Mikromobillik infrastrukturunun inkişafına dair ictimai dinləmə keçirilib

Bakı:

30 °C

58 %

5 m/s

Əlaqə

AZ RU EN

Ana səhifə / Xəbər lenti / Mikromobillik infrastrukturunun inkişafına dair ictimai dinləmə keçirilib

Mikromobillik infrastrukturunun inkişafına dair ictimai dinləmə keçirilib

31.10.2024 [20:16]

Azərbaycan Yerüstü Nəqliyyat Agentliyində (AYNA) mobilliyin transformasiyası proqramı çərçivəsində mikromobillik infrastrukturunun inkişafı mövzusunda növbəti ictimai dinləmə təşkil olunub.

AZƏRTAC xəbər verir ki, agentliyin mütəxəssisləri, ekspertlər və media nümayəndələrinin iştirak etdiyi tədbir mikromobillik infrastrukturunun qurulması, inkişafı və təşviqi üzrə görülmüş işlər və qarşıda duran vəzifələrə həsr olunub.

Tədbirdə AYNA-nın mikromobillik şöbəsinin müdiri Coşqun Məmmədov təqdimatla çıxış edərək bu sahədə görülən işlərin əsas istiqamətləri barədə məlumat verib, infrastrukturun qurulması prosesində beynəlxalq təcrübənin nəzərə alındığını qeyd edib. Bildirilib ki, konseptual plan az maliyyə xərcləri ilə qısa müddətdə mövcud yol infrastrukturunda mikromobillik zolaqlarının yaradılmasını nəzərdə tutur: “AYNA tərəfindən mikromobillik vasitələrinin təşviqi, bununla bağlı infrastrukturun qurulması istiqamətində davamlı tədbirlər həyata keçirilir. Bakı şəhərində mikromobillik zolaqları təxminən 32 kilometrə qədər genişləndirilib, əhalinin mikromobillik vasitələrindən təhlükəsiz və əlverişli formada istifadəsi üçün zolaqların əlaqəliliyi təmin edilir. Mikromobillik şəbəkəsinin genişləndirilməsi nəzərdə tutulur”.

C.Məmmədov qeyd edib ki, hazırda kiçik elektrik nəqliyyat vasitələrinə (KENV) olan maraq artmaqdadır.

“Odur ki, təhlükəsiz hərəkət üçün bu nəqliyyat vasitələri üzrə müəyyən olunmuş qaydalara əməl etmək vacibdir. Qaydalara əsasən, bir KENV-i yalnız bir şəxs idarə edə bilər, təhlükəsizlik baxımından 14 yaşdan aşağı şəxslərə KENV idarə etmək qadağandır. Bundan başqa, xidmətin təkmilləşdirilməsi məqsədilə operatorlarla daimi görüşlər keçirilir, xidmət səviyyəsinin artırılması və çatışmazlıqların aradan qaldırılması üzrə tapşırıqlar verilir, gələcək planlamalar üçün statistik məlumatlar toplanır”, - deyə şöbə müdiri əlavə edib.

Son olaraq qeyd olunub ki, AYNA mikromobilliyin təşviqi işinə də xüsusi diqqət göstərir. Məlumatlandırma çərçivəsində mikromobilliyin əhəmiyyəti haqqında mütəmadi maarifləndirmə aparılır, tədbirlər, operatorlarla birgə mikromobillik vasitələrinin istifadə qaydalarına dair ödənişsiz təlimlər, eləcə də, müxtəlif ictimai təşkilatlarla birlikdə maraq qrupları, peşəkar və həvəskar velosipedçilər üçün velosiped turları təşkil edilir. Peşəkar velosipedçilər və digər maraqlı tərəflərlə davamlı əməkdaşlıq həyata keçirilir, əhali arasında mikromobilliklə bağlı rəy sorğuları təşkil olunur.

Paylaş:

Baxılıb: 597 dəfə