Azərbaycan-Türkiyə münasibətləri tarixində önəmli hadisə

Bakı:

28 °C

45 %

2 m/s

Əlaqə

AZ RU EN

Ana səhifə / YAP xəbərləri / Azərbaycan-Türkiyə münasibətləri tarixində önəmli hadisə

Azərbaycan-Türkiyə münasibətləri tarixində önəmli hadisə

29.09.2023 [13:09]

Azərbaycan və Türkiyə arasında bir çox strateji əhəmiyyətli layihələr həyata keçirilməkdədir. Bu baxımdan TANAP layihəsi, İğdır-Naxçıvan qaz xətti və Qars-Naxçıvan dəmir yolunun inşasına dair Niyyət Protokolu tarixi hadisələrdir. Bu layihələr Orta Dəhlizin bir qolu kimi həm Azərbaycana, həm Türkiyəyə, həm də digər ölkələrə xidmət göstərəcəklər.

Türkiyə Respublikasının Prezidenti Rəcəb Tayyib Ərdoğanın Azərbaycana səfəri ilə əlaqədar bəyanatında Prezident cənab İlham Əliyev ölkələrimiz arasında mövcud olan yüksək səvviyyəli qardaşlıq əlaqələrinən bəhs edərkən logistik layihələrin potensialına da diqqət çəkdi. Ölkə başçısı vurğuladı ki, Bakı-Tbilisi-Qars dəmir yolunun potensialı 1 milyon tondan 5 milyon tona qədər artırılacaq. Azərbaycanı Naxçıvan və Türkiyə ilə birləşdirən dəmir yolunun inşası da uğurla gedir. Azərbaycan ərazisində işlər böyük ehtimalla gələn ilin sonunda başa çatmalıdır. Ümumilikdə müştərək maraqların məzmunu ondan ibarətdir ki, bölgədə sülh, əmin-amanlıq olsun, müharibələr olmasın, ölkələrin ərazi bütövlüyü təmin edilsin. Bu əsasda Şuşa Bəyannaməsi də çox mühüm əhəmiyyətə malikdir. Şuşa şəhərində imzalanmış müttəfiqlik bəyannaməsi Azərbaycan-Türkiyə münasibətlərini yeni müstəviyə qaldırdı. Bu gün bu əlaqələr ən yüksək zirvədədir və ölkələrimiz bütün istiqamətlər üzrə əlaqələrin çox fəal dövrünü yaşayır.

Ölkələrimiz arasında iqtisadi əməkdaşlığın dinamikası da deyilənləri sübut edir. Bütün istiqamətlər üzrə, o cümlədən ticarət dövriyyəsinin artırılması istiqamətində önəmli addımlar atılmışdır. Prezident cənab İlham Əliyev bəyanatında bildirdi ki, ölkələrimizin ticarət dövriyyəsi keçən il 6 milyard dollardan çox olub. Ancaq bu ilin yeddi ayında 40 faiz daha artmışdır və daha da artacaq. Preferensial ticarət anlaşması da imzalanmışdır və o siyahıda olan məhsulların sayı da artır.

Türkiyə Respublikasının Prezidenti Rəcəb Tayyib Ərdoğanın sentyabrın 25-də Azərbaycana səfəri zamanı İğdır-Naxçıvan qaz kəmərinin təməlinin qoyuldu və müxtəlif sənədlər imzalandı. Belə ki, imzalanan “Azərbaycan Respublikası ilə Türkiyə Respublikası arasında Qars-Naxçıvan dəmir yolu layihəsinə dair Niyyət Protokolu”, “Azərbaycan Respublikası Hökuməti ilə Türkiyə Respublikası Hökuməti arasında Türkiyə Respublikasının Kahramanmaraş vilayətində yaşayış binaları, ibtidai məktəb, uşaq bağçası və mədəniyyət mərkəzinin tikilməsi haqqında Əməkdaşlıq Sazişi”, “Azərbaycan Respublikasında və Türkiyə Respublikasında bərpa olunan enerji mənbələrindən istehsal olunan elektrik enerjisinin ötürülməsi sahəsində Azərbaycan Respublikasının Energetika Nazirliyi və Türkiyə Respublikasının Energetika və Təbii Sərvətlər Nazirliyi arasında əməkdaşlığa dair Anlaşma Memorandumu” kimi sənədlər ölkələrimiz arasında əlaqələrin daha da inkişafına töhfə verəcək.

Səfəri zamanı qardaş ölkənin Prezidenti Rəcəb Tayyib Ərdoğan da önəmli mesajlar verdi. Türkiyə-Azərbaycan əlaqələri dünyada tayı-bərabəri olmayan müstəsna səviyyədədir, deyə qeyd edən qardaş ölkənin başçısı Şuşa Bəyannaməsini əlaqələrimizi müttəfiqlik səviyyəsinə yüksəldən bir dönüş nöqtəsi adlandırdı.

Əlişah Rəcəbov

YAP Ağdaş rayon təşkilatının sədri

Paylaş:

Baxılıb: 549 dəfə