Kəndi şəhərə gətirdilər

Bakı:

26 °C

54 %

2 m/s

Əlaqə

AZ RU EN

Ana səhifə / Xəbər lenti / Kəndi şəhərə gətirdilər

Kəndi şəhərə gətirdilər

10.03.2022 [11:10]

“Kənddən şəhərə” yarmarkası fəaliyyətə başlayıb

Ötən həftədən etibarən Kənd Təsərrüfatı Nazirliyi tərəfindən Bakı və Abşeron ərazisində üç fərqli ünvanda “kənddən şəhərə” həftəsonu yarmarkaları başlayıb. Yarmarkaların təşkilində əsas məqsəd yerli fermer təsərrüfatları üçün alternativ satış kanalı yaratmaq, eyni zamanda şəhər sakinlərini təbii və sağlam kənd məhsulları ilə dolğun şəkildə təmin etməkdir.

MÜŞFİQƏ

Budəfəki yarmarkalarda ümumilikdə 40-dan artıq regiondan 100-ə yaxın fermer tərəfindən 50-dək çeşiddə təbii kənd təsərrüfatı və qida məhsullarının satışı həyata keçirilir.

Satışa çıxarılan məhsulların keyfiyyətinə nəzarət etmək məqsədilə yarmarkalarda Azərbaycan Qida Təhlükəsizliyi Agentliyinin Səyyar Qida Laboratoriyası fəaliyyət göstərir. Vətəndaşlar yarmarkada satışa çıxarılan hər hansı bir məhsulun keyfiyyət göstəricilərini öyrənmək üçün laboratoriyanın xidmətlərindən ödənişsiz şəkildə faydalana bilərlər.

Biz də Nərimanov rayonu, Fətəli xan Xoyski küçəsi, 5 ünvanına (metronun “Gənclik” stansiyasının çıxışı) yollandıq. Müşahidələrimizə görə, alıcı qüvvəsi az idi. Gördüyümüz qədərilə, yarmarkalar karantin rejiminin tələblərinə əməl olunmaqla keçirilirdi. Yarmarkada iştirak edən fermerlər ödənişsiz şəkildə piştaxta, tərəzi və digər avadanlıqlarla yanaşı, tibbi ləvazimatlarla da təmin olunmuşdular.

Yerpulu vermirik

Regionlardan öz məhsullarını satmaq üçün yarmarkaya gətirən satıcılar vəziyyətdən razıdırlarmı? Ağstafadan gələn Taleh Qapçıyev bizi görən kimi “Allah bərəkət versin” deməyə başladı. Taleyi üzünə gülən satıcı yarmarkanın ikinci günündə artıq bütün məhsullarını satmışdı: “150 kilo kartof gətirmişdik. Hamısını ucuz qiymətdən - 80 qəpikdən satdıq. İnşaallah, gələn həftə də yarmarkaya gəlməyi düşünürük. Öz məhsullarımızı satırıq. Yerpulu və tərəzidən istifadə üçün pulu vermirik. Şükür, xeyir elədi”.

Haşimi düyüsü ilə əvvəlki aşların ətrini alacaqsınız

Yarmarkada alıcıların daha çox qarşısına toplaşdığı piştaxtalardan biri də Haşimi düyüsünün satıldığı yer idi. Bu gün “Made in Azerbaijan” brendi ilə xarici bazarlara satılan Lənkəran düyüsünə maraq olduqca böyük idi. Satış rəhbəri Quliyev Namiq deyir ki, düyünün bir neçə sortu - Haşimi, qırmızı düyü, qara düyü var: “1000 ha ərazidə əkirik. 200 kilodan 75 kilosu qalıb. Yəqin ki, günün sonuna kimi hamısı satılar. Qiymətləri isə olduqca münasibdir. Belə ki, Haşimi düyünün kilosu 4 manat, yumru düyü 2 manat, qırmızı düyü isə 2 manat 50 qəpikdir”.

Satıcının sözlərinə görə, Haşimi düyü??nü çox dəmləmək olmaz. Düyünün özünün xüsusi spesifik ətiri var: “Aş dəmləmək üçün düyünün üzərinə iki barmaq su töküb qaynatmaq lazımdır. Qaynayan kimi qazanın qapağını örtüb 15-20 dəq dəm almasını gözləmək lazımdır. Sonra qazanın altını söndürün. 10 dəqiqə qapağını açmayın”.

Təki hər kəs alıb evinə apara bilsin

Müsahibimizlə sağollaşıb, yarmarkadakı gəzintimizə davam etdik.

Bundan başqa, Göygöldən gələn məhsulların qiymətləri ilə tanış olduq. Belə ki, motal pendirin qiyməti 12 manat, pendir 6-7 manat, balın kilosu 25 manata, bəhməzin bankası 10 manat, nehrə yağı 12 manat, kənd çolpası 8 manat, yumurta isə 25 qəpikdir.

Daşkəsən sakini Abbasov Firudin isə yarmarkaya süd məhsulları gətirib. 50 kilo pendirdən yarısını satıb. Məhsulların qalanını isə, ayın 12-də təşkil ediləcək yarmarkada satmağı planlaşdırır. Qiymətlər isə belədir: “Qoyun pendiri 8 manat, nehrə yağı 12 manat, mal pendiri 6 manat, keçi pendiri 7 manat, motal çəçili 5 manat, şor 3 manat 50 qəpikdir. Bununla neçənci dəfədir ki, yarmarkalarda iştirak edirəm. Öz müştərilərim var. Satışdan çox razıyam. Kimin imkanı yoxdursa, güzəşt edirəm. Təki hər kəs alıb evinə apara bilsin”.

Qeyd edək ki, satıcıların, demək olar ki, hər biri pandemiya olmasına baxmayaraq satışlardan razılıq etdilər. Alıcılar isə məhsulların təzəliyi və keyfiyyətini xüsusi vurğuladılar.

Paylaş:

Baxılıb: 734 dəfə