İşğaldan azad olunan ərazilərdə də qanvermə aksiyaları təşkil edilib

Bakı:

21 °C

73 %

10 m/s

Əlaqə

AZ RU EN

Ana səhifə / Xəbər lenti / İşğaldan azad olunan ərazilərdə də qanvermə aksiyaları təşkil edilib

İşğaldan azad olunan ərazilərdə də qanvermə aksiyaları təşkil edilib

25.06.2026 [12:36]

"Bu il Aşura günü ilə əlaqədar ölkənin bütün bölgələrində, ümumilikdə 38 məntəqədə qanvermə aksiyaları təşkil olunub".

Yeniazerbaycan.com xəbər verir ki, bu sözləri jurnalistlərə açıqlamasında Dini Qurumlarla İş üzrə Dövlət Komitəsinin sədr müavini Gündüz İsmayılov bildirib.

Sədr müavini əlavə edib ki, artıq işğaldan azad edilmiş ərazilərdə də qanvermə aksiyaları keçirilir.

"Həmin məntəqələr əsasən məscidlər və ziyarətgahlardır. Sevindirici haldır ki, artıq bir neçə ildir işğaldan azad edilmiş ərazilərimizdəki məscidlər də bu təşəbbüsə qoşulub. Belə ki, Ağdam Cümə məscidində və Şuşa şəhərindəki məscidlərdə də qanvermə aksiyaları keçirilir.

Diqqətçəkən məqamlardan biri də odur ki, artıq bir neçə ildir qanvermə aksiyası Azərbaycan İlahiyyat İnstitutunda da təşkil edilir. Bu, təsadüfi deyil. Azərbaycan İlahiyyat İnstitutu ölkəmizdə dini sahə üzrə ixtisaslı mütəxəssislər hazırlayan yeganə ali təhsil müəssisəsidir. Burada gələcəyin din xadimləri, ilahiyyatçıları və dinşünasları yetişir. Bu baxımdan Aşura günü qanvermə aksiyasının məscid və ziyarətgahlarla yanaşı, məhz bu ali təhsil ocağında da keçirilməsi xüsusi məna daşıyır.

Qeyd etmək lazımdır ki, aksiyanın təşkilində Dini Qurumlarla İş üzrə Dövlət Komitəsi, Azərbaycan İlahiyyat İnstitutu, Qafqaz Müsəlmanları İdarəsi, Mənəvi Dəyərlərin Təbliği Fondu, TƏBİB, Səhiyyə Nazirliyi, Azərbaycan Könüllülər İttifaqı, Azərbaycan Qızıl Aypara Cəmiyyəti, Gənclər Fondu, qeyri-hökumət təşkilatları və digər qurumlar yaxından iştirak edir, bu təşəbbüsə öz dəstəklərini verirlər".

Açıqlamada qeyd edilib ki, aksiyanın axşam saatlarına qədər davam etməsi gözlənilir: "Yeni başlamasına baxmayaraq, artıq aksiyaya müraciət edənlərin sayı kifayət qədər çoxdur. Ötən illərin təcrübəsi göstərir ki, Aşura günü ərzində, hətta axşam saatlarına qədər qan vermək istəyənlərin axını davam edir. Biz də günün sonuna qədər Azərbaycan Qan Bankı ilə birlikdə bu aksiyanı davam etdirəcəyik".

Sədr müavini son olaraq vurğulayıb ki, ümumiyyətlə, son illərdə Aşura günü keçirilən qanvermə aksiyalarında iştirak edənlərin sayında davamlı artım müşahidə olunur. Bunun əsas səbəblərindən biri insanların Aşura hadisəsinin mahiyyətini və fəlsəfəsini daha düzgün dərk etməsidir. Bu isə ölkədə aparılan maarifləndirmə işlərinin uğurlu nəticəsidir.

Havar Şəfiyeva

Paylaş:

Baxılıb: 258 dəfə