Siyasi fitnəkarlıq...

Bakı:

20 °C

52 %

1 m/s

Əlaqə

AZ RU EN

Ana səhifə / Xəbər lenti / Siyasi fitnəkarlıq...

Siyasi fitnəkarlıq...

26.09.2023 [11:46]

Makron növbəti dəfə ermənipərəst mesajlar ötürür

Günel ABBASOVA

Fransa dövləti artıq uzun illərdir Azərbaycana qarşı mövqe sərgiləyir və qeyri-adekvat hal alan bu kimi davranışlar günü-gündən daha da güclənir. Ölkənin prezidenti Emmanuel Makron başda olmaqla Fransa parlamentinin əksər deputatları, siyasi dairələri, şəhərlərin rəhbərləri açıq-aşkar dövlətimizə qarşı düşmənçilik siyasəti yürüdür və bunu "demokratiya", "humanizm" pərdəsi ilə ört-basdır etməyə çalışırlar. Təcavüzkar, 30 il Azərbaycan torpaqlarını işğal altında saxlayan, bir milyondan çox insanın bəlalarına səbəb olan, şəhər və kəndlərimizi məhv edən erməniləri, Ermənistanın siyasi hakimiyyətini "yazıq" və "hüquqları pozulan" kimi dünyaya təqdim etmək, onların tərəfində durmaq Fransanın dövlət siyasətinə, ən ali məqsədinə çevrilib.

Bu gün ermənilərin taleyindən bu ölkələrin rəhbərlərindən daha çox Makron və onun yandaşları narahatdır. Ötən günlərdə də Fransa Prezidenti TF-1 telekanalının efirində Ermənistanı dəstəkləyən ifadələrlə çıxış edib. Makron həmçinin Rusiyanın Azərbaycanla həmrəy olması və Türkiyənin hər zaman Azərbaycanın yanında olması ilə bağlı iddialar səsləndirərək, Fransanın da Ermənistan xalqını dəstəkləyəcəyini bildirib. “Biz Ermənistana siyasi və humanitar dəstəyi davam etdirəcəyik”. - deyə Makron ermənilərə mesaj ünvanlayıb.

Milli Məclisin üzvü Tahir Rzayev “Yeni Azərbaycan”a açıqlamasında bildirib ki, Fransa və Almaniya bu gün özünü "demokratik" donda qələmə verməyə çalışsalar da, bu ölkələrin tarixi onların bəşəriyyətə qarşı törətdiyi faciələrlə doludur və uzun illər müstəmləkəçilik siyasəti yürütdüklərini göstərir: “Həmin dövlətlər bu gün də öz çirkin məqsədlərini həyata keçirirlər. Bu Azərbəaycana qarşı münasibətdə də özünü aydın göstərir. Çünki bu gün hər iki dövlət dünyada iğtişaşalar yaratmaq, ölkələri əsarət altına almaq, onlara təsir göstərmək yolunu tutublar. Əlbəttə ki, müasir dövrdə bu qəbul edilən deyil. Bu gün xalqlar da, dövlətlər də öz yolunu seçməyi bacarırlar. Azərbaycan da tarixən azadlığı, müstəqilliyi uğrunda mübarizə aparıb. Azərbaycan Respublikasının Prezidenti İlham Əliyev öz siyasəti ilə dünyaya göstərdi ki, ordunu möhkəmləndirmək, xalqı birləşdirmək və qələbəyə nail olmaq mümkündür. 44 günlük müharibə bütün dünyaya xalqımızın mübarizəsini göstərdi. Ancaq bu qalibiyyəti nə Fransa, nə Almaniya qəbul etmək iqtidarında deyil. Halbuki özlərini klassik demokratiyanın müdafiəçisi kimi qələmə verən bu dövlətlər daha çox Azərbaycanın öz torpaqlarını azad etməsini beynəlxalq normalar kimi qiymətləndirməlidirlər. Ancaq onlar tam əksinə separatizmə, silahlı qarşıdurmaya dəstək verirlər. Bu, siyasi fitnəkarlıqdır. Bu, beynəlxalq normalara sayğısızlıqdır. Hansı ki, özlərini demokratik dövlət adlandıran Fransa və Almaniya bunu edir”.

Paylaş:

Baxılıb: 481 dəfə