Nəqliyyat sistemində hansı dəyişikliklər olacaq?

Bakı:

27 °C

64 %

9 m/s

Əlaqə

AZ RU EN

Ana səhifə / Xəbər lenti / Nəqliyyat sistemində hansı dəyişikliklər olacaq?

Nəqliyyat sistemində hansı dəyişikliklər olacaq?

09.02.2022 [11:10]

Nicat

Prezident İlham Əliyevin “Bakı şəhərinin inzibati ərazisində nəqliyyat sahəsində idarəetmənin təkmilləşdirilməsi haqqında” imzaladığı Fərmana əsasən, Bakı Nəqliyyat Agentliyi (BNA) publik hüquqi şəxs statusu ilə Bakı Şəhər İcra Hakimiyyəti başçısının tabeliyinə verilib. Eyni fərmanla “Nəqliyyatı İntellektual İdarəetmə Mərkəzi” (NİİM) Məhdud Məsuliyyətli Cəmiyyəti Daxili İşlər Nazirliyinin tabeliyinə keçib.

Sözügedən qərar hansı dəyişikliyə səbəb olacaq? Beynəlxalq təcrübə bu barədə nə deyir?

Məsələ ilə bağlı “Yeni Azərbaycan”a danışan nəqliyyat eksperti, hüquqşünas Ərşad Hüseynov prosesin hələ başlanğıc olduğunu və dəyişikliklərin davam edəcəyini deyib: “Düşünürəm ki, Bakı Nəqliyyat Agentliyinin nizamnaməsi də dəyişilməlidir. Hazırda BNA-da bu tip qurumlara xarakterik olmayan səlahiyyətlər var. Hesab edirəm ki, bu səlahiyyətlər digər qurumlara ötürüləcək. Məsələn, dayanma-durma qaydalarının pozulmasına görə cərimələrin yazılması. Bakı Şəhər İcra Hakimiyyətinin tabeliyində olan və yaxud indiki kimi müstəqil qurum tərəfindən cərimələrin yazılması praktikası özünü doğrultmadı. Xeyli sayda mübahisələr, ciddi problemlər yarandı. BNA-nın fəaliyyətində də ən ciddi narazılıq yaradan məqam məhz bu idi. Cərimələrin yazılması, ümumiyyətlə, qanunsuz parklanmaya nəzarət məsələləri böyük ehtimalla DİN-ə qaytarılacaq və bu qurumun nəzarətində olacaq”.

Dünyanın əksər ölkələrində ictimai nəqliyyatın təşkili barədə təcrübəni bölüşən ekspert BNA kimi qurumun səlahiyyətlərində olmalı məsələləri də sadalayıb: “İctimai nəqliyyatın, taksi fəaliyyətinin, şəhər ərazisində parklanmaların təşkili və idarə olunması və cari infrastrukturla bağlı yol təhlükəsizliyin və müasir mobilliyin təmin edilməsi. Yəni velosiped yollarının təşkili, səkilərin lazımi qaydada saxlanılması və digərləri. Sovet dövrü və müstəqillik illərində Azərbaycanda da təcrübə belə idi. Böyük ehtimalla məhz bu yanaşmaya qayıdılır. BNA-nın yeni səlahiyyətlərində də məhz yuxarıda sadaladıqlarım olacaq. Cərimələrin yazılması və digər yerdə qalan məsələlərə gəldikdə isə, hesab edirəm ki, növbəti fərmanlarla onlar da həllini tapacaq”.

Nəqliyyatı İntellektual İdarəetmə Mərkəzinin Daxili İşlər Nazirliyinin tabeliyinə verilməsini şərh edən Ə.Hüseynov qeyd edib ki, əvvəllər də bu idarənin səlahiyyətlərini DİN həyata keçirib: “NİİM-in səlahiyyətlərinə işıqforların qurulması, onlara nəzarət və yollarda nəqliyyat axınların idarə olunması daxil idi. İndi də Bakıdan başqa, digər ərazilərdə bu səlahiyyətlər DİN tərəfindən həyata keçirilir. Bu məsələdə də əvvəlki yanaşmanın bərpa olunduğunu deyə bilərik”.

BNA-nın Mətbuat xidmətinin rəhbəri Mayis Ağayev isə qurumun gələcək fəaliyyəti ilə bağlı sualları hələ cavablandırmaq istəmədiyini bildirdi: “Sərəncamda hər şey aydın şəkildə öz əksini tapıb. Bu barədə hələ ki, bir şey demək istəmirəm”.

Paylaş:

Baxılıb: 796 dəfə