Yeni Azərbaycan Partiyası Xızı rayon təşkilatının yaradılmasının 17-ci ildönümü qeyd olunub

Bakı:

28 °C

49 %

6 m/s

AZ RU EN

Ana səhifə / YAP xəbərləri / Yeni Azərbaycan Partiyası Xızı rayon təşkilatının yaradılmasının 17-ci ildönümü qeyd olunub

Yeni Azərbaycan Partiyası Xızı rayon təşkilatının yaradılmasının 17-ci ildönümü qeyd olunub

27.02.2010 [21:40]

Yeni Azərbaycan Partiyası (YAP) Xızı rayon təşkilatının yaradılmasının 17-ci ildönümü qeyd olunub. Bu münasibətlə keçirilən tədbirdə çıxış edən YAP Xızı rayon təşkilatının sədri Fərrux Haqverdiyev ilk olaraq, Azərbaycanda mövcud olan siyasi, iqtisadi durum haqqında məlumat verib. Onun sözlərinə görə, bu gün ölkəmizdə hüquqi, dünyəvi, demokratik prinsiplərə əsaslanan dövlət yaradılıb. Natiq Azərbaycanın demokratik inkişafında Yeni Azərbaycan Partiyasının da müstəsna rol oynadığını söyləyib: “Partiyamızın Sədri, Prezident İlham Əliyevin həyata keçirdiyi siyasət nəticəsində bu gün ölkəmiz sürətlə inkişaf edib. Bu inkişafda müstəsna rol oynayan partiyamız ölkəmizin inkişafına paralel olaraq inkişaf edib, gücünə güc qatıb. Təsadüfi deyil ki, Yeni Azərbaycan Partiyası bu gün nəinki ölkəmizin, eləcə də, Cənubi Qafqaz regionunun ən güclü siyasi qüvvəsinə çevrilib”.
F.Haqverdiyev rayon təşkilatının yaranması və keçdiyi yoldan da danışıb. Onun sözlərinə görə, Yeni Azərbaycan Partiyası Xızı rayon təşkilatı 1993-cü ilin fevral ayının 26-da 21 nəfərin iştirakı təsis edilib: “Təşkilat rayonun ictimai-siyasi həyatında həmişə yaxından iştirak edib. Geridə qoyduğumuz 17 il ərzində rayon təşkilatının formalaşmasında, onun strukturunun təkmilləşdirilməsində və möhkəmləndirilməsində İdarə Heyəti və ilk partiya təşkilatları tərəfindən xeyli işlər görülüb. Partiya üzvlərinin çevik fəaliyyəti sayəsində rayon təşkilatı əsas aparıcı qüvvəyə çevrilib. Xızı rayon təşkilatı ötən 17 ildə respublikamızda keçirilən 4 prezident, 3 parlament, 2 ümumxalq səsverməsində (referendum), 3 bələdiyyə seçkilərində öz mübarizliyini, təşkilatçılq məharətini, insanlar arasında olan nüfuz və hörmətini nümayiş etdirib. Dövlətçiliyimizin möhkəmlənməsi, demokratiyanın bərqərar olunması, partiyanın irəli sürdüyü prinsiplərin həyata keçirilməsi naminə bütün imkanlardan bacarıqla istifadə edilib. Hazırda YAP Xızı rayon təşkilatı 1629 nəfər üzvü 41 ilk partiya təşkilatında birləşdirir. YAP üzvlərinin 338 nəfəri ziyalılar, qalan hissəsi isə digər sahələrdə çalışanlar təşkil edir. Rayon təşkilatı üzvlərinin 706 nəfəri qadınlar, 736 nəfəri isə gənclərdir. Son 3 ildə partiya sıralarına qəbul olunanların sayı 591 nəfər, 2009-cu ildə isə 203 nəfər, o cümlədən, 126 nəfəri qadınlar, 112 nəfəri isə gənclər olub”.
Sonra çıxış edən YAP Xızı rayon təşkilatı Qadınlar Şurasının sədri Svetlana Rüstəmova da partiyanın keçdiyi şərəfli yola nəzər salaraq qeyd edib ki, bu gün partiyanın rayon təşkilatı öz işlərini günün tələbləri səviyyəsində qurur: “Həmişə olduğu kimi, yenə də partiyamızın sıraları genişlənir və bu istiqamətdə aparılan işlərdə qadınlarımız həmişə irəli çəkiliblər. ötən il partiya sıralarına qəbul olunan 203 nəfərdən 126 nəfərini qadınlar təşkil edir. Eyni zamanda, biz qadınlar da həmişə fəal olmağa çalışırıq və dövlətçiliyimiz üçün görülən işlərə töhfə vermək əzmindəyik. ölkəmizdə keçirilən prezident, referendum və bələdiyyə seçkilərində qadınlarımız var qüvvəsi ilə çalışaraq partiya tapşırıqlarını layiqincə yerinə yetirib”.
YAP Siyasi Şurasının üzvü, Xızı rayon İcra Hakimiyyətinin başçısı Vaqif Abdullayev isə ölkəmizdə və Xızı rayonunda aparılan tikinti-quruculuq işlərindən danışıb. Natiq, həmçinin, partiyanın rayon təşkilatının ötən illərdə gördüyü işlərdən söz açaraq bildirib ki, rayon təşkilatı bütün tədbirlərdə yaxından iştirak edib. Ona görə də, Yeni Azərbaycan Partiyası Xızı rayon təşkilatının fəaliyyətini qənaətbəxş hesab etmək olar.
Sonra çıxış edən YAP Xızı rayon təşkilatı Gənclər Birliyinin sədr əvəzi Pərviz Zeynalov rayon gənclərinin partiya ətrafında sıx birliyindən söz açıb. Sonda partiya sıralarına yeni qəbul olunmuş üzvlərə partiya üzvlük vəsiqələri və partiya fəallarına fəxri fərmanlar verilib, Azərbaycan Respublikasının Prezidenti, Yeni Azərbaycan Partiyasının Sədri cənab İlham Əliyevə müraciət qəbul olunub.

Paylaş:

Baxılıb: 1467 dəfə