İrəvanda vəziyyət gərgindir

Bakı:

22 °C

55 %

3 m/s

Əlaqə

AZ RU EN

Ana səhifə / Xəbər lenti / İrəvanda vəziyyət gərgindir

İrəvanda vəziyyət gərgindir

23.09.2023 [14:29]

Erməni polisi etirazçılara qarşı güc tətbiq edir

NARDAR

Azərbaycanın Qarabağ ərazisində antiterror tədbirləri keçirməsi Ermənistanda daxili ictimai-siyasi vəzyyəti xeyli gərginləşdirib. Ermənistan müxalifəti baş verənlərə görə hakimiyyəti günahlandırıb və sentyabrın 19-dan Nikol Paşinyanın istefası tələbi ilə etiraz aksiyası keçirir. İrəvanın “Respublika” meydanında keçirilən mitinqdə bir sıra müxalifət partiyalarının tərəfdarları iştirak edirlər. “Nikol satqındır!” şüarı səsləndirən etirazçılar mübarizəni sona qədər aparacaqlarını iddia ediblər.

Ötən gün Ermənistan müxalifəti baş nazir Nikol Paşinyanın istefasına nail olmaq üçün “Milli Komitə” yaradıldığını bəyan edib. Keçmiş baş nazir Vazgen Manukyan “Milli Komitə”yə kimlərin başçılıq edəvcəyini açıqlayıb. “Biz - Hayk Mamicanyan, Avetik Çalabyan, Andranik Tevanyan, İşxan Saqatelyan və məndən ibarət 5 nəfər “Milli Komitə” yaratdıq. Biz məsələni mümkün qədər qanuni şəkildə həll etməliyik. Biz mümkün qədər tez itaətsizlik aksiyalarına başlamalıyıq”, - deyə keçmiş baş nazir bildirib. O, komitənin tərkibinin genişləndirilməsinin vacibliyini də vurğulayıb: “Həqiqətən, mənim vəzifə tutmaq üçün heç bir ambisiyam yoxdur. Hesab edirəm ki, ümumiyyətlə, keçmiş prezidentlərin də heç biri Ermənistan Respublikasının rəhbəri olmamalıdır”.

Keçmiş baş nazir daha sonra əlavə edib: “Mən xalqımızı geniş itaətsizlik aksiyalarına, tətillərə, dərsləri boykot etməyə, küçələri bağlamağa çağırıram. Amma polislə davaya girməyə ehtiyac yoxdur. Bu toqquşma bizə heç nə vermir, sadəcə olaraq xalqın gücü qarşısında müqavimət göstərə bilməməlidirlər. Bu, bizim məqsədimizdir”.

Manukyan deyib ki, hazırda ölkə rəhbərliyi xarici agentlərin əlindədir: “Hakimiyyət dəyişikliyindən sonra nə baş verəcəyini xalqa izah etmək lazımdır. Bunun üçün müxtəlif partiyaların nümayəndələri öndə olmalıdır. İndi insanların çoxu Nikol Paşinyanın hakimiyyətdə olmasının əleyhinədir, xüsusən də “Artsax”la bağlı son insidentdən sonra. Biz xalqı birləşdirərək irəli getməliyik”.

Ötən gün müxalifət hökumət binasını mühasirəyə almağa və Nazirlər Kabinetinin iclasının keçirilməsinə mane olmağa çalışsa da, buna nail olmayıb. Belə ki, baş nazir Paşinyan hökumətin iclasını keçirməyi bacarıb. Üstəlik, Paşinyan istefa verməyəcəyini, çevrilişə cəhd edənlərin qanun çərçivəsində cəzalandırılacağını bəyan edib. Bu barədə "Hraparak" qəzeti məlumat verib. Qəzetin yazdığına görə, Paşinyan nəyin bahasına olursa-olsun hakimiyyəti saxlayacağını deyib. Baş nazirin bu açıqlamasından sonra meydandakı təhlükəsizlik qüvvələri etirazçılara qarşı daha sərt tədbirlərə keçiblər.

Bunun nəticəsi olaraq müxalifət liderlərindən biri - “Ana Ermənistan” blokunun rəhbəri Andranik Tevanyan ötən gün səhər saatlarında vətəndaş itaətsizliyi aksiyası zamanı saxlanılıb. O, səhər saatlarında bir qrup müxalifətçi ilə birlikdə İrəvanın küçələrini bağlamağa cəhd edib. Lakin polislər onu həbs ediblər.

Ümumilikdə, İrəvanda Ermənistan polisi tərəfindən etirazçılara qarşı sərt davranış göstərilir. Saxlanılanlar arasında ölkənin ikinci prezidenti Robert Koçaryanın oğlu Levon Koçaryan da var. Polislər etirazçılara qarşı güc tətbiq edib, onları asfalt boyunca sürüyüblər. Bununla bağlı görüntülərdə bir neçə polisin Koçaryanın oğlunu polis maşınına sürükləməyə çalışdığı əks olunub. Həmçinin, hüquq-mühafizə orqanları əməkdaşlarının etirazçıları təpiklədiyi, sərt davranışlar sərgilədiyinin görüntüləri də yayılıb. Bütövlükdə, aksiya başlanılandan 350-dən çox etirazçı həbs edilib.

Yeri gəlmişkən, Ermənistan İstintaq Komitəsinin yaydığı məlumatda aksiya iştirakçılarının daha çox Qarabağ sakinləri olduğu bildirilir: “Əsasən, “Artsax”ın müxtəlif qəsəbələrinin keçmiş sakinləri olan mitinq iştirakçıları mütəşəkkil şəkildə Ermənistan hökumətinin binasının girişində toplaşıblar. Onlar polisin qanuni tələbinə tabe olmaq istəmirlər, ictimai təhlükəsizliyə təhdid yaradan kütləvi iğtişaşlar təşkil ediblər”. İstintaq Komitəsi onu da bildirib ki, saxlanılan şəxslərlə yanaşı, digər təşkilatçılar axtarılır və tapılaqları təqdirdə həbs olunacaqlar.

Paylaş:

Baxılıb: 518 dəfə