş qanunsuz erməni silahlı birləşmələri tərəfindən ötən müddət ərzində törədilmiş çoxsaylı terrorçuluq cinayətlərinin araşdırılması ilə bağlı Dövlət Təhlükəsizliyi Xidmətində (DTX) ibtidai istintaq aparılır.

Məlumatda bildirilib ki, toplanmış sübutlarla, hazırda Ermənistan Respublikasının vətəndaşı olan Vardanyan Azərbaycan Respublikası Cinayət Məcəlləsinin 214-1-ci və 318.1-ci maddələri ilə nəzərdə tutulan cinayət əməllərini törətməsinə əsaslı şübhələr müəyyən edilib. Ona qarşı irəli sürülən ittihama əsasən, müəyyənləşdirilib ki, Ruben Vardanyan xarici ölkə vətəndaşı olduğu halda terror-təxribat əməlləri törətmək məqsədilə 2022-ci ilin sentyabrında Azərbaycan Respublikasının dövlət sərhədini nəzarət-buraxılış məntəqələrindən kənar, qanunsuz keçərək, Azərbaycan Respublikasının Qarabağ iqtisadi rayonunda Rusiya sülhməramlılarının müvəqqəti yerləşdiyi əraziyə daxil olub, həmin ərazidə Azərbaycan Respublikasının qanunvericiliyi ilə nəzərdə tutulmayan silahlı birləşmələrin formalaşdırılması və fəaliyyətinin təşkilində, habelə idarələrə, təşkilatlara və ayrı-ayrı şəxslərə insanların həlak olmasına və digər ağır nəticələrə səbəb olan basqınlar etmiş sözügedən qanunsuz hərbi birliklərin silah, döyüş sursatı, partlayıcı maddələr, hərbi texnika və əsgəri ləvazimatla təchiz olunmasında iştirak edib. Bundan başqa o, pul vəsaitlərini həmin qanunsuz silahlı birləşmələrin terrorçuluq fəaliyyətinin təşkil olunmasına yönəltməklə terrorçuluğu maliyyələşdirib. Törətdiyi qeyri-qanuni əməllərə görə Ruben Vardanyan 2023-cü il sentyabrın 27-də saxlanılaraq, ittiham elan edilməklə təqsirləndirilən şəxs qismində cinayət məsuliyyətinə cəlb olunub, barəsində məhkəmənin qərarı ilə həbs qətimkan tədbiri seçilib.

Səbail rayon Məhkəməsində isə Ruben Vardanyan barəsində Dövlət Təhlükəsizliyi Xidmətinin İstintaq İdarəsinin təqdimatına baxılıb və onun barəsində 4 aylıq həbs qətimkan tədbiri seçilib.

Ermənistan hakimiyyəti isə cinayətkar Vardanyanı müdafiə etməyə çalışır. Əslində, rəsmi İrəvan belə cinayətkarları müdafiə etmək və onların əməllərini ört-basdır etmək əvəzinə, onların cinayət məsuliyyətinə cəlb edilməsi işinə dəstək verməlidir. Bunun əksinə, Ermənistan Azərbaycanın bu istiqamətdə həyata keçirdiyi işlər barədə qarayaxma kampaniyası aparması, bu ölkənin müharibə cinayətlərini dəstəkləməsindən və bəraət qazandırmasından başqa bir şey deyil.

Azərbaycan tərəfi ölkəmizin ərazisində hərbi və digər cinayətlər törətmiş şəxslərə qarşı müvafiq cinayət işinin başladığını son 30 ildə dəfələrlə açıq şəkildə bəyan edib, onlar barədə beynəlxalq axtarışlar elan edilib. İstintaq tədbirləri çərçivəsində, ölkə qanunvericiliyinə və beynəlxalq təcrübəyə uyğun olaraq onların məsuliyyətə cəlb olunması istiqamətində tədbirlər davam etdiriləcək.

Paylaş:

Baxılıb: 428 dəfə