Bu ailələrə ŞAD xəbər!

Bakı:

15 °C

94 %

4 m/s

Əlaqə

AZ RU EN

Ana səhifə / Xəbər lenti / Bu ailələrə ŞAD xəbər!

Bu ailələrə ŞAD xəbər!

28.04.2023 [10:37]

İldə 4 dəfə sosial müavinət alacaqlar...

Yeganə BAYRAMOVA

“Sosial müavinətlər haqqında” qanuna təklif edilən düzəlişlər Milli Məclisin Əmək və Sosial Siyasət Komitəsində müzakirə olunaraq plenar iclasa tövsiyə olunub. Dəyişikliklərə əsasən, himayədar ailəyə verilmiş uşağın, o cümlədən 18 yaşınadək əlilliyi müəyyən edilmiş uşağın tərbiyə edilməsinə görə aylıq müavinətlər ödəniləcək.

Bu müavinət himayədar valideynlərlə dövlət qurumu arasında uşağın, o cümlədən 18 yaşınadək əlilliyi müəyyən edilmiş uşağın himayədar ailəyə verilməsinə dair müqavilə bağlanıldıqdan sonra ödəniləcək. Müavinətin məbləği dəyişikliklərin qəbulundan sonra müəyyənləşəcək.

Digər dəyişikliyə əsasən, həmin uşaqlara mövsümi geyim alınması üçün birdəfəlik müavinətlər də ödəniləcək. Bu zaman da oxşar müqavilənin bağlanması əsas şərtdir. Müavinət müqavilə bağlanıldıqdan sonra ildə 4 dəfə (mart, iyun, sentyabr və dekabr aylarında) ödənilməklə, həmin müqavilənin qüvvədə olduğu müddətə təyin edilir”.

Dövlətin bu sahədəki siyasətini “Yeni Azərbaycan”a şərh edən millət vəkili Elman Məmmədov bildirib ki, dəyişikliklərin məqsədi uşaqları himayəyə götürən ailələrin sosial vəziyyətini daha da yaxşılaşdırmaq və kimsəsiz uşaqların ailələrdə böyüməsini stimullaşdırmaqdır. Onun sözlərinə görə, Azərbaycan dövləti vətəndaşlarının təhlükəsizliyini və sosial rifahını qorumaq üçün bütün lazımi tədbirləri görür:

“Bu məsələ hər zaman Prezident İlham Əliyevin diqqətində olub. Ölkə başçısı daima yaşlı, tənha insanlara qayğı ilə yanaşıb, aztəminatlı ailələrə sosial yardımların edilməsi üçün lazımi göstərişlər verib, onların problemlərinin həllinə çalışıb. Bu kateqoriyadan olan insanlar həmçinin Birinci vitse-prezident Mehriban xanım Əliyevanın da diqqətində olub”.

Parlament üzvü qeyd edib ki, İlham Əliyevin rəhbərliyi ilə son illərdə Azərbaycanda həyata keçirilən sosial siyasət ölkəmizdə qayğıya ehtiyacı olan bütün insanları əhatə edir: “Bu baxımdan, şəhid ailələrinə, Qarabağ müharibəsi əlillərinə, məcburi köçkünlərə, aztəminatlı ailələrə və sosial qayğıya ehtiyacı olan digər şəxslərə göstərilən diqqət xüsusi önəm kəsb edir. Onu da xüsusi olaraq vurğulamaq yerinə düşər ki, bir zamanlar pandemiyanın ölkəmizdə yaratdığı çətinliklərə baxmayaraq, Azərbaycanda həyata keçirilən sosial siyasətin prioritetləri dəyişməz olaraq qalır. Təsadüfi deyil ki, ölkəmizdə sosial-iqtisadi vəziyyətlə bağlı görülən işlərdə dövlət başçısı İlham Əliyev bir daha əhalinin məşğulluğu və sosial rifahına dəstək tədbirlərinin davam etdirilməsinin vacibliyini vurğulayıb”.

“Sosial müavinətlər haqqında” qanuna edilən dəyişikliklər də təqdirəlayiqdir. Himayəsinə uşaq götürən ailələrə ildə 4 dəfə müavinətlərin verilməsi ölkə başçısının yürütdüyü sosial siyasətin əsas hissələrindən birini təşkil edir. Bütün bunların hər biri Azərbaycan xalqına göstərilən diqqət və qayğının əsas təzahürüdür” - deyə E.Məmmədov əlavə edib.

Paylaş:

Baxılıb: 460 dəfə