Azərbaycanda ilk dəfə...

Bakı:

30 °C

58 %

5 m/s

Əlaqə

AZ RU EN

Ana səhifə / Xəbər lenti / Azərbaycanda ilk dəfə...

Azərbaycanda ilk dəfə...

24.04.2024 [11:00]

Animasiya rejissorluğu tədris olunur

Hazırda Azərbaycanın kinematoqrafiya sənayesi animasiya sektoru üzrə filmlərin istehsalını planlaşdırır. Bu sahə müasir rəqəmsal texnologiyaların inkişafı, süni intellektin istiqaməti ilə bağlıdır və eyni zamanda, animasiya sektoru gənclərin maraq dairəsindədir. Ölkəmizdə bu istiqamətdə yeni yaradıcılıq potensialının inkişafı zəruridir.

Animasiyada obrazın, məkanın və zamanın rəssam və rejissor tərəfindən yaradıldığına görə, bu sənət növü böyük yaradıcılıq azadlığına malikdir. Buna görə də ilk növbədə kinematoqrafiyada kamera ilə çəkilə bilməyən bir hadisəni təsvir etmək lazım gəldikdə animasiyadan istifadə olunur. Fantastik dünyanı, orada yaşayan personajları, qəhrəmanlarının daxili dünyasını, fiziki dünyanın gizli qalmış prosesləri, tarixi artefaktları animasiya vizual olaraq göstərmək qabiliyyətinə malikdir. Personajlarının psixoloji vəziyyətlərinin nüanslarını göstərməyə, reallıqda olmayan obyektləri və dünyaları yaradaraq müəyyən atmosfer yaratmağa kömək edir. Bu reallığı yaşamaq, dərk etmək, öyrənmək üçün animasiya yeganə yoldur.

Bütün bunları nəzərə alaraq ölkəmizin əsas yaradıcılıq yönümlü qocaman ali təhsil ocağı olan Azərbaycan Dövlət Mədəniyyət və İncəsənət Universiteti 2023-2024-cü tədris ilindən etibarən magistratura səviyyəsində “Rejissorluq” ixtisası üzrə “Animasiya rejissoru” ixtisaslaşması tədris olunur. Hələ ki, həmin ixtisaslaşmada yalnız bir tələbə - Gülşanə Mahmudovanın təhsil almasına baxmayaraq, Kino - televiziya sənətləri kafedrasının müdiri dosent Elnur Mehdiyev deyir ki, yaxın gələcəkdə “Animasiya rejissoru” ixtisaslaşmasının bakalavr səviyyəsində də açılması gözlənilir.

“Animasiya hərəkət deməkdir. Personajın hərəkətinin canlandırılması, yəni animasiya bizim universitetin Rəssamlıq fakültəsində animasiya tədris olunub. Ancaq hərəkətin nəyə xidmət etməsi, yəni süjet xəttinin verilməsi artıq rejissorluqdur. Bu, yeni istiqamət və çox maraqlı sahədir. Bu gün bütün dünyada xüsusən gənclərin bu sahəyə marağı getdikcə artmaqdadır.

Mən Rusiyada, Qazaxıstanda ezamiyyətdə olarkən, onların incəsənət universitetlərində gördüm ki, rejissorluq üç sahədə tədris olunur: televiziya rejissoru, kino rejissoru və animasiya rejissoru. Bununla bağlı onların çox böyük studiyaları var. Tələbələr üçün çox yaxşı şərait yaradılıb. Mən inanıram ki, bizim tələbələrimiz üçün də gözəl şərait yaradılacaq. Hətta indidən müəyyən qədər artıq yaradılıb. Sevindirici haldır ki, hazırda bizim tələbələrimiz Autodesk Maya proqramı kimi çətin bir proqramı mənimsəyiblər. İki komputerimiz bu proqramı dəstəkləyir. İnanıram ki, yaxın gələcəkdə universitetimiz bu istiqamətdə apardığı işlərini daha da genişləndirəcək və lazımi avadanlıqlar yenə də cəlb olunacaq.

Bu ixtisasda dərs deyən müəllimimiz Anar Verdiyev Koreyada təhsil alıb. O, gənc kadr olmasına baxmayaraq, sevindirici haldır ki, üç dildə- Azərbaycan, rus və ingilis dillərində akademik səviyyədə tədris apara bilir. Biz ilk dəfə Anar müəllimlə görüşəndə və ona bu ixtisasda dərs deməyi təklif edəndə dedik ki, Azərbaycanda animasiya üzrə kino sənayesinə xüsusi yer ayrılmalıdır və biz öz bilik və bacarıqlarımızı bu sahədə gənc nəsillərə ötürməliyik. Biz inanırıq ki, bu səylərimiz nəticəsində çox qısa zamanda bu sahə daha da inkişaf edəcək. Bizə bunu deməyə cəmi 1 illik tədrisimizin nəticələri əsas verir. Təbii ki, animasiya rejissorluğunun cəmi 3 semestrdə keçirilməsi natamamdır. Bu ixtisası fundamental səviyyədə öyrənmək üçün ən azı altı semestr keçirilməlidir. Çünki burada xırdalıqlar çoxdur. Amma hazırda magistratura səviyyəsində təhsil alan tələbəmiz tamamilə sıfırdan başlamağına baxmayaraq, cəmi iki semestrə bir dəqiqəlik süjet təqdim etməlidir. Hələ ikinci semestr bitmədiyi halda, onun dramaturgiyası yazılıb, baş verən hadisələr incələnib. Bu, nailiyyətdir”.

Şahanə MÜŞFİQ

Paylaş:

Baxılıb: 784 dəfə