Qazi Universitetinin rektoru: “Heydər Əliyev həyatını türk dünyasına və Azərbaycan xalqına həsr etmiş tarixi şəxsiyyətdir”

Bakı:

29 °C

48 %

6 m/s

AZ RU EN

Ana səhifə / Xəbər lenti / Qazi Universitetinin rektoru: “Heydər Əliyev həyatını türk dünyasına və Azərbaycan xalqına həsr etmiş tarixi şəxsiyyətdir”

Qazi Universitetinin rektoru: “Heydər Əliyev həyatını türk dünyasına və Azərbaycan xalqına həsr etmiş tarixi şəxsiyyətdir”

24.04.2023 [13:55]

”Tarixdə mühüm rol oynayan, həyatını xalqının uğurlarına həsr edən tarixi şəxsiyyətlər vardır. Bu mənada mərhum Heydər Əliyev ömrünü həm türk dünyasının, həm də Azərbaycan türklərinin rifahına həsr etmiş dövlət xadimidir”.

“Yeni Azərbaycan” qəzetinin Türkiyə bürosuna bu fikirləri Qazi Universitetinin rektoru, professor Musa Yıldız bildirib.

Rektor Heydər Əliyevin anadan olmasının 100 iliyi ilə əlaqədar Azərbaycanla yanaşı, Türkiyədə də silsilə tədbirlərin keçirilməsin təqdir edib.

Heydər Əliyevin 80 illik həyatında mübarizə yolundan bəhs edən rektor Türkiyə-Azərbaycan əlaqələrinin möhkəmlənməsində onun xüsusi xidmətlərindən danışıb: “Naxçıvanda yaşadığı vaxtda onun türk dünyası ilə bağlı başlatdığı mübarizəsi, ömrünün son anına qədər dövlətinə, millətinə göstərdiyi fədakarlıq əsl nümunəvi əhəmiyyətə malikdir və bu xidmət nəsillərin yaddaşında qalacaqdır. Qazi Mustafa Kamal Atatürkün “Azərbaycanın sevinci sevincimiz, kədəri kədərimizdir” ifadəsi Azərbaycanda yaşayan qardaşlarımızla Anadolu coğrafiyasının insanları arasındakı münasibəti daha da yaxınlaşdırıb. Eləcə də Azərbaycanın ümummilli lideri Heydər Əliyevin “Biz bir millət, iki dövlətik” kəlamı bizim çox yaxın müttəfiq olduğumuzun ən bariz göstəricisidir. Təsadüfi deyil ki, Heydər Əliyev vaxtilə universitetimizi də ziyarət edib, bizi şərəfləndirib və ona universitetimiz tərəfindən fəxri doktor adı verilib”.

Azərbaycanın 1990-cı illərdə müstəqilliyini tanıyan ilk ölkənin Türkiyə olduğunu deyən Musa Yıldız Heydər Əliyevin Türkiyə ilə hər sahədə əməkdaşlığa önəm verməsinə də diqqət çəkib: “Heydər Əliyevin 1990-cı illərdə sovet ittifaqına qarşı mübarizəsi, 20 Yanvar hadisələrini törədənlərin cəzalandırılması tələbi gənclərimizə xüsusilə təbliğ olunmalıdır. 1995-ci ildə Türkiyə Cümhuriyyətinin təşəbbüsü ilə həyata keçirilən böyük tələbə layihələri, bir çox sahələrdəki təsisat işləri, iqtisadiyyat, beynəlxalq əlaqələr, təhsil və mədəni fəaliyyətlər Heydər Əliyevin bu təşəbbüsləri dəstəkləməsi sayəsində baş tutub. Məhz onun nəticəsidir ki, Azərbaycan əsgəri Türkiyədən aldığı hərbi təlim və dəstəkləri ilə təkmilləşdi, bununla da Qarabağ torpaqları işğaldan azad edildi. Bu istiqamətdə Prezident İlham Əliyevlə Prezident Rəcəb Tayyib Ərdoğanın “İki dövlət, bir millət” prinsipi əsasında əməkdaşlığı qardaş ölkələrə, dostlara etimad, düşmənə qorxu verir. Biz bunun son nümunəsini Qarabağ müharibəsi zamanı ən parlaq şəkildə bütün dünyaya bəyan etdik. Bu qardaşlıq və əməkdaşlıq ruhunun inkişafında Qazi Mustafa Kamal Atatürkdən Heydər Əliyevə qədər tarixə söykənən bir mərhələ var”.

Rektor Heydər Əliyevin Türkiyədəki gələcək nəsillərə tanıtmaqda Qazi Universitetinin də rol oynadığını vurğulayıb: “Universitetimiz türk dünyasının, xüsusən də Azərbaycanın problemləri ilə yaxından maraqlanan, bu məsələlərin həlli yollarını axtaran, eləcə də Heydər Əliyevin bir şəxsiyyət olaraq nümunəvi xidmətlərini təbliğ edən təhsil müəssisəsidir. Bundan başqa Azərbaycanın universitetləri ilə Qazi Universiteti olaraq çox sahələrdə əməkdaşlığımız var. 2020-ci ildə universitetimizdə rektor olaraq fəaliyyətə başladıqdan sonra 11 universitetlə təhsil-tədris əməkdaşlıq protokolları imzalamışıq. O cümlədən Azərbaycan Texniki Universiteti ilə elektrik və elektron mühəndisliyi sahəsində birgə diplom proqramı, 2023-2024-ci illər üçün Azərbaycan Tibb Universiteti ilə birgə tibb və fizioterapiya sahələrində birgə kurs proqramları, Erasmus+ və Orhun mübadilə proqramları ilə fəaliyyətlərimızi davam etdiririk. Hazırda universitetimizdə bakalavr və magistratura pilləsində ümumilikdə 110 azərbaycanlı tələbə təhsil alır. İyun ayında isə Ankarada Mingəçevir Universiteti ilə bərabər Heydər Əliyevin 100 illik yubileyi ilə bağlı simpozium keçiriləcək. Bundan əlavə, universitetimizdə Türk İncəsənət Cəmiyyəti və Türk Dünyası Araşdırmalar Mərkəzinin xətti ilə hər il mütəmadi olaraq Xocalı Soyqırımı və Qarabağ Zəfəri ilə bağlı tədbirlər keçirilir”.

Sevil Hilalqızı Ünal, Ankara

Paylaş:

Baxılıb: 582 dəfə