YAP Nərimanov rayon təşkilatında talassemiyalı uşaqlara yardım məqsədilə “Yaşayaq və Yaşadaq” adlı qanvermə aksiyası keçirilib

Bakı:

33 °C

32 %

4 m/s

AZ RU EN

Ana səhifə / YAP xəbərləri / YAP Nərimanov rayon təşkilatında talassemiyalı uşaqlara yardım məqsədilə “Yaşayaq və Yaşadaq” adlı qanvermə aksiyası keçirilib

YAP Nərimanov rayon təşkilatında talassemiyalı uşaqlara yardım məqsədilə “Yaşayaq və Yaşadaq” adlı qanvermə aksiyası keçirilib

07.05.2014 [09:59]

Dünən Ümummilli lider Heydər Əliyevin anadan olmasının 91-ci ildönümü münasibətilə Nərimanov rayon İcra Hakimiyyəti və Yeni Azərbaycan Partiyası (YAP) Nərimanov rayon təşkilatının birgə təşkilatçılığı ilə talassemiyalı uşaqlara yardım məqsədilə “Yaşayaq və Yaşadaq” adlı qanvermə aksiyası keçirilib. Aksiya YAP Nərimanov rayon təşkilatının qərargahında təşkil edilib.
Qanvermə aksiyasında Nərimanov rayon İcra Hakimiyyətinin başçısı, YAP Siyasi Şurasının üzvü Abdin Fərzəliyev, YAP Nərimanov rayon təşkilatının sədri Təmraz Tağıyev, rayon ictimaiyyətinin nümayəndələri və YAP fəalları iştirak ediblər. Səhiyyə Nazirliyinin B.Eyvazov adına Elmi- Tədqiqat Hematologiya və Transfuziologiya İnstitutunun Mərkəzi Qan Bankının həkim briqadası aksiya iştirakçılarını müayinə edərək qan alınmasını təmin ediblər.
YAP Nərimanov rayon təşkilatının sədri Təmraz Tağıyev belə bir aksiyanın keçirilməsinin artıq ənənə halı aldığını bildirib. Onun sözlərinə görə, rayon təşkilatı hər il qanvermə aksiyası keçirir: “İndiki aksiyada 600 nəfərdən çox insan iştirak edir. Onlar könüllü olaraq bizim çağırışımıza səs veriblər. Bu, onu göstərir ki, talassemiyalı uşaqlara kömək etmək çox humanist və xeyirxah addımdır. Bilirsiniz ki, respublikanın Talassemiya Mərkəzi Nərimanov rayonunda yerləşir. Burada toplanan qan həmin mərkəzə veriləcək ki, bu xəstəlikdən əziyyət çəkən uşaqlara dəstək olsun. Bu tədbirlər davamlı olacaq. Fikrimcə, bu aksiya irsi qan xəstəliklərindən əziyyət çəkən insanlara, o cümlədən, uşaqlara böyük yardım edəcək”.
Ulu öndər Heydər Əliyevin anadan olmasının 91-ci ildönümü münasibətilə Nərimanov rayonunda silsilə tədbirlər keçirildiyini deyən T.Tağıyevin sözlərinə görə, bu aksiya həmin tədbirlərin tərkib hissəsidir.
YAP Nərimanov rayon təşkilatı Qadınlar Şurasının sədri Məhəbbət İbrahimova da deyib ki, qanvermə aksiyasını keçirməkdə məqsəd ölkəmizdə irsi qan xəstəliklərindən əziyyət çəkən uşaqlara qan yardımı etməkdən ibarətdir: “Bu cür aksiyaların keçirilməsi qana ehtiyacı olanlara böyük köməkdir”.
YAP Nərimanov rayon təşkilatı Gənclər Birliyinin sədri Yusif Babanlı isə bu aksiyada gənclərin fəallığını xüsusi vurğulayıb: “Mən öncə humanitar aksiyanın təşkilatçılarına təşəkkür edirəm ki, belə bir xeyirxah tədbir təşkil ediblər. Ümumiyyətlə, bu cür tədbirlər partiyamız, eləcə də, rayonumuz tərəfindən mütəmadi olaraq həyata keçirilir və gördüyünüz kimi bu xeyirxah aksiyaya qoşulan gənclərimizin sayı da ötən dəfəkindən daha da çoxdur. İştirakçıların təxminən yarısı gənclərdən ibarətdir”.
Nardar BAYRAMLI

Paylaş:

Baxılıb: 1144 dəfə