Azərbaycan dövləti və xalqı var olduqca Heydər Əliyevin ideyaları da var olacaq

Bakı:

29 °C

54 %

2 m/s

Əlaqə

AZ RU EN

Ana səhifə / YAP xəbərləri / Azərbaycan dövləti və xalqı var olduqca Heydər Əliyevin ideyaları da var olacaq

Azərbaycan dövləti və xalqı var olduqca Heydər Əliyevin ideyaları da var olacaq

23.06.2023 [11:54]

“1993-cü ilin 15 iyun tarixində ulu öndər Heydər Əliyev xalqın təkidli tələbi ilə Azərbaycan Respublikası Ali Sovetinin sədri seçildi. Dahi şəxsiyyət Heydər Əliyevin Azərbaycan Respublikası Ali Sovetinin sədri kimi fəaliyyətə başlaması müstəqillik illərimizin dönüş nöqtəsi kimi xarakterizə oluna bilər. Çünki 15 iyun tarixi - Milli Qurtuluş Günümüz dövlətimizin və xalqımızın düşdüyü xaotik və böhran vəziyyətindən qurtuluşunun, eyni zamanda millətimizin xilas yolunun başlanğıcı idi. Həmin tarixdən etibarən məhz ümummilli lider Heydər Əliyevin siyasi strategiyası və uzaqgörənliyi sayəsində dövlətçiliyimizin möhkəmləndirilməsi, müstəqilliyimizin qorunub-saxlanılması istiqamətində təxirəsalınmaz işlər görüldü”. Bu sözləri mətbuata açıqlamasında Yeni Azərbaycan Partiyası Binəqədi rayon təşkilatının sədri Vüsar İsmayılov bildirdi.

Vüsar İsmayılovun sözlərinə əsasən müasir və müstəqil dövlətimizin banisi olaraq Heydər Əliyevin Azərbaycan dövləti və xalqı qarşısındakı xidmətləri və fədakarlıqları mislsizdir. Bu xidmətlər nəticəsində ulu öndər Heydərə Əliyevə qarşı sonsuz xalq məhəbbəti və etimadı formalaşmış oldu. Dahi şəxsiyyət ona bəslənən bütün ümidləri tam doğrultdu və millətinin qəlbində özünə əbədi abidə ucaltdı. Məhz Heydər Əliyevin təşəbbüsü və rəhbərliyi altında müxtəlif sahələri əhatə edən mühüm islahatlar paketi həyata keçirildi. Dövlətçiliyimizin və xalqımızın hərtərəfli inkişafı, rifahı və firavanlığı üçün əvəzsiz xidmətlər göstərildi. Həmçinin ulu öndər Heydər Əliyev Ali Sovetin sədri kimi ilk gündən parlamentarizm ənənələrinə sadiq qalaraq aşkarlıq prinsipinə üstünlük verməsi mövcud olan bir sıra problemlərin daha operativ həllinə gətirib çıxardı. Artıq Azərbaycan inkişaf yolunda inamla və qətiyyətlə addımlamağa başladı.

Vüsar İsmayılov açıqlamasında tarixi arayış verərək vurğuladı ki, parlamentin 24 iyun 1993-cü il tarixli iclasında Prezident səlahiyyətlərinin Ali Sovetin sədri Heydər Əliyevə verilməsi barədə qərar qəbul etdi: “O zaman dövlət idarəetməsində heç bir təcrübəsi olmayan şəxslərin vəzifəyə gətirilməsi suverenliyimizə ciddi təhdid yaratmışdı və ölkəmizin üzləşdiyi uçurumlar getdikcə daha da dərinləşməyə başlamış, müstəqilliyimizi itirmək təhlükəsi ilə üz-üzə qalmışdıq. Ulu öndər ilk gündən etibarən hüquqi dövlət və vətəndaş cəmiyyəti quruculuğu məsələlərini daim diqqət mərkəzində saxladı və bu istiqamətdə davamlı islahatların reallaşdırılmasını təmin etdi. Dahi şəxsiyyətin idarəçilik təcrübəsi, qətiyyəti sayəsində qısa müddət ərzində mühüm dəyişikliklərə nail olundu. Azərbaycan güclənməyə, inkişaf etməyə, üzləşdiyi fəlakətlərin qarşısını almağa müvəffəq oldu”.

Rayon təşkilatının sədrinin sözlərinə əsasən Heydər Əliyevin ölkəmizdə prezident səlahiyyətlərinin icrasına başlamasını tariximizin ən parlaq səhifələrindən biri kimi qiymətləndirmək olar. Çünki bu tarix eyni zamanda ölkəmizdə demokratik dəyərlərin yaranmasına əsaslı səbəb oldu. Bu prinsiplərin reallaşması isə öz növbəsində ədalətin və humanizmin təşəkkülünə gətirib çıxardı. Artıq Azərbaycan hüquqi dövlət quruculuğu prosesində əsaslı tarixi başlanğıca qədəm qoydu. Bu, eyni zamanda milli iradənin və qətiyyətimizin təntənəsi idi. Tarix sübut etdi ki, xalqımız xilaskarını seçərkən tarixi qərarında yanılmayıb, öz müdrikliyini və uzaqgörənliyini sübut edib.

İndi qürurla və əminliklə deyə bilirik ki, nə qədər ki Azərbaycan dövləti və xalqı var, ümummilli lider Heydər Əliyevin ideyaları da var olacaq. Çünki ulu öndərin ideyaları və siyasət kursu bu gün dövlət başçısı, Ali Baş Komandan İlham Əliyev tərəfindən uğurla davam edir, ölkəmizi daha böyük zəfərlərə aparır.

Paylaş:

Baxılıb: 561 dəfə