Türkiyə nə qədər güclü olarsa...

Bakı:

22 °C

72 %

12 m/s

Əlaqə

AZ RU EN

Ana səhifə / Xəbər lenti / Türkiyə nə qədər güclü olarsa...

Türkiyə nə qədər güclü olarsa...

03.05.2023 [10:37]

Azərbaycan türk millətinin qərarını dəstəkləyir

Günel ABBASOVA

Mayın 14-ü Türkiyədə tarixi bir gündür. Həmin gün Türkiyədə həm prezident, həm də parlament seçkiləri keçiriləcək. Bizim üçün də önəmli bir gündür. Çünki Türkiyə Azərbaycanın müttəfiqidir, türk xalqı ilə Azərbaycan xalqı dost və qardaşdır. Bu mənada Türkiyədəki seçkilər Azərbaycan üçün də həyati əhəmiyyətli hadisədir. Biz də öz növbəmizdə seçki prosesindən əvvəlki vəziyyətin şərhinə davam edirik...

Milli Məclisin Azərbaycan-Türkiyə parlamentlərarası işçi qrupunun üzvü Anar İsgəndərov “Yeni Azərbaycan”a açıqlamasında bildirib ki, xalqımız Azərbaycanla Türkiyə arasında olan münasibətlərin bundan sonra da yüksək səviyyədə davam etməsini istəyir: “Müttəfiqlik haqqında Şuşa bəyannaməsi bundan sonra da uğurla davam etdirilsin. Azərbaycanın haqq işi harada varsa, Türkiyə bu günə qədər onun yanında olub, bundan sonra da yanında olsun. Türkiyə ilə bağlı hansı problem varsa, Azərbaycan o problemə qarşı olduğuna görə, bundan sonra da olsun. Ona görə də Azərbaycan dövləti, Azərbaycan xalqı Türkiyənin haqq yolunu, ədalətli yolunu, dünya dövlətləri arasında öz yeri olan qardaş ölkəni arzulayır. Çünki Türkiyə nə qədər güclü olarsa, Azərbaycan da o qədər güclüdür. Türkiyənin ədalətli mövqeyi həm də Azərbaycanın ədalətli mövqeyidir. Həqiqətdir ki, Qarabağ probleminin ədalətli şəkildə həll olunmasında, Azərbaycanın haqq işinin müdafiəsində Türkiyə Cümhuriyyətinin müstəsna xidməti var. Hələ əlavə etsək ki, iki dövlət və dövlət başçıları bir-birinə dostdur, qardaşdır. Bu da iki dövlət arasında qurulan münasibəti göstərir”.

Deputat qeyd edib ki, Azərbaycanla Türkiyə arasında həm də bir qardaşlıq tarixi var: “Bu qardaşlıq tarixinin bünövrəsi Çanaqqalada qoyulub, minlərlə azərbaycanlı Rusiya təbəsində olmağına baxmayaraq, Osmanlının haqq işində dil və din qardaşlarının yanında oldu, onların istiqlalı üçün vuruşdu, hətta şəhid olanlarımız da var idi. Təbii ki, Osmanlı da borclu qalmadı. Elan olunan Cümhuriyyətin ordusu yox idi. O zaman Osmanlı Qafqaz İslam Ordusu deyilən bir ordu ilə Azərbaycanın köməyinə çatdı. Bu Ordu Gəncədən Bakıya qədər bir azadlıq, mücadilə yolu keçdi və bu yolda 1300 nəfərdən artıq şəhid verdi. Təbii ki, 1921-ci ildə Qars müqaviləsinin şərtlərinə görə Naxçıvanın Azərbaycanın tərkibində qalması, ən nəhayət, 44 günlük Vətən müharibəsi və bu müharibədə Türkiyə Cümhuriyyətinin Azərbaycana hərtərəfli yardımı, Şuşa Bəyannaməsinin imzalanması onu göstərir ki, biz mövcud Türkiyədəki iqtidarla dost və qardaşıq. Türk xalqı Azərbaycan xalqı ilə dostdur, qardaşdır. Biz də iqtidar partiya olaraq Türkiyədə iqtidar partiyanın hakimiyyətdə qalmasını arzulayırıq, ancaq seçim türk millətinindir. Türk milləti hansı qərarı verəcəksə, biz də həmin qərarı dəstəkləyəcəyik”.

Paylaş:

Baxılıb: 621 dəfə