Hulusi Kılıç: WUF13-ün Azərbaycanda keçirilməsi Türk dünyasının uğurudur

Bakı:

25 °C

56 %

6 m/s

Əlaqə

AZ RU EN

Ana səhifə / Xəbər lenti / Hulusi Kılıç: WUF13-ün Azərbaycanda keçirilməsi Türk dünyasının uğurudur

Hulusi Kılıç: WUF13-ün Azərbaycanda keçirilməsi Türk dünyasının uğurudur

19.05.2026 [17:06]

Azərbaycan qlobal urbanizasiya məsələləri üzrə müzakirələrin əsas mərkəzinə çevrilib. Ümumdünya Şəhərsalma Forumunun 13-cü Sessiyasında (WUF13) dünyanın hər yerindən rekord sayda 45 minə yaxın nümayəndənin iştirak etməsi bu platformanın dialoq və urbanizasiya problemlərinin miqyasının tanınması üçün əhəmiyyətini və aktuallığını göstərir.

Bu barədə Türkiyənin Azərbaycandakı sabiq səfiri və “İMZA” Sosial İnkişafa Dəstək İctimai Birliyinin Türkiyədəki nümayəndəsi Hulusi Kılıç AZƏRTAC-a müsahibəsində bildirib.

O, diqqəti milyonlarla insanı evsiz qoyan mənzil qiymətlərinin artmasına, iqlim şoklarına və münaqişələrə çəkib. “BMT-nin məlumatına görə, hazırda təxminən 2,8 milyard insan qeyri-kafi mənzil şəraitində yaşayır. Onların bir milyarddan çoxu gecəqondu və qeyri-rəsmi yaşayış məntəqələrində məskunlaşıb, təqribən 300 milyonu isə evsizdir. Dünya əhalisinin təxminən 70 faizinin şəhərlərdə yaşayacağı 2050-ci ilə qədər problem daha da kəskin hal ala bilər”, - deyə sabiq səfir bildirib.

“İMZA”nın nümayəndəsi qeyd edib ki, Azərbaycan beynəlxalq tədbirlərin təşkilində geniş təcrübəsi sayəsində WUF13 çərçivəsində dialoqa əhəmiyyətli töhfə verir. O, COP29 iqlim sammitinin Bakıda uğurla keçirilməsini xatırladıb.

H. Kılıç əlavə edib: “Bakının regionda WUF forumlarına ev sahibliyi edən ilk şəhər olması Azərbaycanın nüfuzunun artmasının daha bir əlamətidir və bu, bütün Türk dünyasının uğurudur”.

O, Prezident İlham Əliyevin WUF13-ün açılış mərasimindəki çıxışına diqqət yetirib. Kılıç qeyd edib ki, Azərbaycan liderinin respublikanın tarixi və memarlıq irsinə göstərdiyi diqqət, dövlət başçısının Bakıda keçmişlə bu günün ahəngdar sintezi, qətiyyətli şəhərsalma qərarları, Ağdam, Zəngilan və Xankəndində keçirilən milli şəhərsalma forumları və bir çox digər məsələlər haqqında fikirləri xüsusilə diqqətəlayiqdir.

Mövzunu davam etdirən H. Kılıç, həmçinin Azərbaycanın işğaldan azad edilmiş ərazilərində həyata keçirilən genişmiqyaslı layihə və proqramları tərifləyib, ətraf mühitin qorunması üzrə fəaliyyətin vurğulayıb.

“Əminəm ki, WUF13 Bakı ilə BMT arasında əməkdaşlığı keyfiyyətcə yeni səviyyəyə qaldırıb. Ümumdünya Şəhərsalma Forumu Azərbaycanın nailiyyətlərini nümayiş etdirmək üçün fürsətdir. İnanıram ki, paytaxtda və respublikanın bölgələrində həyata keçirilən bir çox layihə digər ölkələrdə şəhərsalma üçün model kimi qəbul ediləcək”, - deyə Türkiyənin sabiq səfiri sözlərini yekunlaşdırıb.

Paylaş:

Baxılıb: 364 dəfə