Dördüncü köç...

Bakı:

22 °C

73 %

3 m/s

Əlaqə

AZ RU EN

Ana səhifə / Xəbər lenti / Dördüncü köç...

Dördüncü köç...

08.09.2023 [10:55]

Daha 25 ailə doğma Füzuliyə qayıtdı

Yeganə BAYRAMOVA

44 günlük müharibədə əldə olunan şanlı Qələbədən sonra növbəti mərhələ Qarabağın dirçəldilməsi və bölgədə tikinti-quruculuq işlərinin aparılmasıdır. Bu gün işğaldan azad edilmiş ərazilərimizdə yeni ab-hava var. Mənfur düşmənin əsarətindən xilas olan torpaqlarımıza yenidən həyat verilir. Ali Baş Komandanın qətiyyətli mövqeyi, xalqımızın birliyi və ordumuzun əzmi ilə ölkəmiz istədiyi bütün hədəflərə nail ola bilmə bacarığına sahibdir.

Dövlətimiz tərəfindən “Böyük Qayıdış” planına uyğun olaraq məcburi köçkünlərin doğma yurd-yuvalarına qısa zamanda qayıtması üçün bütün imkanlar səfərbər edilib. Həmin ərazilərdə yeni yaşayış məntəqələrinin salınması, infrasturukturun bərpası, yolların çəkilişi, məktəb, xəstəxana tikintisi sürətlə davam edir. Artıq sakinlər doğma torpaqlarına köçürülür.

Köçənlərin sayı 349 oldu

Dünən Füzuliyə növbəti-dördüncü köç karvanı Bakı şəhərinin Qaradağ rayonundakı “Qobu park 3” yaşayış kompleksindən yola salınıb. Bu mərhələdə Füzuli şəhərinə daha 25 ailə - 102 nəfər köçürülüb. Köçürülən ailələr Füzuli şəhərində yenidən tikilən evlərdə məskunlaşacaqlar. Bununla da Füzuli şəhərində 95 ailənin, yəni, 349 nəfərin daimi məskunlaşması təmin edilib.

Daha da gözəlləşən və abadlaşan Füzuli şəhərinin sakinləri hərtərəfli dövlət qayğısı ilə əhatə olunduqlarına görə Prezident İlham Əliyevə və Birinci vitse-prezident Mehriban Əliyevaya, torpaqlarımızı işğaldan qurtaran şanlı Azərbaycan Ordusuna, qəhrəman əsgər və zabitlərimizə minnətdarlıqlarını bildiriblər. Onlar bu yolda canlarından keçən şəhidlərimizi böyük ehtiramla yad ediblər.

İlk köç karvanı...

Xatırladaq ki, Füzuliyə ilk köç karvanı avqustun 18-də yola salınmışdı. İlk mərhələdə Bakı, Sumqayıt şəhərlərində və Abşeron rayonunda müvəqqəti məskunlaşmış 23 ailə - 90 nəfər doğma yurduna qayıdıb.

İkinci və üçüncü köç

Avqustun 21-də Füzuli şəhərinə daha 24 ailə - 68 nəfər köçürülüb. İkinci köç karvanı da Bakı şəhərinin Qaradağ rayonundakı “Qobu park 3” yaşayış kompleksindən yola salınıb.

Avqustun 22-də isə Füzuliyə üçüncü köç karvanı yola salınıb. Bu mərhələdə 23 ailə - 89 nəfər köçürülmüşdü.

“Böyük Qayıdış” azərbaycanlıların təkcə Qarabağ deyil, vaxtilə deportasiya edildikləri bütün tarixi torpaqları əhatə edəcək. Bu uğurlar ölkə başçısının həyata keçirdiyi sosial-iqtisadi siyasətin mükəmməlliyini və aparılan islahatların cəmiyyətin bütün üzvlərinin mənafeyini əks etdirdiyini göstərir. Azərbaycan Qarabağı cənnətə çevirməklə, “Böyük Qayıdış”ı yüksək səviyyədə təmin etməklə bir daha öz qüdrətini bütün dünyaya nümayiş etdirəcək. Dövlət başçısının dediyi kimi, “Biz işğaldan azad olan torpaqları cənnət məkana çevirəcəyik!”.

Paylaş:

Baxılıb: 575 dəfə