“Azərbaycandakı seçkilər regionda sabitliyi və demokratiyanı gücləndirir”

Bakı:

26 °C

65 %

5 m/s

Əlaqə

AZ RU EN

Ana səhifə / Xəbər lenti / “Azərbaycandakı seçkilər regionda sabitliyi və demokratiyanı gücləndirir”

“Azərbaycandakı seçkilər regionda sabitliyi və demokratiyanı gücləndirir”

16.08.2024 [11:04]

“Azərbaycanda keçiriləcək parlament seçkilərini tarixi hadisə hesab etmək olar. Çünki bu, Azərbaycanın bütün ərazisində keçiriləcək ilk parlament seçkiləridir və özündə həm də böyük simvolik əhəmiyyət daşıyır. Bu seçkilər ölkənin tarixində mühüm dönüş nöqtələrindən biridir”.

Bunu “Seçki 2024 ” Müstəqil Media Mərkəzinə açıqlamasında Küveyt və Ərəb Elektron Media Birliklərinin İdarə Heyətinin sədri Feysəl Xəlifə Əl-Səvvağ deyib.

O bildirib ki, işğaldan azad edilmiş ərazilərdə seçkilərin təşkili Azərbaycanın suverenliyini möhkəmləndirən, milli birliyini gücləndirən mühüm addımdır: “İllərlə davam edən münaqişədən sonra evlərinə qayıdan vətəndaşlar indi seçmək və seçilmək də daxil olmaqla bütün hüquqlarından öz doğma torpaqlarında istifadə edə bilirlər. Bu, təkcə demokratiyanın qələbəsi deyil, həm də bu ərazilərə normal həyatın qayıtmasının təsdiqidir”.

Feysəl Xəlifə Əl-Səvvağ bu seçkilərin Azərbaycanın dost ölkələri üçün də əhəmiyyətli olduğunu vurğulayıb.

“Azərbaycanda keçiriləcək parlament seçkiləri regionda siyasi sabitliyə inamı gücləndirir. Azərbaycanın ədalətli və əhatəli seçkilərin keçirilməsində əldə etdiyi uğurlar digər ölkələri də onunla iqtisadi və siyasi əlaqələrini gücləndirməyə sövq edir. Bundan əlavə, dost ölkələr bu addımı Cənubi Qafqazda təhlükəsizlik və sabitliyin gücləndirilməsinin, regionda demokratiyanın tərəqqisinin müsbət əlaməti hesab edirlər. Bu seçkiləri beynəlxalq və regional əməkdaşlığı gücləndirmək üçün bir fürsət kimi də qiymətləndirmək olar. Çünki Azərbaycanda seçki prosesinin uğuru beynəlxalq aləmdə onun şəffaflıq və dürüstlük əsasında demokratik tədbirlər təşkil etməyə qadir olan sabit ölkə imicini artırır. Bu amil xarici sərmayələrin və iqtisadi tərəfdaşlığın artmasına səbəb ola bilər, çünki investorlar və ticarət tərəfdaşları qərarların qəbulunda siyasi sabitliyə mühüm amil kimi baxırlar” – küveytli mütəxəssis bildirib.

Feysəl Xəlifə Əl-Səvvağ əlavə edib ki, seçki prosesi geosiyasi müstəvidə milli suverenliyin möhkəmləndirilməsinin və siyasi müstəqilliyin gücləndirilməsinin göstəricisidir: “Azərbaycana dost ölkələr bu seçkilərin uğurunu regionda sabitliyin və sülhün təşviqinə yönəlmiş siyasətlərinə dəstək kimi qiymətləndirə bilərlər. Seçkilər həm də regionun digər ölkələr üçün də demokratiya və qanunun aliliyinin möhkəmləndirilməsi üçün stimulverici nümunə ola, ümumilikdə regionun inkişafına töhfə verə bilər. Bu baxımdan, Azərbaycanda keçirilən parlament seçkiləri təkcə ümummilli bir hadisə deyil, daha çox regional və beynəlxalq miqyaslı bir hadisədir. Aydındır ki, Azərbaycan sabitlik, inkişaf və demokratiya yolu ilə irəliləyir və bu, təkcə Azərbaycan xalqının deyil, həm də dost dövlətlərin və beynəlxalq tərəfdaşların xeyrinədir”.