Ölkəmizin üstünlüyü

Bakı:

26 °C

52 %

3 m/s

Əlaqə

AZ RU EN

Ana səhifə / YAP xəbərləri / Ölkəmizin üstünlüyü

Ölkəmizin üstünlüyü

15.01.2024 [15:31]

10 yanvar tarixində yerli televiziya kanallarına müsahibəsində Prezident İlham Əliyev bir çox mühüm mövzulara aydınlıq gətirərək görülmüş işləri təhlil etdi, həmçinin ölkəmizin gələcək planlarından bəhs etdi. Ölkə başçısı müsahibəsində vurğuladı ki, Azərbaycan bu gün dünyada, xüsusilə dünyanın enerji məkanında gedən proseslərdən geridə qalmamalıdır. Belə ki, bir çox aparıcı keçmiş neft şirkəti hətta öz adlarını da dəyişdirib enerji şirkətlərinə çevirirlər. Bu isə ondan xəbər verir ki, getdikcə yaşıl enerjiyə tələbat artacaq. Neft-qaz sahəsində fəaliyyət göstərən şirkətlərin investisiya portfelində əgər yaşıl enerji layihələri olmasa, onlar böyük çətinliklərlə üzləşəcəklər. Bu mövzuda danışarkən Prezident İlham Əliyev bildirdi ki, Beynəlxalq Maliyyə Korporasiyası ölkəmizin Xəzərdəki bərpaolunan enerji potensialını 157 min meqavat həcmində təsdiqləyib. Ona görə indi enerji sahəsində bu istiqamət prioritetdir. Artıq keçən ilin oktyabr ayında birinci böyük Günəş Elektrik Stansiyası istismara verildi və qrafik üzrə biz yaxın üç-dörd ilə bərpaedilən enerji növlərinin həcmini təqribən 3-4 min meqavat səviyyəsinə çatdıracağıq. İndi imzalanmış kontraktlar və anlaşma memorandumları 10 min meqavat istehsalı nəzərdə tutur.

Ölkə başçısı Azərbaycanın qaz ixracından bəhs edərək vurğuladı ki, Serbiya Azərbaycan qazını alan sayca səkkizinci ölkədir. Bu vaxta qədər Gürcüstan, Türkiyə, Yunanıstan, Bolqarıstan, İtaliya, Rumıniya, Macarıstan artıq Azərbaycanın qaz sisteminə qoşulub, müxtəlif interkonnektorlar da yaradılıb və bütün bu interkonnektorların təkanverici qüvvəsi Cənub Qaz Dəhlizidir.

Prezident İlham Əliyev bildirdi ki, Azərbaycan qazına tələbat var və bu tələbat artacaq. Həmçinin ölkəmizin resursları da var, belə ki, “Şahdəniz” qaz yatağı dünyanın ən böyük qaz-kondensat yatağıdır. Bu il artıq 1,5 milyard kubmetr qaz “Abşeron” qaz yatağından çıxarılacaq. Bu, əlavə resursdur. Ölkə başçısı onu da qeyd etdi ki, bu ilin sonuna - dekabr ayına qədər “Azəri-Çıraq-Günəşli” yatağında “Dərin qaz” adlandırılan layihə çərçivəsində də ilk qaz əldə olunacaq. Eyni zamanda, “Abşeron”da illik hasilatın həcmi 5 milyard kubmetr təşkil edəcək. Ondan başqa, “Şəfəq”, “Asiman”, “Ümid”, “Babək”, “Naxçıvan”, “Qarabağ” - bütün bu yataqlarda bu gün hazırlığa doğru işlər gedir və onların da resurs bazası kifayət qədər böyükdür. Azərbaycanda gələcəkdə yeni qaz infrastrukturunun yaradılması məsələsinə də baxıla bilər.

Yerli televiziya kanallarına müsahibəsində Prezident İlham Əliyev xatırlatdı ki, Avropa Komissiyası Azərbaycanı etibarlı tərəfdaş adlandırıb. Avropa İttifaqının Enerji Komissiyası isə Azərbaycanı Panavropa qaz təchizatçısı adlandırmışdır və onlar tam haqlıdır. Bizim Avropa məkanına göndərdiyimiz qazın həcmi çox da olmasa, təqribən 12 milyard kubmetrə yaxındır. Qaz amili enerji təhlükəsizliyi nöqteyi-nəzərindən ön plandadır. Ölkəmizin üstünlüyü məhz ondadır ki, Azərbaycan böyük yatırım qoyaraq müasir qazpaylayıcı şəbəkə yaradıb. Ölkəmizin resurs bazası kifayət qədər böyükdür və artacaq. Avropada tələbat da mütləq artacaq. Çünki onlar nə qədər yaşıl enerjiyə keçid etmək istəsələr, yenə də təbii qaza ehtiyacları olacaq. Ölkə başçısı onu da vurğuladı ki, yaşıl enerjini ixrac etməklə ölkəmizin önəmi daha da artacaq. Yaşıl enerji dəhlizi, o cümlədən Qara dənizin altı ilə çəkiləcək kabel də Azərbaycan resurslarına hesablanıb. Bir sözlə, 100 il bundan sonra da Azərbaycan tərəfdaşlar üçün önəmli tərəfdaş olacaq.

Əlişah Rəcəbov

YAP Ağdaş rayon təşkilatının sədri

Paylaş:

Baxılıb: 564 dəfə