50 min ödə, 15 min geri al

Bakı:

24 °C

55 %

3 m/s

Əlaqə

AZ RU EN

Ana səhifə / Xəbər lenti / 50 min ödə, 15 min geri al

50 min ödə, 15 min geri al

02.06.2022 [10:37]

ƏDV-nin 30 faizi geri qaytarılacaq

MÜBARİZ

Fiziki şəxs olan istehlakçılar tərəfindən Azərbaycan Respublikasının ərazisində bina tikintisi fəaliyyəti ilə məşğul olan şəxslərdən nağdsız qaydada alınmış yaşayış və qeyri-yaşayış sahələrinə görə ödənilmiş əlavə dəyər vergisinin qaytarılması Şərtləri və Qaydası təsdiqlənib. Prezident İlham Əliyev bununla bağlı 25 may 2022-ci il tarixində müvafiq Fərman imzalayıb. Sənəddə nəzərdə tutulan qaydalar və şərtlər Vergi Məcəlləsinin 165.6-cı maddəsinə uyğun olaraq hazırlanıb. Fərmanda İqtisadiyyat Nazirliyinə müvafiq infrastrukturun, o cümlədən portalın, proqram təminatının və vahid elektron məlumat bazasının yaradılması tapşırılıb. Yaradılacaq infrastrukturun Dövlət Vergi Xidmətinin və müvəkkil bankın (bankların) istifadəsində olan elektron informasiya sistemlərinə inteqrasiyası İqtisadiyyat Nazirliyinin büdcədənkənar fondu hesabına təmin ediləcək.

Dövlət başçısının Fərmanı ilə təsdiqlənən ƏDV-nin 30 faiz həcmində geri qaytarılması mexanizmi özündə bir sıra mühüm məqamları ehtiva edir. Qaydanı “Yeni Azərbaycan”a şərh edən Milli Məclisin deputatı Vüqar Bayramov vurğulayıb: “ƏDV-nin geri qaytarılması istər yaşayış, istərsə də qeyr?-yaşayış sahəsi nağdsız şəkildə alındıqda tətbiq olunur. Qeyd edək ki, hazırda əmlak satışı nağdsız, yəni banklar vasitəsi ilə həyata keçirilir. Bu zaman vəsaitin geri qaytarılması təqdim edilmiş elektron qaimə-faktura üzrə əmlakın qiymətindən (ƏDV ilə birlikdə) asılı olmayaraq reallaşdırılacaq. Geri qaytarılan vəsait alıcının bank hesabına köçürüləcək. Məsələn, alıcı mənzil alan zaman 50 min manat ƏDV ödəyibsə, həmin vəsaitin 15 min manatı onun hesabına qaytarılacaq”.

ƏDV-nin geri qaytarılması əmlakın dəyəri nağdsız qaydada satıcıya tam şəkildə ödənildiyi halda mümkün olacaq. Əmlakın alınması üçün hissə-hissə ödəniş edilərsə, ƏDV əmlak sahələrinin tam dəyəri nağdsız qaydada ödənildikdən sonra müvəkkil bank tərəfindən alıcının bank hesabına köçürüləcək. “Qaydaya əsasən, alıcı eyni binadan bir və ya bir neçə əmlak aldıqda, ƏDV-nin qaytarılması alınmış yaşayış sahəsinin 500 kvadratmetrdən və qeyri-yaşayış sahəsinin 500 kvadratmetrdən çox olmayan hissəsinə mütənasib ödənilmiş ƏDV-yə tətbiq edilir. Alıcının eyni binadan sahəsi 500 kvadratmetrdən artıq olan bir neçə yaşayış və ya qeyri-yaşayış sahəsi alması zamanı əmlak sahələrinin bir kvadratmetrinin satış qiyməti fərqli olduqda, ƏDV-nin qaytarılması məqsədilə 500 kvadratmetr hissə müəyyən edilərkən bir kvadratmetrinin satış qiyməti daha yüksək olan əmlak sahəsi əsas götürülür. Tutaq ki, vətəndaş eyni binadan fərqli qiymətə 3 mənzil alıb. Qiymətlər fərqli olduğundan ödənilən ƏDV məbləği də dəyişəcək. Məsələn, bir mənzil üzrə ƏDV məbləği 50 min, digəri üzrə 55, sonuncu üzrə 60 min manat olub. Bu zaman ƏDV ödənilməsi 60 min manat əsas götürülməklə həyata keçiriləcək”, - deyə Milli Məclizin deputatı əlavə edib.

Vüqar Bayramovun bildirdiyinə görə, ƏDV-nin bir hissəsinin geri qaytarılması mexanizminin bu qaydada müəyyənləşdirilməsinin mahiyyəti ondan ibarətdir ki, əgər vətəndaşın aldığı əmlakın sahəsi 600 kvadratmetrdirsə, o zaman onun 500 kvadratmetrinə görə ödədiyi məbləğə əsasən ƏDV nəzərə alınır və geri qaytarılır. Milli Məclisin deputatı fkirlərinə davam edərək bildirib: “Alınan əmlakın 1 kvadratmetrinə düşən məbləğə əsasən hesablama aparılır. Məsələn, 600 kvadratmetr sahəsi olan əmlaka 900 min manat ödənilibsə, bu o deməkdir ki, əmlakın 1 kvadratmetrinin qiyməti 1500 manatdır. Bu zaman ümumi məbləğin 750 000 manatlıq hissəsinin ƏDV-si hesablanır (18.0 %) və həmin məbləğin 30 faizi alıcıya qaytarılır. Əmlakın alınmasına görə nağdsız qaydada ödənilmiş ƏDV alıcı tərəfindən portala müraciətin daxil edildiyi tarixdən 30 iş günü müddətində qaytarılacaq”.

Paylaş:

Baxılıb: 804 dəfə