Zelenski Baydendən nə istəyəcək?

Bakı:

22 °C

54 %

3 m/s

Əlaqə

AZ RU EN

Ana səhifə / Xəbər lenti / Zelenski Baydendən nə istəyəcək?

Zelenski Baydendən nə istəyəcək?

17.02.2023 [10:59]

Nicat Dilqəmli

Xarici mətbuatda Ukrayna prezidentinin Polşada ABŞ prezident ilə görüşünün planlaşdırıldığı ilə bağlı məlumatlar yayılmaqdadır. Polşa tərəfi təhlükəsizlik qaydaları səbəbindən görüş haqqında hər hansı bir məlumat verməsə də, müəyyən detallar (ehtimallar) diqqətdən kənarda qalmayıb. Belə ki, Ukrayna hakimiyyətinə yaxın mənbələr görüşlə bağlı hazırlıqların bitmək üzrə olduğunu qeyd ediblər: “Qeyri-adi heç nə baş verməsə, o zaman Ukrayna prezidenti Volodimir Zelenksi yaxın vaxtlarda Polşaya rəsmi səfər edəcək. Biz buna hazırlığı bitiririk”.

Ukrayna prezidenti də ehtimal edilən görüş barədə fikirlərini mətbuata səsləndirib. Zelenksi bu barədə İsveçin baş naziri U.Kristersonla birgə Kiyevdə keçirilən mətbuat konfransında danışıb. O bildirib ki, ABŞ lideri “imkanı yarandıqda” Ukraynaya səfər edə bilər: “Hərdən Baydenlə görüşürük. Əlbəttə, bilirsiniz ki, biz onu dəvət etmişik və onun imkanı yarandıqda, düşünürəm ki, böyük məmnuniyyətlə Ukraynaya səfər edəcək. Bu, cəmiyyətimiz üçün mühüm dəstək siqnalıdır”. Ukrayna prezidenti Baydenlə müxtəlif əlaqə vasitələrinin olduğunu da diqqətə çatdırıb. “Onların böyük dəstəyinə görə minnətdarıq”, - deyə V.Zelenksi fikirlərinə yekun vurub.

Xatırladaq ki, Rusiya-Ukrayna müharibəsi başladığı gündən etibarən Zelenksi dörd Avropa paytaxtına səfər edib. Bunlar Vaşinqton, London, Paris və Brüsseldir. Bundan başqa, Ukrayna prezidentinin Polşaya iki səfəri baş tutub. Ötən ilin fevral ayının 9-da və dekabrın 22-də o, Rzeşovda Polşa prezidenti Anjey Duda ilə görüşüb.

Qeyd edək ki, Co Baydenin Polşada 20-22 fevral tarixlərində olacağı gözlənilir.

Təbii ki, hazırda maraqlı olan əsas məqamlardan biri də Polşada reallaşması planlaşdırılan görüşdə müzakirə ediləcək məsələlərin hansı sahələri əhatə edəcəyi ilə bağlıdır. Siyasi analitiklərin proqnozlarına görə, Zelenksi ilə Bayden görüşündə əsasən yeni hərbi texnikanın əldə olunması, hərbi məsələlər üzrə bir çox digər önəmli məqamlar barədə müzakirə aparılacaq.

Mövzu ilə bağlı “Yeni Azərbaycan” qəzetinə danışan siyasi məsələlər üzrə ekspert İlqar Vəlizadə deyir ki, görüşdə müzakirə ediləcək bir çox məsələlər var. Politoloq Ukraynanın bu günə qədər əldə etdiyi hərbi texnikaya qulluq məsələsi ilə bağlı danışıqların aparılacağını da istisna etmir: “Burada müzakirə mövzusu ola biləcək bir çox məsələlər var. F-16-lar, tanklar, raket əleyhinə sistemlərin alınması - bütün bu kimi məsələlər müzakirə obyektinə çevriləcək. Digər tərəfdən, yeni raketlərin alınması, bundan başqa, ABŞ-dan alınmış hərbi texnikanın təchizatı ilə bağlı məsələlər müzakirə olunacaq. Doğrudur, müxtəlif hərbi texnikaları artıq onsuz da alırlar, amma həmin mürəkkəb qurğulara texniki qulluğun göstərilməsi də olduqca vacib olan məqamlardandır. Bunun üçün xüsusi cihazlara, bu işlə məşğul olan peşəkar mühəndislərə ehtiyac var. Yəni, burada müzakirə edilməli olan bir çox mövzular var və düşünürəm ki, görüşdə bütün bu mətləblər ətrafında müzakirələr aparılacaq”.

Paylaş:

Baxılıb: 478 dəfə