Təyyibə Hüseynova: Əldə olunmuş nəticələrdə koronavirusla mübarizədə əsl fədakarlıq nümayiş etdirən həkimlərimizin çox böyük əməyi var

Bakı:

20 °C

52 %

3 m/s

AZ RU EN

Ana səhifə / YAP xəbərləri / Təyyibə Hüseynova: Əldə olunmuş nəticələrdə koronavirusla mübarizədə əsl fədakarlıq nümayiş etdirən həkimlərimizin çox böyük əməyi var

Təyyibə Hüseynova: Əldə olunmuş nəticələrdə koronavirusla mübarizədə əsl fədakarlıq nümayiş etdirən həkimlərimizin çox böyük əməyi var

14.08.2020 [11:42]

“Dövlətimizin pandemiya ilə mübarizə sahəsində həyata keçirdiyi sistemli tədbirlər öz müsbət nəticəsini verir. Elə Prezident İlham Əliyevin avqustun 6-da ölkəmizdə koronavirus pandemiyası ilə mübarizə sahəsində görülən tədbirlər və sosial-iqtisadi vəziyyətlə bağlı videoformatda keçirilən müşavirədəki çıxışında səsləndirilən fikirlər də bunu bir daha təsdiqləyir”.
Bunu Yeni Azərbaycan Partiyası (YAP) Abşeron rayon təşkilatının Qadınlar Şurasının sədri Təyyibə Hüseynova bildirib.
Onun sözlərinə görə, ölkəmizdə yeni növ koronavirus (COVİD-19) infeksiyasının qeydə alındığı ilk gündən atılan addımlar, Prezident İlham Əliyevin və Birinci vitse-prezident Mehriban xanım Əliyevanın rəhbərliyi ilə həyata keçirilən tədbirlər ciddi nəticələr verməkdədir: “Məhz həyata keçirilən bütün bu tədbirlər nəticəsində ölkəmizdə pandemiya ilə bağlı vəziyyət hazırda tam nəzarət altındadır. Yəni sevindirici haldır ki, koronavirusa qarşı mübarizə tədbirləri səmərə verir və artıq son günlər müsbət dinamika müşahidə olunur”.
Təyyibə Hüseynova onu da bildirib ki, əldə olunmuş nəticələrdə koronavirusla mübarizədə əsl fədakarlıq nümayiş etdirən həkimlərimizin çox böyük əməyi vardır: “Prezident İlham Əliyev də öz çıxışında qeyd etdiyi kimi, məhz həkimlərin yorulmaz fəaliyyəti nəticəsində Azərbaycanda bu xəstəlikdən ölənlərin sayı aşağı səviyyədədir. Digər tərəfdən isə, bu qorxunc xəstəliklə effektiv mübarizə apara bilmək üçün həkimlərimizin də müvafiq şəraitə, tələb olunan preparat və avadanlıqlara olan ehtiyacları yenə də dövlətimiz tərəfindən təmin edilib”.
“Ümumiyyətlə, koronavirus pandemiyasının qarşısının alınması, onun genişlənməsinə imkan verilməməsi istiqamətində dövlətimizin gördüyü işlər, atdığı addımlar hər bir dövlət üçün nümunə ola bilər. Yeri gəlmişkən, pandemiyanın iqtisadiyyata böyük zərbələr vurmasına rəğmən, Azərbaycan dövlətinin əsas hədəfi Azərbaycan vətəndaşları, onların sağlamlığı, təhlükəsizliyi, bu bəladan az maddi və mənəvi itkilərlə çıxması olub və bunlara da nail olunub”, - deyə YAP Abşeron rayon Qadınlar Şurasının sədri vurğulayıb.
Onun sözlərinə görə, hökumət tərəfindən həyata keçirilən tədbirlərlə yanaşı, pandemiya şəraitinə uyğun zəruri qanunların qəbul olunması istiqamətində də mühüm addımlar atılıb. Belə ki, bununla bağlı Milli Məclis də uğurlu fəaliyyət göstərib. Cari ilin dövlət büdcəsinin dürüstləşdirilməsinə dair, habelə dövlət büdcəsinə dəyişikliklərlə bağlı qəbul olunan qanun layihəsində əsasən pandemiyadan irəli gələn çağırışlar rəhbər tutulub və dövlət büdcəsinin xərcləri artırılıb.

Paylaş:

Baxılıb: 540 dəfə