BMT Təhlükəsizlik Şurasında...

Bakı:

23 °C

49 %

5 m/s

Əlaqə

AZ RU EN

Ana səhifə / Xəbər lenti / BMT Təhlükəsizlik Şurasında...

BMT Təhlükəsizlik Şurasında...

25.05.2023 [10:29]

Erməni yalanları növbəti dəfə ifşa olundu

N.BAYRAMLI

Nyu-Yorkda İsveçrənin sədrliyi ilə BMT-nin Təhlükəsizlik Şurasında “Silahlı münaqişələrdə mülki əhalinin müdafiəsi” mövzusunda toplantı keçirilib. Toplantının açıq müzakirələr hissəsində çıxış edən Ermənistanın xarici işlər nazirinin müavini Vahe Gevorqyan Azərbaycana qarşı əsassız iddialar səsləndirib. Gevorqyan deyib ki, guya Azərbaycan altı aydan artıqdır Qarabağı blokadada saxlayıb və bu da humanitar problemlərə səbəb olub. Erməni diplomat Laçın dəhlizində nəzarət-buraxılış məntəqəsinin yaradılmasını da Beynəlxalq Ədalət Məhkəməsinin qərarına zidd olduğunu iddia edib. Gevorqyan erməni ənənəsinə sadiq qalaraq yenə də Qarabağla bağlı hansısa beynəlxalq zəmanətdən, guya Azərbaycanda ermənilərə qarşı nifrətin dərinləşməsindən danışıb.

Azərbaycanın BMT-dəki daimi nümayəndəsi Yaşar Əliyev erməni diplomatın yalan üzərində qurulmuş çıxışını faktlarla ifşa edib. Yaşar Əliyev çıxışında bildirib ki, ölkəmizə qarşı otuz ilə yaxın təcavüzü zamanı Ermənistan çoxsaylı hərbi cinayətlər törədib, nəticədə on minlərlə dinc sakin həlak olub, kütləvi etnik təmizləmə aparılıb, yaşayış məntəqələri dağıdılıb və mədəniyyət məhv edilib. Diplomat deyib ki, bu vəhşiliklərin miqyasını münaqişə ilə bağlı itkin düşmüş 4 minə yaxın Azərbaycan vətəndaşı, o cümlədən Ermənistanın taleyinə aydınlıq gətirməkdən çəkindiyi 719 mülki şəxs də sübut edir: “Azərbaycanlı əsirlərin əksəriyyəti döyülüb, şikəst edilib, aclıq və təhqir kimi ağır işgəncələrə məruz qalıb. Ermənistan tərəfindən Azərbaycanın mülki əhalisinə qarşı törədilmiş çoxsaylı vəhşiliklərin günahkarları beynəlxalq hüquqa açıq-aşkar məhəl qoymadan cəzasız qalmağa davam edirlər”. Daimi nümayəndənin sözlərinə görə, münaqişə zamanı Ermənistan beynəlxalq hüququn norma və prinsiplərini pozaraq mülki əhalini və mülki infrastrukturu hədəfə alıb. O, münaqişənin sona çatmasına baxmayaraq, Ermənistanın hələ də Azərbaycan ərazisinə yerləşdirdiyi minalar haqqında məlumat vermədiyini diqqətə çatdırıb.

Yaşar Əliyev Ermənistanın xarici işlər nazirinin müavininin çıxışı zamanı verdiyi yalan bəyanata toxunaraq vurğulayıb: “Həmin bəyanatda Laçın-Xankəndi yolunun “blokadası”, Azərbaycanın Qarabağ iqtisadi rayonunda elektrik enerjisi və təbii qazın kəsilməsi və etnik təmizləmə, “soyqırımı niyyəti” ilə bağlı iddialar açıq-aşkar yalan və təxribat xarakterlidir. Azərbaycan heç vaxt sakinlərin yolda sərbəst hərəkətə, eləcə də ərzaq, dərman və digər humanitar məqsədlər üçün istifadəyə və Beynəlxalq Qızıl Xaç Komitəsinin çıxışına əngəl yaratmayıb. Ermənistanın bu kimi yalanlarını ifşa edən çoxsaylı sənədləşdirilmiş sübutlar da təsdiqləyir. Sərhəd-keçid məntəqəsinin yaradılmasına gəlincə, bu, hər hansı digər dövlətin öz sərhədlərini qorumaq və müdafiə etmək və sərhəd nəzarətini qurmaq hüququ kimi Azərbaycan Respublikasının danılmaz suveren hüququdur. Bu hüquq ərazi suverenliyi və bütövlüyünün təməl prinsiplərinə və Azərbaycanın yol boyu hərəkət edən şəxslərin, nəqliyyat vasitələrinin və yüklərin təhlükəsizliyinə təminat vermək vəzifəsinə əsaslanır. BMT Təhlükəsizlik Şurası dəfələrlə təsdiqləyib ki, ölkələrin sərhədlərinin təhlükəsizliyi üzv dövlətlərin suveren səlahiyyətidir. Ermənistan anlamalıdır ki, dezinformasiya sülh, sabitlik və barışıq məqsədlərini sarsıdır”.

Paylaş:

Baxılıb: 545 dəfə