Jurnalistlərin peşəkar fəaliyyətinə...

Bakı:

27 °C

54 %

7 m/s

Əlaqə

AZ RU EN

Ana səhifə / Xəbər lenti / Jurnalistlərin peşəkar fəaliyyətinə...

Jurnalistlərin peşəkar fəaliyyətinə...

26.04.2023 [10:51]

Qanunsuz müdaxilə edənlər cərimələnəcəklər

Aprelin 25-də Azərbaycan Prezidenti İlham Əliyev İnzibati Xətalar Məcəlləsinə dəyişikliklər edilməsi ilə bağlı qanunun təsdiq edilməsi haqqında Fərman imzalayıb. Sənədə əsasən audioviziual media subyektlərinə dair yeni cərimələr müəyyənləşib. Belə ki, audioviziual media subyektləri tərəfindən yayımlanmış materialların saxlanılmasının “Media haqqında” qanunla müəyyən edilmiş qaydaların pozulmasına görə yeni cərimələr formalaşıb. Məcəlləyə əsasən, buna görə vəzifəli şəxslər beş yüz manatdan yeddi yüz manatadək məbləğdə, hüquqi şəxslər min manatdan min beş yüz manatadək məbləğdə cərimə ediləcək. Həmçinin, İnzibati Xətalar Məcəlləsinə görə, audiovizual media, çap mediası və onlayn media subyektləri tərəfindən reklam və sponsorluqla bağlı “Media haqqında” və “Reklam haqqında” qanunların tələblərinə riayət edilməməsinə görə vəzifəli şəxslər iki min manatdan üç min manatadək məbləğdə, hüquqi şəxslər səkkiz min manatdan on min manatadək məbləğdə cərimə ediləcək. Eyni zamanda, İnzibati Xətalar Məcəlləsinə edilən yeni dəyişikliklə proqrama müstəsna yayım hüququ əldə etmiş audioviziual yayımçıdan başqa, digər audioviziual yayımçıların həmin proqramı yayımlamasına görə vəzifəli şəxslər min beş yüz manatdan iki min manatadək məbləğdə, hüquqi şəxslər isə üç min manatdan beş min manatadək məbləğdə cərimə ediləcək.

Lisenziya qaydalarının pozulmasına görə cərimələr

Bundan başqa, audiovizual media sahəsində lisenziyanın qayda və şərtlərinin pozulmasına görə də cərimələr müəyyənləşir. Məcəlləyə əsasən, buna görə vəzifəli şəxslər min beş yüz manatdan iki min beş yüz manatadək məbləğdə, hüquqi şəxslər beş min manatdan səkkiz min manatadək məbləğdə cərimə ediləcək. Eyni zamanda, media subyektləri tərəfindən sağlamlığın və ətraf mühitin qorunmasına zidd olan hərəkətlərin təbliğ olunmasına görə vəzifəli şəxslər səkkiz yüz manatdan min manatadək məbləğdə, hüquqi şəxslər iki min manatdan üç min manatadək məbləğdə cərimə ediləcək.

Məhkəmə qərarı olmadan şəxsin təqsirli olması barədə məlumat yayanlar cərimələnəcəklər

İnzibati Xətalar Məcəlləsinə edilən dəyişikliklərlə qanuni qüvvəyə minmiş məhkəmə qərarı olmadan şəxsin təqsirli olması barədə məlumatların dərc edilməsinə (yayımlanmasına) görə yeni cərimə müəyyənləşib. Belə hallara görə, vəzifəli şəxslər min manatdan min beş yüz manatadək məbləğdə, hüquqi şəxslər iki min beş yüz manatdan üç min beş yüz manatadək məbləğdə cərimə ediləcəklər.

Media azadlığından sui-istifadə edənlər də cərimələnəcək

Məcəlləyə əsasən, Media subyektinin redaksiyası (məsul redaktoru) və jurnalistlər tərəfindən media sahəsində fəaliyyət azadlığından və jurnalist hüququndan sui-istifadə etməyə, yəni, açıqlanması qanunla qadağan edilən informasiyanı yaymağa və ya informasiya mənbəyini qanunla yol verilməyən hallarda açıqlamağa görə fiziki şəxslər iki yüz manatdan üç yüz manatadək məbləğdə, vəzifəli şəxslər beş yüz manatdan yeddi yüz manatadək məbləğdə, hüquqi şəxslər iki min manatdan üç min manatadək məbləğdə cərimə ediləcəklər.

Audiovizual Şuranın və MEDİA-nın yeni səlahiyyətləri

Dövlət başçısının Fərmanı ilə imzalanmış sənədə əsasən, media subyektləri tərəfindən sağlamlığın və ətraf mühitin qorunmasına zidd olan hərəkətlərin təbliğ olunması və Qanuni qüvvəyə minmiş məhkəmə qərarı olmadan şəxsin təqsirli olması barədə məlumatların dərc edilməsi (yayımlanması) ilə bağlı inzibati xətalar haqqında işlərə audiovizual media subyektlərinə münasibətdə Azərbaycan Respublikasının Audiovizual Şurası, digər media subyektlərinə münasibətdə Azərbaycan Respublikasının Medianın İnkişafı Agentliyi baxacaq.

Qeyd edək ki, media subyektləri tərəfindən sağlamlığın və ətraf mühitin qorunmasına zidd olan hərəkətlərin təbliğ olunmasına görə vəzifəli şəxslər səkkiz yüz manatdan min manatadək məbləğdə, hüquqi şəxslər iki min manatdan üç min manatadək məbləğdə cərimə ediləcək.

Qanuni qüvvəyə minmiş məhkəmə qərarı olmadan şəxsin təqsirli olması barədə məlumatların dərc edilməsinə (yayımlanmasına) görə vəzifəli şəxslər min manatdan min beş yüz manatadək məbləğdə, hüquqi şəxslər iki min beş yüz manatdan üç min beş yüz manatadək məbləğdə cərimələnəcək.

Həmçinin, yeni sənədlə jurnalistlərin peşəkar fəaliyyətinə qanunsuz müdaxilə edilməsinə görə 300 manatdan 600 manatadək məbləğdə cərimə nəzərdə tutulur.

Nicat

Paylaş:

Baxılıb: 537 dəfə