İrəvan təşkilata təzyiq etməyə çalışsa da...

Bakı:

19 °C

88 %

4 m/s

Əlaqə

AZ RU EN

Ana səhifə / Xəbər lenti / İrəvan təşkilata təzyiq etməyə çalışsa da...

İrəvan təşkilata təzyiq etməyə çalışsa da...

28.07.2023 [12:08]

Nardar BAYRAMLI

Ermənistan Kollektiv Təhlükəsizlik Müqaviləsi Təşkilatının baş katibinin müavini kvotasından da imtina edib. Ermənistanın baş naziri Nikol Paşinyan ilin əvvəlində keçirdiyi mətbuat konfransı zamanı KTMT-nin bu il Ermənistanda hərbi təlimlərinin keçirilməyəcəyini də “bəyan etdi”. Bu zaman o, blokun məsuliyyət zonasının nədən ibarət olduğunu anlamaq üçün erməni tərəfinin hələ də KTMT-dən konkret cavab gözlədiyini bildirdi. Rusiya Müdafiə Nazirliyi ilin əvvəlində KTMT-nin “Sarsılmaz qardaşlıq - 2023” sülhməramlı təlimlərinin Ermənistanda keçiriləcəyini bəyan etmişdi. Baş nazir Nikol Paşinyan yanvarın 10-da keçirdiyi mətbuat konfransında bildirdi ki, İrəvan bu il respublikada KTMT təlimlərinin keçirilməsini məqsədəuyğun hesab etmir. Ardınca da əlavə etdi ki, tərəflər arasında anlaşılmazlıq yaranıb.

Ermənistan hökumətinin təlimlər keçirməkdən imtina etmək qərarı onların regional kollektiv təhlükəsizlik sistemindən narazılıqlarının növbəti nümayişi oldu. Rəsmi İrəvan hər zaman xatırladır ki, kollektiv təhlükəsizlik sistemi keçən ilin sentyabrında Ermənistan-Azərbaycan sərhədində eskalasiyaya lazımi reaksiya verməyib. KTMT-nin İrəvanda keçirilən noyabr sammitində isə Ermənistan tərəfinin tutduğu mövqeyə görə iki sənədi - KTMT Kollektiv Təhlükəsizlik Şurasının bəyannaməsini və Ermənistana yardım göstərilməsi üzrə birgə tədbirlər haqqında qərarı imzalamaq mümkün olmamışdı. O zaman bu, Rusiya Prezidenti Vladimir Putinin açıq-aşkar narazılığına səbəb olmuşdu. Hər iki sənəd yenidən işlənmək üçün geri qaytarılmışdı.

Beləliklə, Ermənistan daha bir addım ataraq, Moskvanın hərbi blokundan narazılığını növbəti dəfə açıq şəkildə nümayiş etdirir. Kifayət qədər uzun müddətdir müşahidə etdiyimiz bütün bu addımlar uzaq perspektivdə nəyə hesablanıb? İrəvan KTMT-dən çıxmaq barədə artıq qərar verdiyinə işarə edir? Yoxsa bu, tərəfdaşlarını Azərbaycana qarşı hansısa addımlar atmağa məcbur etmək üçün yeni cəhddir? Amma məlumdur ki, təşkilat Azərbaycana qarşı heç bir addım atmayacaq. Ən azı ona görə ki, Azərbaycanın Ermənistan istisna olmaqla KTMT-nin bütün üzv ölkələri ilə çox yüksək münasibətləri mövcuddur. Bu ölkələr Ermənistandan daha çox Azərbaycanla əlaqələri gücləndirməyi üstün tutur. Bu səbəbdəndir ki, erməni rəsmiləri həmişə “Ermənistan KTMT-ni tərk edirmi” sualına “Ermənistan KTMT-ni yox, KTMT Ermənistanı tərk edir” cavabını verirlər. Rəsmi İrəvanın Belarusda keçiriləcək təlimlərdə iştirak etməsinin əsasında da bu səbəblər dayanır.

Paylaş:

Baxılıb: 475 dəfə