Üçrəngli bayrağımız müstəqilliyimizin simvoludur

Bakı:

28 °C

49 %

7 m/s

Əlaqə

AZ RU EN

Ana səhifə / YAP xəbərləri / Üçrəngli bayrağımız müstəqilliyimizin simvoludur

Üçrəngli bayrağımız müstəqilliyimizin simvoludur

11.11.2022 [12:36]

Artıq iki ildir ki, bütün tarixi günləri, bayramları Zəfər ovqatında qeyd edirik. 9 Noyabr- Dövlət Bayrağı Günüdür. Prezident İlham Əliyevin 2009-cu il noyabrın 17-də imzaladığı Sərəncamla hər il noyabrın 9-u ölkədə Dövlət Bayrağı Günü kimi qeyd edilir. Sərəncamda da qeyd edildiyi kimi, Azərbaycan müstəqilliyini bərpa etdikdən sonra Dövlət bayrağı milli suverenliyin simvolu kimi ölkəmizin bütün vətəndaşları üçün müqəddəs dövlətçilik rəmzlərindən birinə çevrildi. Azərbaycan Xalq Cümhuriyyətinin yadigarı olan bu bayraq bizim azadlıq məfkurəsinə, milli-mənəvi dəyərlərə və ümumbəşəri ideallara sadiqliyimizi nümayiş etdirir.

Azərbaycanın Dövlət bayrağı 1918-ci il noyabrın 9-da Azərbaycan Xalq Cümhuriyyəti Hökumətinin iclasında qəbul edilmiş və 1920-ci ilin aprel ayınadək dövlət statusuna malik olmuşdur. Həmin bayraq 1990-cı il noyabrın 17-də Naxçıvan Muxtar Respublikası Ali Məclisinin sədri, ümummilli lider Heydər Əliyevin təşəbbüsü və rəhbərliyi ilə keçirilən sessiyada Naxçıvan Muxtar Respublikasının dövlət bayrağı olaraq təsdiq edilmişdir. 1991-ci il fevralın 5-də Azərbaycan Respublikasının Ali Soveti “Azərbaycan Respublikasının Dövlət bayrağı haqqında” Qanun qəbul edərək onu Dövlət Bayrağı elan etmişdir.

1991-ci il oktyabrın 18-də “Azərbaycan Respublikasının dövlət müstəqilliyi haqqında” Konstitusiya Aktı ilə Azərbaycan Respublikası Azərbaycan Xalq Cümhuriyyətinin varisi kimi onun dövlət rəmzlərini, o cümlədən Dövlət bayrağını bərpa etmişdir.

Bayrağımız milli qürurumuz, kimliyimizdir. Üçrəngli bayrağımız iki ildir işğadan azad edilmiş torpaqlarımızda dalğalanır. Dövlət başçısı İlham Əliyev bu torpaqlara ilk səfəri zamanı Azərbaycan Bayrağını ucaldaraq tarixi Zəfərimizi bir daha dünyaya təqdim etdi. Qələbə müjdəçisi olan bayrağımız Azərbaycanın hər bir uğurunun müşaiyətçisidir. Dövlət bayrağı respublikamızın dövlət qurumlarının və diplomatik nümayəndəliklərinin binaları üzərində ucalır, mühüm beynəlxalq tədbirlər, mötəbər mərasimlər və məclislərlə yanaşı, irimiqyaslı ictimai-siyasi toplantılarda, mədəni tədbirlərdə və idman yarışlarında qaldırılaraq milli birliyi təcəssüm etdirir. Prezident İlham Əliyevin “Azərbaycan Respublikasının paytaxtı Bakı şəhərində Dövlət bayrağı meydanının yaradılması haqqında” 2007-ci il 17 noyabr tarixli Sərəncamı Dövlət bayrağının dövlət rəmzləri sırasında xüsusi yerini müəyyən edir.

Əvvəldə də qeyd etdiyimiz kimi, Azərbaycanın Dövlət bayrağının ilk dəfə rəsmi surətdə 1918-ci il noyabrın 9-da qəbul edilməsini nəzərə alaraq, Azərbaycan Respublikasının dövlət rəmzlərinə hörmət və ehtiramı təmin etmək məqsədi ilə hər il noyabr ayının 9-u Dövlət Bayrağı Günü kimi qeyd edilir. Dövlət bayrağındakı üç rəngin ifadə etdiyi və XX əsrin əvvəllərindəki milli istiqlal ideologiyamızın üç təməl prinsipini təşkil edən “Türkçülük, müasirlik və islamçılıq” düsturunun müəllifi görkəmli Azərbaycan mütəfəkkiri Əli Bəy Hüseynzadədir. Azərbaycan Xalq Cümhuriyyətinin yadigarı olan bu bayraq bizim azadlıq məfkurəsinə, milli-mənəvi dəyərlərə və ümumbəşəri ideallara sadiqliyimizi nümayiş etdirir.

Bayraq millətimizin, dövlətimizin şərəf və ləyaqətinin ifadəsidir. Azərbaycan xalqının milli düşüncəsində bayrağa xüsusi münasibət tarix boyu özünü qabarıq göstərib, bayraq xalqımızın milli mövcudluq nişanəsi sayılıb. Bu gün hər bir azərbaycanlı Dövlət Bayrağına böyük hörmət və ehtiramla yanaşır.

44 günlük İkinci Qarabağ müharibəsinin hər gününü tariximizə Zəfər səhifəsi kimi yazan rəşadətli ordumuzun qəhrəmanlığının, şücaətinin bələdçisi üçrəngli bayrağımız oldu. Paytaxt və bölgələrdə küçə və meydanları bayrağımız bəzədi. Harada yaşamasından asılı olmayaraq hər bir azərbaycanlı sevincini paylaşmaq üçün küçələrə əlində Azərbaycan Bayrağı ilə çıxdı. O vaxtdan iki il keçməsinə baxmayaraq həmin günləri böyük qürur hissi ilə xatırlayırıq.

İki bundan öncə Dövlət Bayrağı Günü ərəfəsində ən böyük müjdəni dövlət başçısı İlham Əliyev Azərbaycan xalqına çatdırdı. 2020-ci il 8 noyabr tarixində Şuşamız işğaldan azad edildi, Bayrağımız Azərbaycanın döyünən ürəyində ucaldıldı.

Zəfər ruhlu Dövlət Bayrağı Günün mübarək, Azərbaycan xalqı! Qarşıdakı illərdə daha möhtəşəm uğurlarımıza şahidlik edəcək bayrağımız hər birimizin canı, ürəyi, dünyada kimliyimizin təqdimatıdır.

Etibar Hacıyev

YAP Ağstafa rayon təşkilatının sədri

Paylaş:

Baxılıb: 723 dəfə