Dələduz turizm şirkətlərinin toruna düşməyin!

Bakı:

25 °C

41 %

4 m/s

Əlaqə

AZ RU EN

Ana səhifə / Xəbər lenti / Dələduz turizm şirkətlərinin toruna düşməyin!

Dələduz turizm şirkətlərinin toruna düşməyin!

11.07.2023 [11:55]

M.BAYRAMLI

Əfsuslar olsun ki, turizm sahəsində dələduzluq edilməsi ilə bağlı xəbərləri tez-tez eşidirik. Müxtəlif işbazlar vətəndaşların etibarından sui-istifadə edərək onlara “tur paketlər” satır. Sonradan aydın olur ki, nə bilet alınıb, nə də otel bron olunub...

Bu kimi hallarla qarşılaşmamaq üçün Azərbaycan Turizm Agentlikləri Assosiasiyasının vətəndaşlara müraciət edib. Yay mövsümündə səyahətlərin intensivləşməsi ilə əlaqədar vətəndaşların xüsusən xarici ölkələrə istirahət məqsədli səfərlərinin təşkili zamanı bir sıra hallarda müştəri və turizm şirkəti arasında müəyyən problemlərin və narazılıqların yaşanması risklərinin artmasını nəzərə alaraq vətəndaşları diqqətli olmağı tövsiyə edilib.

Qurumun mətbuat katibi Orxan Bədəlov yeniazerbaycan.com-a bildirib ki, əsas problemlər sırasında - şirkətlərin müştəriləri qarşısında götürdükləri öhdəliklərin yerinə yetirilməməsi, müəyyən ödəniş əsasında təklif etdikləri xidmətlərin lazımi səviyyədə olmaması və müştərilərin aldadılması kimi məsələlərə daha çox rast gəlinməsi öncədən ehtiyat tədbirlərinin görülməsini önə çıxarır: “Əvvəlki illərə nəzər yetirdikdə təəssüf ki, baş vermiş bu cür hallar nəticəsində vətəndaşların istirahətlərinin ya baş tutmaması, ya da gözləntilərinin qarşılanmaması, bəzi hallarda isə məsələnin hüquq-mühafizə orqanlarına və məhkəmələrə qədər çıxması müşahidə olunub. Bu cür halların baş verməməsi üçün Azərbaycan Turizm Agentlikləri Assosiasiyası olaraq xarici ölkələrə istər fərdi, istərsə də ailə və ya qrup şəklində səyahət etməyi nəzərdə tutan vətəndaşları turizm şirkətlərinin xidmətlərindən yararlanarkən daha diqqətli olmağa və ehtiyatlı davranmağa çağırırıq”.

Onun sözlərinə görə, turpaketlər alarkən və ya turizm şirkətinin xidmətlərindən yaralanarkən turizm bazarında keyfiyyət standartlarına cavab verən, Azərbaycan Turizm Agentlikləri Assosiasiyasında qeydiyyatda olan və ən əsası Turizm Reyestrindən keçmiş tur agentlərə üz tutmaq lazımdır.

Turizm şirkətlərinin xidmətlərindən istifadə edərkən mütləq şəkildə müqavilə əsasında əməkdaşlıq etmək tövsiyyə edilir: “Tərəflər arasında imzalanan müqavilə yaşanan hər hansı bir problemin hüquq müstəvisində həlli üçün əsas vasitədir. Hazırda Turizm Reyestrindən keçən Azərbaycan Turizm Agentlikləri Assosiasiyanın 120 üzvü mövcuddur. Vətəndaşlar qeyd olunmuş meyarlara cavab verən turizm şirkətlərinin xidmətlərindən istifadə etməklə yay mövsümündə daha çox müşahidə olunan vətəndaşla turizm şirkəti arasında yaşanan problemlərdən, narazılıqlardan və aldadılmalardan sığortalanmış ola bilərlər.”

Qeyd edək ki, Azərbaycan Turizm Agentlikləri Assosiasiyasına üzv şirkətlərin siyahısı ilə əlavədə qeyd olunan linkə daxil olaraq tanış ola bilərsiz. https://ataa.az/service/inkishaf-ve-keyfiyyet

Paylaş:

Baxılıb: 565 dəfə