Beşinci köç...

Bakı:

28 °C

53 %

7 m/s

Əlaqə

AZ RU EN

Ana səhifə / Xəbər lenti / Beşinci köç...

Beşinci köç...

12.09.2023 [10:35]

Füzulidə məskunlaşanların sayı 441 oldu!

Y.BAYRAMOVA

Doğma torpaqlarımız düşmənin pəncələrindən artıq üç ilə yaxındır ki, azad olunub. Vətəndaşlarımız yavaş-yavaş 30 il əvvəl gözü yaşlı çıxdıqları dədə-baba torpaqlarına bu gün sevinc hissi ilə qayıdır. Qarabağda, sözün əsl mənasında həyat yenidən canlanıb. Görülən işlər, aparılan islahatlar bu gün özünü büruzə verir. Doğma torpaqlarımızın yenidən canlanması uzunmüddətli, lakin şərəfli bir yoldur. Ölkə başçımız üçün Qarabağdakı əhalinin hüquqlarını qorumaq və ərazi bütövlüyünü təmin etmək hər zaman prioritet olub. Qarabağ bölgəsində həyata keçirilən bərpa-quruculuq işləri regionda sabitliyin və inkişafın qorunmasına mühüm zəmin yaradır. Yeni sağlamlıq mərkəzləri, təhsil ocaqları, sosial təminat müəssisələri inşa edilir.

Dünən Füzuliyə növbəti köç karvanı Bakı şəhərinin Qaradağ rayonundakı “Qobu park 3” yaşayış kompleksindən yola salınıb. Bu mərhələdə Füzuli şəhərinə daha 24 ailə - 92 nəfər köçürülüb. Bununla da Füzuli şəhərində 119 ailənin, yəni 441 nəfərin daimi məskunlaşması təmin edilib.

Prezident İlham Əliyevin rəhbərliyi ilə Ordumuzun qazandığı Zəfər nəticəsində məcburi köçkünlərin 30 ildən sonra könüllü, təhlükəsiz və ləyaqətlə doğma yurdlarına qayıtmasına imkan yaranıb. Daha da gözəlləşən və abadlaşan Füzuli şəhərinin sakinləri hərtərəfli dövlət qayğısı ilə əhatə olunduqlarına görə Prezident İlham Əliyevə və Birinci vitse-prezident Mehriban xanım Əliyevaya minnətdarlıqlarını bildiriblər. Füzulilər bu yolda canlarından keçən şəhidlərimizi böyük ehtiramla yad ediblər.

Sevincimizin həddi-hüdudu yoxdur...

Füzuliyə qayıdan keçmiş məcburi köçkün Elnarə Həsənova təəssüratlarını bölüşüb: “Çox xoşbəxtik, sevincimizin həddi-hüdudu yoxdur. Çünki doğulduğumuz el-obamıza qayıdırıq. Bu gün Füzuli sakinlərinin otuzillik arzularının reallaşdığı gündür. Düzdür, yurd həsrəti ilə dünyadan köçən yaxınlarımız da oldu, amma bu gün onların ruhu şaddır.

Torpaqlarımızın erməni işğalından azad edilməsi uğrunda çoxlu şəhidlər vermişik, sağlamlıqlarını itirənlər olub, onların haqqı ödənməz. Şəhidlərimizin, qazilərimizin sayəsində torpaqlarımızda azad və firavan yaşayacağıq”.

E.Həsənova həm məcburi köçkünlük dövründə, həm də hazırkı vaxtda onlara yaradılan şəraitə görə Prezident İlham Əliyeva və birinci xanım Mehriban Əliyevaya minnətdarlığını bildirib.

Çətin günlər geridə qaldı

Digər sakin Fəridə Əliyeva bildirib ki, bu gün 30 illik ayrılıqdan sonra öz yurdlarına qayıdan füzulililərin ən xoş günüdür: “Çünki bu gün yurd həsrəti sona çatır. Ermənilərin təcavüzü nəticəsində 37 yaşımda üç uşaqla Füzulidən köçməyə məcbur qalmışdıq. Çox çətin və məşəqqətli günlər idi. Sevinirik ki, həmin çətin günlər geridə qaldı, hazırkı vəziyyəti sözlə ifadə etmək çətindir”.

O, bildirib ki, Azərbaycan Ordusunun tarixi Qələbəsi hər zaman yaddaşlarda qalacaq, gələcək nəsillər tərəfindən fəxarətlə xatırlanacaq: “Biz xoşbəxtik ki, bu tarixin bir hissəsiyik və bundan sonra doğma yurdda - işğaldan azad edilmiş yerlərdə yaşayacağıq. Arzu edirəm ki, azad Azərbaycanın bayrağı hər zaman yüksəklərdə dalğalansın, düşmənlərimiz də baxıb xar olsunlar”.

Qeyd edək ki, bu, Füzuliyə beşinci köç karvanıdır. İlk köç avqustun 18-də baş tutub. Bu mərhələdə Bakı, Sumqayıt şəhərlərində və Abşeron rayonunda müvəqqəti məskunlaşmış 23 ailə - 90 nəfər doğma yurduna qayıdıb. Avqustun 21-də 24 ailə (68 nəfər), avqustun 22-də 23 ailə (89 nəfər), sentyabrın 7-də 25 ailə (102 nəfər) dədə-baba torpaqlarına qovuşub.

Paylaş:

Baxılıb: 609 dəfə