Ölkəmizin iqtisadi uğurlarinin təqdimatı

Bakı:

29 °C

43 %

5 m/s

Əlaqə

AZ RU EN

Ana səhifə / YAP xəbərləri / Ölkəmizin iqtisadi uğurlarinin təqdimatı

Ölkəmizin iqtisadi uğurlarinin təqdimatı

15.11.2023 [11:06]

1985-ci ildə İran, Pakistan və Türkiyə tərəfindən yaradılan İqtisadi Əməkdaşlıq Təşkilatı, üzv ölkələrin Xarici İşlər Nazirləri Şurasından ibarətdir. Şura təşkilatın fəaliyyət siyasətini, Regional Planlaşdırma Şurasını, Müavinlər Şurasını müəyyən edir. Mənzil-qərargahı Tehranda yerləşən Müavinlər Şurası İƏT ölkələri səfirlərindən ibarətdir.

Cari il noyabrın 9-da Özbəkistan Respublikasının paytaxtı Daşkənd şəhərində İqtisadi Əməkdaşlıq Təşkilatının 16-cı Zirvə toplantısı keçirilib. Tədbirdə Azərbaycan Respublikasının Prezidenti İlham Əliyev iştirak edib.

Dövlətimizin başçısı tədbirdə çıxış edərək Azərbaycan və Özbəkistan arasında strateji tərəfdaşlığın uğurla inkişaf etdiyini, ötən ildə Özbəkistana bir dövlət səfəri və iki işgüzar səfər etdiyini vurğulayıb. Zirvə toplantısında cənab İlham Əliyev bildirdi ki, yenidən Prezident seçildikdən sonra Şavkat Mirziyoyevin ilk dövlət səfərini ölkəmizə etməsi, iki ölkə arasında qardaşlıq münasibətlərinin nə dərəcədə dərin olmasını bir daha nümayiş etdirdirir.

“İqtisadi Əməkdaşlıq Təşkilatının üzvü kimi Azərbaycan təşkilatın işində fəal iştirak edir ” - deyən Dövlətimizin başçısı Azərbaycan ECO-nun Təmiz Enerji Mərkəzinin ev sahibi kimi rəsmi olaraq təsdiqlədiyini və Azərbaycanın nəqliyyat və logistika infrastrukturunun ECO-nun üzv dövlətləri üçün açıq olduğunu da toplantı iştirakçılarının diqqətinə çatdırdı.

Azərbaycanda enerji sektorunun hazırki vəziyyətindən də söz açan Prezident İlham Əliyev bildirib: “Azərbaycanın neft və qaz ehtiyatları ilə zəngin olmasına baxmayaraq, bərpaolunan enerji sektorunun inkişafına da xüsusi diqqət yetirilir. Azərbaycanın bərpaolunan enerji potensialı quruda 37 qiqavat külək və günəş enerjisi, Xəzər dənizinin ölkəmizə məxsus sektorunda isə 157 qiqavat külək enerjisi təşkil edir. Azərbaycan yaxın gələcəkdə yaşıl və hidrogen enerjisinin ixracatçısına çevriləcək. Dünyanın aparıcı yaşıl enerji şirkətləri olan xarici investorlarla imzaladığımız sazişlərə və anlaşma memorandumlarına əsasən, qarşıdakı illərdə Azərbaycanda istehsal ediləcək bərpaolunan enerji 10 qiqavata çatacaq. Azad olunmuş Qarabağda və Şərqi Zəngəzurda 2021-2023-cü illər ərzində 170 meqavat gücündə hidroelektrik stansiyalar istifadəyə verilib. 2024-cü ilin sonuna qədər bu rəqəm 270 meqavata çatacaq. Bir neçə ildən sonra erməni işğalından azad edilmiş ərazilərdə hidroelektrik stansiyaların ümumi gücü 500 meqavat təşkil edəcək.”

Təşkilata üzv ölkələrin Azərbaycanın haqq işinə daim öz dəstəklərini göstərdiklərini vurğulayan cənab İlham Əliyev bildirdi ki, təşkilata üzv ölkələr Azərbaycanın haqq işinə daim öz dəstəklərini göstərib. Türkiyə və Pakistanın Azərbaycana hərtərəfli dəstəyi özünü bütün dövrlərdə açıq şəkildə büruzə verib. Bu iki ölkənin Vətən müharibəsi dövründə Azərbaycana siyasi və mənəvi dəstəyi açıq və birmənalı olub. Həmçinin 2021-ci ildə Türkmənistanda keçirilmiş Zirvə Toplantısının sonunda qəbul edilən “Aşqabad fəaliyyət konsensusu” adlı yekun bəyannamə özündə Azərbaycanın maraqlarına birbaşa cavab verən müddəaları da ehtiva edir.

Dövlətimizin başçısı çıxışında Azərbaycan-Ermənistan münaqişəsinə də toxunaraq bir daha Azərbaycan həqiqətlərini, 30 il davam edən işğal dövrünün reallıqlarının toplantı iştirakçılarının diqqətinə çatdırıb. Cənab Prezident bildirib ki, Ermənistan Azərbaycanın 20 faizə yaxın ərazisini təqribən 30 il ərzində işğal altında saxlamışdır. Ermənistanın həyata keçirdiyi etnik təmizləmə siyasəti nəticəsində bir milyondan artıq azərbaycanlı öz dədə-baba yurdlarından qovulmuş, qaçqın və məcburi köçkünə çevrilmişdir. İşğal dövründə Ermənistan Azərbaycanın doqquz şəhərini və yüzlərlə kəndini yer üzündən silmiş, İslam dininə məxsus mədəni və tarixi irsimizi dağıtmış və təhqir etmişdir. 67 məsciddən 65-i dağıdılmış, qalanları isə inək və donuz saxlanılması üçün tövlə kimi istifadə olunmuşdur.

Ölkə başçısı 2020-ci ildə Azərbaycan BMT Nizamnaməsindən irəli gələn legitim özünümüdafiə hüququndan istifadə edərək Vətən müharibəsində Ermənistanı döyüş meydanında məğlubiyyətə uğratdığını və BMT Təhlükəsizlik Şurasının 1993-cü ildə qəbul etdiyi və 27 il ərzində kağız üzərində qalmış dörd qətnamənin icrasını özü təmin etdiyini bildirdi.

Bu il sentyabrın 19-20-də keçirilmiş birgünlük antiterror əməliyyatına da toxunan Prezident İlham Əliyev bildirib ki, əməliyyat nəticəsində Azərbaycan Qarabağdakı qanunsuz separatçı rejimin mövcudluğuna son qoydu və ərazi bütövlüyünü və suverenliyini güc yolu ilə, beynəlxalq hüquqa və BMT Nizamnaməsinə uyğun olaraq bərpa etdi.

Dövlətimizin başçısı çıxışının sonunda Azərbaycanın ECO-nun üzv dövlətləri ilə ikitərəfli və çoxtərəfli əməkdaşlığı daha da genişləndirməkdə qərarlı və təşkilatın növbəti Zirvə görüşünə ev sahibliyi etməyə hazır olduğunu vurğuladı.

Beləliklə, Prezident İlham Əliyevin İqtisadi Əməkdaşliq Təşkilatinin 16-ci Zirvə toplantisindakı çıxışı Azərbaycan həqiqətlərini, 30 il davam edən işğal dövrünün reallıqlarının toplantı iştirakçılarının diqqətinə çatdırmaqla yanaşı, eyni zamanda ölkəmizin iqtisadi uğurlarının təqdimatı oldu.

Sahib Şükürov

YAP Göyçay rayon təşkilatının sədri

Paylaş:

Baxılıb: 550 dəfə