Qəbuledilməzdir!

Bakı:

27 °C

63 %

9 m/s

Əlaqə

AZ RU EN

Ana səhifə / Xəbər lenti / Qəbuledilməzdir!

Qəbuledilməzdir!

27.07.2023 [11:26]

Qərbi Azərbaycan İcmasının Bəyanatı...

Yeganə BAYRAMOVA

Ermənistanın baş naziri Nikol Paşinyan iyulun 25-də keçirdiyi mətbuat konfransında bir sıra məsələlərə toxunub. Baş nazir konfransda Brüssel sülh prosesi çərçivəsində Ermənistandan qovulmuş azərbaycanlıların geri qayıtması məsələsinə baxılması haqqında danışıb. O, çıxışı zamanı insan hüquqları məsələsində etnik əsasda ayrı-seçkilik və dolayısı ilə Azərbaycanın ərazi bütövlüyünə qəsd edən yanaşma nümayiş etdirib.

Paşinyan, həmçinin qeyd edib ki, Ermənistan Qarabağdakı erməni icmasının taleyini həll edə bilməz: “Bizim fikrimiz belədir: Ermənistan Respublikası “Dağlıq Qarabağ xalqı”nın taleyini həll edə bilməz. “Dağlıq Qarabağın nümayəndələri” özləri danışıqların, dialoqun tərəfi olmalıdırlar. Biz isə bu gündəmi təbliğ edirik”,

Baş nazirin fikrincə, Qarabağdakı erməni icmasının hüquqları və təhlükəsizliyi ilə bağlı məsələlər “beynəlxalq mexanizm çərçivəsində Xankəndi və Bakı arasında dialoq” yolu ilə müzakirə edilməlidir.

Ermənistan hökumətinin borcudur...

Qərbi Azərbaycan İcması Nikol Paşinyanın səsləndirdiyi iddialara cavab verib. İcmadan bildirilib ki, Paşinyanın Ermənistanın etnik təmizləməsinə haqq qazandırması qəbuledilməzdir.

İcmanın sözügedən bəyanatında qeyd olunub: “Ermənistanın baş naziri Nikol Paşinyan Ermənistandan qovulmuş azərbaycanlıların hüquqları məsələsinin Azərbaycanın Qarabağ bölgəsində yaşayan ermənilərin hüquqları məsələsi ilə müqayisə edilə bilməyəcəyini iddia edib.

İlk növbədə, qeyd edək ki, Ermənistandan qovulmuş azərbaycanlıların geri qayıtmaq hüququnu təmin etmək Ermənistan hökumətinin borcudur. Ermənistan hökumətinin bu ölkənin ərazisindən azərbaycanlıların hamısını qovduğu halda, Azərbaycanda yaşamaqda olan ermənilərin hüquqlarından dəm vurması ən böyük riyakarlıq və naşılıqla ört-basdır edilmiş ərazi iddiasıdır.

Azərbaycanın özünün Qarabağ bölgəsində yaşayan ermənilərlə təmaslara və onların hüquqlarını qorumağa hazır olduğu kimi, Ermənistan hökuməti də Qərbi Azərbaycan İcması ilə dialoqa başlamalı, bizim qayıdış hüququmuzu və qayıtdıqdan sonra hüquq və təhlükəsizliyimizi təmin etməlidir”.

Təhlükəli yanaşma...

İcmanın bəyanatında, həmçinin qeyd olunub ki, Paşinyanın insan haqları məsələsində Ermənistandan qovulmuş azərbaycanlıları Azərbaycan ərazisində yaşamaqda olan ermənilərdən fərqləndirməsi hüquqazidd və təhlükəli yanaşmadır: “Hamıya məlumdur ki, burada yeganə fərq azərbaycanlıların öz evlərində yaşamaqdan məhrum olmasıdır ki, bu da Ermənistana heç bir başucalığı gətirmir. Ermənistanın baş nazirinin ölkəsinin törətmiş olduğu etnik təmizləmə kimi insanlıq əleyhinə cinayətin nəticələrinə mötəbər bir arqument kimi istinad etməsi onun insan hüquqları və demokratiya məsələsində qeyri-səmimi olduğunu və monoetnik siyasəti davam etdirdiyini sübut edir.

Qərbi Azərbaycan İcması baş nazir Paşinyanın bu yanaşmasını sərt şəkildə qınayır və ondan mütləq dəyər olan insan hüquqlarına qeyd-şərtsiz hörmət etməyi və Ermənistandan qovulmuş azərbaycanlıların təhlükəsiz və ləyaqətli şəkildə geri qayıtmasına imkan yaratmağı tələb edir”.

Paylaş:

Baxılıb: 649 dəfə