“Çətin suallar məni daha çox motivasiya edir” – Olimpiada finalçısı ilə MÜSAHİBƏ

Bakı:

29 °C

58 %

4 m/s

Əlaqə

AZ RU EN

Ana səhifə / Xəbər lenti / “Çətin suallar məni daha çox motivasiya edir” – Olimpiada finalçısı ilə MÜSAHİBƏ

“Çətin suallar məni daha çox motivasiya edir” – Olimpiada finalçısı ilə MÜSAHİBƏ

27.02.2026 [17:58]

Aşağı siniflərdən başladığı olimpiada yolunda artıq bir neçə beynəlxalq yarışda ölkəmizi təmsil edən gənc şagird qazandığı medallarla diqqət çəkir. O deyir ki, final mərhələsində çıxış etmək təkcə şəxsi uğur deyil, həm də böyük məsuliyyətdir. Taylandda keçirilən “Math Challenge” finalından bürünc medalla qayıdan müsahibimiz Ayxan Abbaslının uğur yolundan, motivasiyasından və gələcək planlarından danışdıq.

– Özünü oxuculara necə təqdim edərdin? Olimpiada yolun necə başladı?
– Olimpiadalara aşağı siniflərdən başlamışam. Bu yolda müəllimlərimin böyük dəstəyi olub. Onların təşviqi və inamı sayəsində ilk addımlarımı atdım və zamanla bu sahədə daha da irəlilədim.

– İlk beynəlxalq yarış təcrübən hansı olub və həmin an hansı hissləri yaşamısan?
– İlk beynəlxalq yarışım FISO olub. Finalda medal qazandığımı eşidəndə çox sevincli və duyğulu idim. İlk dəfə idi ki, belə bir hiss yaşayırdım və bu mənim üçün unudulmaz an oldu.

– Final mərhələsində ölkəni təmsil etmək sənə hansı məsuliyyəti yükləyir?
– Finalda ölkəmi təmsil etmək böyük məsuliyyətdir. Çünki artıq təkcə özümü deyil, Azərbaycanı təmsil edirəm. Bu isə daha diqqətli və məsuliyyətli olmağı tələb edir.

– Qazandığın medallar arasında sənin üçün ən yaddaqalanı hansıdır və niyə?
– Mənim üçün ən yaddaqalan medal “Math Challenge” finalında qazandığım bürünc medaldır. Yarış çox çətin idi və yer tuta bilməyəcəyimi düşünürdüm. Amma Taylanddan Bakıya medalla qayıtmaq mənim üçün böyük uğur oldu.

– Olimpiadalara hazırlaşarkən hansı üsullardan istifadə edirsən? Günlük çalışma rejimin necədir?
– Əslində xüsusi hazırlıq etmirəm. Daha çox öz riyazi bilik və bacarığıma güvənirəm və yarışlarda bu biliklərlə iştirak edirəm.

– Çətin suallarla qarşılaşanda motivasiyanı necə qoruyursan?
– Çətin sualları görmək məni daha çox həvəsləndirir. Çünki belə sualları həll edəndə daha çox motivasiya oluram və özümə inamım artır.

– Beynəlxalq yarışlar sənə yalnız akademik deyil, şəxsi inkişaf baxımından nə qazandırıb?
– Bu yarışlar mənə sosiallaşmaq imkanı verib. Xaricdən dostlar qazanmışam. Həmçinin özümü daha yaxşı ifadə etməyi və fərqli mühitlərdə ünsiyyət qurmağı öyrənmişəm.

– Məktəb dərsləri ilə olimpiada hazırlığını necə balanslaşdırırsan?
– Məktəb dərsləri olimpiada üçün çox vacibdir. Çünki təməl biliklər məhz məktəbdə formalaşır. Bu baza olmadan uğur qazanmaq çətindir.

– Gələcək planların nələrdir? Hansı sahədə ixtisaslaşmaq istəyirsən?
– Gələcək planım Türkiyədə Ankara Universitetində tibb təhsili almaqdır. Daha sonra isə təhsilimi ABŞ-da, Nyu-York şəhərində davam etdirmək istəyirəm.

– Sənin kimi beynəlxalq olimpiadalara qatılmaq istəyən şagirdlərə hansı tövsiyələri verərdin?
– Ən vacib məsləhətim budur ki, daim çalışsınlar. Medal qazana bilməsələr belə ruhdan düşməsinlər və səhvlərindən nəticə çıxarsınlar. Uğur davamlı zəhmətin nəticəsidir.

Paylaş:

Baxılıb: 383 dəfə