“Ağıllı şəhər, yaşıl gələcək” forumu uğurla başa çatdı

Bakı:

27 °C

51 %

5 m/s

Əlaqə

AZ RU EN

Ana səhifə / Xəbər lenti / “Ağıllı şəhər, yaşıl gələcək” forumu uğurla başa çatdı

“Ağıllı şəhər, yaşıl gələcək” forumu uğurla başa çatdı

19.11.2025 [17:11]

Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin dəstəyi, “Qarabağın Tərəqqisi Naminə” İctimai Birliyinin təşkilatçılığı və “Azərbaycan İnnovasiya Mərkəzi”nin tərəfdaşlığı ilə “Ağıllı Şəhər, Yaşıl Gələcək – WUF2026-ya doğru” layihəsi çərçivəsində “Ağıllı şəhər, yaşıl gələcək” forumu keçirilib.

Forum “İnsan mərkəzli ağıllı şəhərlər”, “Ağıllı nəqliyyat və dayanıqlı mobillik” və “Alternativ enerji – yaşıl gələcəyin hərəkətverici qüvvəsi” mövzularını əhatə edən çoxşaxəli panellər formatında təşkil olunub.

Tədbir çərçivəsində Azərbaycanın ağıllı şəhər həllərinə keçid prosesi, yaşıl enerji və mobillik sistemlərinin modernləşdirilməsi, startap ekosisteminin gücləndirilməsi, şəhərsalma planlaşdırılması, rəqəmsal infrastrukturun effektiv idarə olunması və enerji transformasiyasının strateji istiqamətləri üzrə geniş müzakirələr aparılıb.

“Qarabağın Tərəqqisi Naminə” İB-nin sədri Şəbnəm Səfərovanın moderatorluğu ilə keçirilən ilk paneldə “İnsan mərkəzli ağıllı şəhərlər: Texnologiya insan üçün necə işləyir?” mövzusu müzakirə edilib.

Paneldə Türkiyənin “Smart City and Partners” şirkətinin təsisçisi Anıl Sevinç peyk datalarının fövqəladə halların proqnozlaşdırılması, şəhərsalma və resurs idarəetməsində tətbiqi barədə məlumat verib. O, həmçinin Azərbaycanın su hövzələri və kənd təsərrüfatına dair apardığı analitik araşdırmaları təqdim edib.

AR Şəhərsalma və Arxitektura Komitəsinin nümayəndəsi Şahnaz Bədəlova şəhərlərin baş planlarının hazırlanması prosesləri, mövcud çətinliklər və onların həlli istiqamətində atılan addımlar haqqında dəyərli fikirlərini bölüşüb.

İRİA-nın Startap ekosisteminə dəstək şöbəsinin rəhbəri Camal Ağayev isə startapların hazırki statusu, bu sahədə olan əngəllər və ekosistemin inkişafı üçün nəzərdə tutulmuş instutsional dəyişikliklər və proqramlar barədə məlumat verib.

Forumun növbəti, “Ağıllı nəqliyyat və dayanıqlı mobillik: Hərəkətdə olan şəhərlər” mövzusunda olan paneli AzTU-nun Nəqliyyat texnikası və idarəetmə texnologiyaları kafedrasının müəllimi İltifat Məmmədlinin moderatorluğu ilə davam edib.

Paneldə Türkiyənin “Büyütech” şirkətinin system mühəndisliyi üzrə rəhbəri Emir Mehdi Sade böyük verilənlərin nəqliyyat idarəetməsində və mobillikdə tətbiqi, dataya əsaslanan qərarvermə modelləri barədə iştirakçıları məlumatlaşdırıb.

ETSN-in Rəqəmsal Ekologiya İnformasiya Sistemi İdarəetmə qrupunun rəhbəri Hüseyn Həsənov isə nəqliyyatın ekoloji təsirləri, ekoloji monitorinq və şəhər mobilliyinin ekosistemlə əlaqəsi barədə geniş təqdimatla çıxış edib.

Azərbaycan Avtomobil Yolları Dövlət Agentliyinin (AAYDA) Nəqliyyat şöbəsinin rəhbəri Mürşüd Mehdiyev yol infrastrukturu, ağıllı yol idarəetmə mexanizmləri, təhlükəsizlik və nəqliyyat axınının optimallaşdırılması istiqamətində görülən işlərdən danışıb.

“Ağıllı Şəhər və Yaşıl Gələcək – WUF2026-ya doğru” layihəsinin rəhbəri Günel Qurbanovanın moderatorluğu ilə baş tutan “Alternativ enerji: Yaşıl gələcəyin hərəkətverici qüvvəsi” mövzulu sonuncu paneldə Bakı Dövlət Universiteti rektorunun Keyfiyyət təminatı üzrə müşaviri Asiman İlyasov, alternativ enerji təminatı üzrə ölkənin aparıcı şirkətlərindən biri olan “Helind Enerji” MMC-nin təsisçisi Tamerlan Quliyev, ADNSU rektorunun müşaviri və ADA universitetinin elektrik və elektronika üzrə baş müəllimi Orxan Kərimzadə çıxış ediblər.

Asiman İlyasov Davamlı İnkişaf Məqsədlərinə xidmət edən sahələrin ali təhsil proqramlarına inteqrasiyası, ölkələrin yaşıl transformasiyası üzrə beynəlxalq reytinq və keyfiyyət monitorinqi mexanizmlərindən danışıb.

Tamerlan Quliyev iştirakçıları hazırda ölkədə alternativ enerji sahəsində tətbiq edilən yanaşmalar, mövcud layihələr və yerli həllər barədə məlumatlandırıb.

Orxan Kərimzadə alternativ enerji texnologiyalarının elmi əsasları, mikroenerji sistemləri və Azərbaycanın alternativ enerji potensialı barədə geniş məruzə ilə çıxış edib.

Beləliklə, dövlət qurumlarının nümayəndələri, texnologiya mütəxəssisləri, startap ekosisteminin liderləri, şəhərsalma ekspertləri, özəl sektor təmsilçiləri, tələbələr və akademik sahə nümayəndələrinin iştirakı ilə keçirilən tədbirin sonunda iştirakçılar ağıllı şəhər və yaşıl enerji sahəsində dövlət–özəl–ictimai tərəfdaşlığın gücləndirilməsinin vacibliyini, innovasiya və texnologiya əsaslı yanaşmaların genişləndirilməsinin isə Azərbaycanın 2030 və 2040 hədəfləri üçün xüsusi əhəmiyyət daşıdığını vurğulayıblar.

“Ağıllı Şəhər, Yaşıl Gələcək – WUF2026-ya doğru” layihəsi çərçivəsində əldə edilən tövsiyələr və nəticələr yaxın günlərdə yekun sənəd şəklində ictimaiyyətə təqdim olunacaq.

Paylaş:

Baxılıb: 614 dəfə