Bir ayda 5.3 milyard dollar...

Bakı:

26 °C

65 %

5 m/s

Əlaqə

AZ RU EN

Ana səhifə / Xəbər lenti / Bir ayda 5.3 milyard dollar...

Bir ayda 5.3 milyard dollar...

08.08.2023 [11:30]

Ukrayna yardımların artırılmasını istəyir

GÜLAY

Rusiya ilə müharibənin davam etdiyi bir şəraitdə Ukrayanaya xaricdən humanitar və hərbi dəstək davam edir. Kiyev təkcə iyul ayında Qərb tərəfdaşlarından qrant və kreditlər şəklində büdcəyə 5,3 milyard dollar cəlb edib. Bu barədə Ukrayna Maliyyə Nazirliyinin mətbuat xidməti məlumat yayıb. Məlumatda bildirilir ki, Kiyev Qərb tərəfdaşlarından külli miqdarda maliyyə yardımı alıb. Statistika belədir: Avropa İttifaqından 1,67 milyard dollar, Yaponiyadan 1,5 milyard dollar, ABŞ-dan 1,25 milyard dollar, Beynəlxalq Valyuta Fondundan isə təxminən 890 milyon dollar.

Ukraynaya Qərb dövlətləri tərəfindən göstərilən maliyyə və hərbi yardımlar Rusiya ilə vəziyyətin gərginləşməsi ilə əlaqədar başlanılıb və davam etməkdədir. Burada Avropanın hansı çıxarları var? Bu maddi yardımlar münaqişədə tərəflər nisbətinin dəyişməsinə təsir göstərirmi? Qeyd edək ki, Qərb dövlətlərindən Ukrayna büdcəsinə bu ilin yeddi ayında, ümumilikdə, 28 milyard dollar daxil olub. Maliyyə Nazirliyinin məlumatına əsasən Ukraynanın 2023-cü il dövlət büdcəsində 38 milyard dollar kəsir nəzərdə tutulub. BMT-nin Ukrayna üzrə humanitar koordinatoru Denis Braun keçirdiyi brifinqdə bu il Ukrayna üçün 3,9 milyard dollar məbləğində humanitar planın cəmi 30 faizinin maliyyələşdirildiyini açıqlayıb: “Əhalinin yardıma ehtiyacı artır ki, azalmır. Humanitar yardım planı cəmi 30 faiz maliyyələşdirilib. Ukraynada soyuqlar tez düşür. Biz artıq qış haqqında düşünməliyik”.

Prezident Volodimir Zelenski isə Qərbi Ukraynanın builki büdcəsinin kəsirini tam bağlamağa çağırıb. Mövcud ehtiyacların təhlili əsasında hazırlanan humanitar plan bütün humanitar ehtiyacları təmin etmək üçün 3,9 milyard dollar tələb edir. Dağıdılan Kaxovskaya su elektrik bəndinin yenidənqurulması isə bu vəsaitə daxil deyil. Çünki onun bərpası daha çox vəsait tələb edir. Qeyd edildiyi kimi, bu il ərzində edilən yardımlara nəzər salsaq, 2023-cü ilin əvvəlindən Ukraynanın beynəlxalq tərəfdaşlardan 28 milyard dollar maliyyə yardımı aldığı faktlar arasında yer alır. Ali Radanın büdcə komitəsinin rəhbəri Roksolana Pidlasanın sözlərinə görə, 2023-cü ilin ilk altı ayında xarici resurslar dövlət büdcəsinin ümumi fonduna daxil olan bütün gəlirlərin 49,1 faizini təşkil edib.

Ukraynaya yardımı ən pik həddə çatdıran Avropa İttifaqıdır və bu il artıq Kiyevə 11,43 milyard dollar güzəştli kredit ayırıb. 2023-cü ilin əvvəlindən Ukrayna büdcəsinə Beynəlxalq Valyuta Fondundan 3,59 milyard dollar, Kanadadan isə 1,76 milyard dollar daxil olub. Ali Radanın Maliyyə Komitəsinin məlumatına görə, 2023-cü ilin büdcəsində dövlət borcunun maksimum məbləğinin 172,7 milyard dollara qədər artırılması nəzərdə tutulub ki, bu da növbəti il üçün ÜDM-in proqnozlaşdırılan səviyyəsinin 102,3 faizini təşkil edir.

Paylaş:

Baxılıb: 609 dəfə