Saxtakar və riyakar...

Bakı:

20 °C

88 %

4 m/s

Əlaqə

AZ RU EN

Ana səhifə / Xəbər lenti / Saxtakar və riyakar...

Saxtakar və riyakar...

15.07.2023 [09:50]

Son günlər antimilli ünsürlər sosial şəbəkələrdə yeni “trend” yaratmağa çalışırlar. Özü də azərbaycanlıları hədəf göstərməklə, Azərbaycan xalqının milli heysiyyatını aşağılamağa çalışmaqla. Söhbət Əli Kərimli, Fuad Qəhrəmanlı kimilərin xalqımızı “vətənpərvər olmamaq”da, yaxud “saxta vətənpərvərlik”də ittiham etməsindən gedir. Demək olar ki, hər gün bu barədə status paylaşır, canlı yayımda şüvən qoparırlar.

AXCP sədri “vətənpərvərlik tapşırıqla yox, qəlbin hökmü ilə edilməlidir” , - deyə xalqa “ağıl verməyə”, “yol göstərməyə” çalışır. O nə demək istəyir və nə üçün xalqa qarşı belə aqressivdir? Xalqın Əli Kərimli kimi antimilli ünsürləri tarixin arxivinə göndərməsi və ciddiyə almamasına görə acıqlı və qıcıqlıdır? Yoxsa onun zərərli və qanunsuz çağırışları cəmiyyət tərəfindən rədd edildiyinə görə Azərbaycan xalqını “vətənpərvər olmamaq”da ittiham edir? Bəs özü necə... o, vətənpərvərdir? Sadə bir sual reallığı əks etdirir: görəsən, Kərimli Makronun ermənipərəst mövqeyini özünün dediyi kimi, “qəlbinin hökmü” ilə müdafiə və təbliğ edir?!

Yaxud siyasi fəaliyyəti ilə deyil, məişət zəminində zorakılıq etməklə özünü gündəmə daşıyan Fuad Qəhrəmanlı adlı autsayder “icazəli vətənpərvərlik saxta hisslərin ən iyrənc formasıdır”, - deyərək Azərbaycan xalqının Ordumuza dəstəyini, ekofəalların Ermənistana və separatçılara kəskin etirazını lağ obyektinə çevirməyə çalışır. Özünü “vətənpərvər” cildində təqdim etməyə çalışan F.Qəhrəmanlıya başqa bir deyimi xatırlatmaq gərəkdir. Bu, məşhur ingilis yazıçısı Samuel Consona məxsus “əclafların sonuncu dayanacağı vətənpərvərlikdir” (təbii ki, söhbət saxta vətənpərvərlərdən gedir - red.) fikridir. Bu ifadə Azərbaycan xalqını “saxta vətənpərvərlik”də ittiham edən, amma özü “vətənpərvər” cildinə bürünərək antimilli mövqe sərgiləyən saxtakarlara - Fuad kimilərə necə də gözəl yaraşır, elə deyilmi?!

“Ermənistan kapitulyasiyaya məruz qalmayıb” deyən Fuad Qəhrəmanlı özünü necə “vətənpərvər” sayır? Məgər o 2020-ci il 10 noyabr tarixli üçtərəfli Bəyanata imza ataraq müharibənin nəticələrini qəbul edən, Ağdam, Laçın və Kəlbəcəri boşaltmaq öhdəliyi götürən və buna məcbur edilən ölkənin Ermənistan olduğunu bilmir? Paşinyan Ermənistan parlamentində çıxışı zamanı “bəli, biz təslimçilik aktına imza atmışıq” dediyi halda, Fuad Qəhrəmanlının əksini iddia etməsi “qəhrəmanlıq”dır, yoxsa “vətənpərvərlik?”. Başqa bir sual: 44 günlük Vətən müharibəsi zamanı Azərbaycan dövlətinə, ölkəmizin ərazi bütövlüyünə dəstək xarakterli bəyanatı imzalamaqdan imtina edən Əli Kərimli, Cəmil Həsənli kimilərdir vətənpərvər?!

İfşaedici sualların və faktların sayını istənilən qədər artırmaq olar. Amma hər halda, görünən dağa bələdçi lazım deyil.

Ümid VƏLİYEV

Paylaş:

Baxılıb: 674 dəfə