Məktəblərdə özbaşınalıq...

Bakı:

20 °C

64 %

5 m/s

Əlaqə

AZ RU EN

Ana səhifə / Xəbər lenti / Məktəblərdə özbaşınalıq...

Məktəblərdə özbaşınalıq...

05.02.2022 [10:18]

Təhsil Nazirliyi tədbirlər planı hazırlayır

Günel ABBAS

Bir müddətdir, müəllim və şagird arasında olan münasibətlər sosial media platformalarında müzakirə olunur. İstər şagirdlərin, istərsə də müəllimlərin günahkar olduğu bu məsələlərə yönələn fikirlər də birmənalı deyil. Xüsusilə, tədris prosesindən olan videoların kütləvi şəkildə yayılması məsələni daha ciddi rakursa gətirib. Hadisələrin bu həddə gəlib çatması onu göstərdi ki, artıq bu məsələlərə peşəkarlar və səlahiyyətli orqanlar tərəfindən tənzimlənmələr gəlməlidir.

Mövzu ilə bağlı Təhsil Nazirliyi yanında İctimai Şuranın sədri Günel Səfərova ilə əlaqə saxladıq. Hər kəsə məlumdur ki, yeni yaradılmış bu qurumun əsas vəzifələrindən biri də ayrı-ayrı yerlərdə məktəblərin fəaliyyətinə nəzarət etməkdən ibarətdir.

İctimai Şuranın sədri “Yeni Azərbaycan” qəzetinə açıqlamasında bildirdi ki, İctimai Şura yaranandan bir dəfə ümumi - bütün üzvlər ilə birlikdə, sonradan isə bir neçə dəfə təhsil naziri Emin Əmrullayevlə görüşlər keçirilib, müzakirələr aparılıb: “Nazirlə kommunikasiya məsələsində heç bir problem yaşamamışıq. Şuramız ictimai iştirakçılıq haqqında qanunun verdiyi səlahiyyətlər çərçivəsində fəaliyyət göstərir. Mərkəzi dövlət qurumunun fəaliyyətinə bu sahədə qanunların, hər hansı proqramların, məsələlərin qəbul edilməmişdən əvvəl müzakirəsi, nəzarət funksiyası, ictimaiyyətlə nazirlik arasında körpü rolunu oynamaq, ictimai dinləmələrin keçirilməsi, ictimai rəylərin öyrənilməsi aiddir. Təklif etdiyimiz fəaliyyətlər əsasında öz işlərimizi görürük, ictimai uranın özünün fəaliyyət planı var. Plan 9 üzvümüzün məsuliyyətinə görə bölüşdürülüb və iş bölgüsü əsasında öz fəaliyyətimizi icra edirik. Elə ötən gün biz Təhsil Nazirliyinin də dəstəyi ilə məktəbdə təlim və tərbiyə məsələsində ilk ictimai dinləməni keçirdik. Bu dinləmədə məktəblərdə təhsilin, tədris və idarəetmə prosesinin keyfiyyətinin ölçülməsi məqsədilə keçirilən monitorinqlərin nəticələrinə toxunduq. Həmçinin təhsilin inkişafı ilə əlaqədar bir sıra çağırışlar səsləndirdik”.

G.Səfərova son zamanlar məktəblərdə baş verən müəllim və şagird münasibətlərinə, eləcə də cəmiyyətdə müəllim imicinin zədələnməsinə öz fikirlərini bildirdi. Onun sözlərinə görə, müəllim və şagird münasibətlərinə ictimai müzakirə zamanı da geniş toxunulub: “Ümumiyyətlə, məktəblərdə özbaşınalığın hökm sürməsi anlayışı bir qədər mücərrəddir. Tələbələrin və məktəblilərin uyğun olmayan davranışları heç kimə sirr deyil. Sadəcə, hazırda sosial şəbəkələr vasitəsilə daha çox yayılır və müzakirəyə çevrilir. Təhsil Nazirliyi bunu görməzdən gələrək problemi yox etmə siyasətini güdmür, bu da özlüyündə çox sevindiricidir. İndi bunu necə həll edə bilərik, vəziyyəti necə yaxşılaşdıra bilərik üzərində düşünürük. Məktəb direktorlarının özlərinin doğru davranış istiqamətini seçməsi, müəllimlərin tədris və təlim prosesini necə aparacağını müəyyən etməsi lazımdır”.

Şura sədri vurğuladı ki, uşaqların hər biri fərqlidir və onlar təhsil ocaqlarına müxtəlif ailələrdən gəlirlər: “Onların özünəməxsus emosiyaları, davranışları var. Həm valideyn, həm məktəb, həm də uşaq arasında qurulmuş doğru davranış qaydaları çərçivəsində təlim-tərbiyə aparılsa, heç bir problem olmaz. Bu prosesə biz təhsil ekspertlərini də cəlb edəcəyik. Məsələnin üzərində mütəmadi işləyərək vəziyyəti yaxşılaşdırmağa çalışacağıq. Elə ötən günkü müzakirələr göstərdi ki, bu dinləmələrə həqiqətən ehtiyac var”.

Paylaş:

Baxılıb: 1102 dəfə