Müharibə istəmirik...

Ana səhifə / Xəbər lenti / Müharibə istəmirik...

Müharibə istəmirik...

19.09.2023 [10:13]

DTX rəisindən Ermənistana çağırış!

Y.BAYRAMOVA

Dünən “İtkin düşmüş şəxslərin taleyini müəyyənləşdirmək üçün milli və qlobal səylərin artırılması” mövzusunda beynəlxalq konfrans keçirilib. Tədbirdə xarici ölkələrin sabiq dövlət və hökumət başçıları, beynəlxalq təşkilatlar və beynəlxalq siyasi ekspertlər iştirak edib. Qonaqlar öncə mövzu ilə əlaqədar hazırlanan videoçarxa baxıblar. Daha sonra Prezident İlham Əliyevin konfrans iştirakçılarına müraciəti oxunub.

Əsir və itkin düşmüş, girov götürülmüş vətəndaşlarla əlaqədar Dövlət Komissiyasının sədri, Dövlət Təhlükəsizliyi Xidmətinin (DTX) rəisi Əli Nağıyev konfrans iştirakçılarını salamlayaraq tədbirin əhəmiyyətinə toxunub, mövzunun Azərbaycan üçün vacibliyinə diqqət çəkib. O, dövlət başçısının əsir-girov götürülmüş, itkin düşmüş şəxslərlə bağlı məsələyə daima xüsusi həssaslıqla yanaşdığını qeyd edib.

10 nəfərin taleyi müəyyənləşdi

DTX rəisi bildirib ki, 9 nəfəri hərbçi, 1 nəfəri mülki şəxs olmaqla daha 10 vətəndaşımızın meyit qalıqlarının eyniləşdirilməsinə nail olunub. Onun sözlərinə görə, həmin şəxslərin sırasında Azərbaycanın Milli Qəhrəmanı Riad Əhmədov da var: “O, uzun müddət peşəkar zabit kimi təhlükəsizlik orqanlarında çalışıb. 1989-cu ildə erməni silahlı birləşmələri Azərbaycana qarşı elan olunmamış müharibəyə başladığı vaxtdan etibarən R.Əhmədov bütün bacarığını Milli Ordunun yaradılmasına sərf edib. Azərbaycan Respublikası Müdafiə Nazirliyi Kəşfiyyat İdarəsinin rəis müavini vəzifəsinə təyin olunub. R.Əhmədov 1992-ci il yanvarın 26-da rəhbərlik etdiyi kəşfiyyat qrupu ilə Daşaltı kəndindəki döyüşdə yaralanaraq itkin düşüb”.

13 nəfərin şəxsiyyəti...

Ə.Nağıyev qeyd edib ki, ölkə başçısının tapşırığı və ayrılmış vəsait hesabına DTX-nin Hərbi-ibb Baş darəsinin tərkibində genetik laboratoriya yaradılıb. Onun sözlərinə görə, labartoriyanın ən müasir avadanlıqlarla təmin edilməsi Prezidentin bu sahəyə böyük önəm verdiyini bir daha təsdiqləyir: “Artıq şəxsiyyəti müəyyən edilmiş 25 nəfərdən

13-ü DTX-nin Hərbi-Tibb Baş idarəsinin tərkibində yaradılmış genetik laboratoriyada eyniləşdirilib. Hərbi təcavüz nəticəsində ölkəmiz xeyli sayda insan itkisinə, yüzlərlə şəhər və kəndlərimizin tamamilə dağıdılması ilə müşayiət olunan dəhşətli məhrumiyyətlərə məruz qalıb”.

Ə.Nağıyev vurğulayıb ki, Birinci Qarabağ müharibəsində 3890 nəfər itkin düşmüş şəxs kimi Dövlət Komissiyasında qeydiyyata alınıb: “Onlardan 3171 nəfəri hərbçi, 719 nəfəri mülki şəxsdir. Mülki şəxslərdən 71 nəfəri yetkinlik yaşına çatmamış uşaq, 267 nəfəri qadın, 326 nəfəri yaşlı insanlardır. Vətən müharibəsində isə 6 nəfər hərbi qulluqçu itkin düşüb. Əldə olunmuş sübutlar göstərir ki, itkin düşmüş hərbiçilərimizin xeyli hissəsi döyüş meydanlarında deyil, əsir düşərgələrində dəhşətli işgəncələr nəticəsində qətlə yetiriliblər”.

İrəvana çağırış!

DTX rəisi dəqiq mina xəritələri, həmçinin itkin düşmüş şəxslərin sonrakı taleyi, onlara aid məzar yerləri barədə məlumatların Ermənistan tərəfindən Azərbaycana təqdim ediləcəyinə ümid etdiyini deyib. Ə.Nağıyev qeyd edib ki, hər iki tərəfə aid itkin düşmüş şəxslərin meyit qalıqlarının tapılaraq eyniləşdirilmə aparılması uzun müddət mövcud olan humanitar böhranın aradan qaldırılmasına xidmət edərdi: “Bu istiqamətdə hərtərəfli əməkdaşlığa hazırıq. Lakin ötən dövrdə bu sahədə Ermənistanın konstruktiv mövqe tutacağına ümid etsək də, gözləntilərimiz özünü tam doğrultmayıb. Bu konfransın yaratdığı imkanlardan istifadə edərək rəsmi İrəvanı əsir və girov götürülmüş vətəndaşlarla bağlı məsələlərdə daha sıx əməkdaşlığa dəvət edirəm”.

Birlikdə yaşamağa dəvət edirik...

DTX rəisinin sözlərinə görə, hazırda bəzi erməni ideoloqları tarixə istinad edərək ermənilərlə azərbaycanlıların birgə yaşamasının qeyri-mümkünlüyü məsələsini qaldırırlar: “Onda sual yaranır: Necə olur ki, hərbi münaqişə başlayanadək erməni əhali uzun müddət Bakı şəhərində və Azərbaycanın digər yerlərində, o cümlədən Qarabağda hörmətli vətəndaşlar kimi komfort şəraitdə yaşayıb, cəmiyyətdə kifayət qədər nüfuz sahibi olub? Monoetnik Ermənistandan fərqli olaraq, Azərbaycanda bu gün yaşayan rus, gürcü, yəhudi və digər xalqlar çoxmillətli və çoxkonfessiyalı dövlətin əsasını təşkil edirlər. Azərbaycanın erməni əhalisini də bizimlə birlikdə yaşamağa dəvət edirik. Azərbaycan dövləti və azərbaycanlılar müharibə istəmirlər. Bizi bu gün hərbi təcavüz nəticəsində dağıdılmış yaşayış məntəqələrimizin daha tez bərpası və öz vətənində köçkün olmuş 750 min əhalimizin qısa vaxt ərzində öz evlərinə qaytarılması düşündürür”.

Paylaş:

Baxılıb: 70 dəfə