Azərbaycanın gücü, qətiyyəti və sülh gündəliyi beynəlxalq tribunadan

Bakı:

21 °C

78 %

10 m/s

Əlaqə

AZ RU EN

Ana səhifə / YAP xəbərləri / Azərbaycanın gücü, qətiyyəti və sülh gündəliyi beynəlxalq tribunadan

Azərbaycanın gücü, qətiyyəti və sülh gündəliyi beynəlxalq tribunadan

20.10.2026 [09:50]

Azərbaycan Respublikasının Prezidenti İlham Əliyevin oktyabrın 15-də Bakıda Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) VII Zirvə Görüşündə səsləndirdiyi fikirlər ölkəmizin beynəlxalq mövqeyini, müstəqil xarici siyasətini və regionda dayanıqlı sülhün təmin olunmasına yönəlmiş prinsipial yanaşmasını bir daha nümayiş etdirdi. Dövlət başçısının çıxışı Azərbaycanın keçdiyi tarixi yolu, beynəlxalq hüquqa əsaslanan mövqeyini və qlobal əməkdaşlığın inkişafına verdiyi töhfələri əhatə edən mühüm siyasi mesajlarla yadda qaldı.

Azərbaycan coğrafi mövqeyinə görə Asiya ilə Avropanı birləşdirən strateji mərkəz olmaqla yanaşı, siyasi, iqtisadi, nəqliyyat və enerji sahələrində geniş əməkdaşlıq imkanlarına malikdir. Prezident İlham Əliyevin vurğuladığı kimi, ölkəmiz müxtəlif dövlətlərlə ikitərəfli və çoxtərəfli münasibətləri inkişaf etdirərək regional təhlükəsizliyin möhkəmləndirilməsinə töhfə verir. Azərbaycanın xarici siyasətinin əsasını dövlətlərin suverenliyinə, ərazi bütövlüyünə, bərabərhüquqluluğa və daxili işlərə qarışmamaq prinsiplərinə hörmət təşkil edir.

Dövlət başçısı çıxışında Azərbaycanın müstəqilliyini bərpa etdiyi ilk illərdən üzləşdiyi ədalətsizliklərə, Ermənistanın ölkəmizə qarşı hərbi təcavüzünə və beynəlxalq təşkilatların bu məsələlərə münasibətdə nümayiş etdirdiyi ikili standartlara diqqət çəkdi. Ermənistan tərəfindən Azərbaycan ərazilərinin təxminən 20 faizinin işğal edilməsi, bir milyona yaxın azərbaycanlının doğma yurdlarından qovulması və etnik təmizləməyə məruz qalması xalqımızın üzləşdiyi ağır faciələrin miqyasını göstərir. BMT Təhlükəsizlik Şurasının 1993-cü ildə qəbul etdiyi dörd qətnamənin uzun illər icrasız qalması, ATƏT-in Minsk qrupunun isə münaqişənin həlli istiqamətində nəticə əldə edə bilməməsi beynəlxalq hüququn tətbiqindəki ciddi problemləri üzə çıxardı.

Azərbaycanın sülh və ədalətə əsaslanan mövqeyinə baxmayaraq, Ermənistanın təxribatçı siyasəti və beynəlxalq vasitəçilik mexanizmlərinin nəticəsiz fəaliyyəti münaqişənin uzanmasına səbəb oldu. 2020-ci ildə başlanan Vətən müharibəsi Azərbaycanın öz ərazi bütövlüyünü bərpa etmək əzmini və xalqımızın birliyini bütün dünyaya nümayiş etdirdi. Cəmi 44 gün davam edən müharibə nəticəsində torpaqlarımızın böyük hissəsi işğaldan azad edildi, Ermənistan isə 10 noyabr 2020-ci il tarixli üçtərəfli bəyanatla hərbi əməliyyatların dayandırılmasına razılıq verdi.

Bununla belə, Azərbaycanın suverenliyinin tam bərpası istiqamətində səyləri davam edirdi. 2023-cü ilin sentyabrında həyata keçirilən antiterror tədbirləri nəticəsində ölkəmizin bütün ərazilərində konstitusiya quruluşu bərpa olundu, separatizmə son qoyuldu. Prezident İlham Əliyevin çıxışında bu tarixi nəticələr Azərbaycanın beynəlxalq hüquqa əsaslanan haqqının və qətiyyətli dövlət siyasətinin təntənəsi kimi təqdim edildi. Uzun illər ölkəmizi təhdid edənlərin bu gün Azərbaycan qanunları qarşısında cavab verməsi dövlətimizin hüquqi mövqeyinin və suverenliyinin real ifadəsidir.

Dövlət başçısının çıxışında diqqət çəkən mühüm məqamlardan biri də müharibədən sonra Azərbaycanın nümayiş etdirdiyi humanist mövqe idi. Azərbaycan qalib dövlət olaraq keçmişin ağır sınaqlarına baxmayaraq, intiqamçılıq yolunu seçmədi, Ermənistana sülh təklif etdi. Bu yanaşma xalqımızın mənəvi dəyərlərinə, humanizm prinsiplərinə və gələcəyə yönəlmiş siyasi iradəsinə əsaslanır. Hazırda əldə olunmuş sülhün qorunması və möhkəmləndirilməsi regionun gələcək inkişafı üçün mühüm əhəmiyyət daşıyır. Eyni zamanda, beynəlxalq qərarların icrasını təmin edən təsirli mexanizmlərin yaradılması yeni münaqişələrin qarşısının alınması baxımından vacib şərtdir.

Azərbaycanın AQEM-ə sədrliyi dövründə gördüyü işlər də Prezidentin çıxışında xüsusi yer tutdu. Ölkəmiz ikiillik sədrliyi müddətində təşkilatın institusional və hüquqi imkanlarının gücləndirilməsinə, üzv dövlətlər arasında dialoqun genişləndirilməsinə və qarşılıqlı etimadın artırılmasına mühüm töhfələr verdi. Nəqliyyat, bağlantılar, rəqəmsallaşma, ətraf mühitin mühafizəsi, turizm, təhsil və elm sahələrində əməkdaşlığın təşviqi Azərbaycanın beynəlxalq təşəbbüslərinin əhatə dairəsini daha da genişləndirdi.

Prezident İlham Əliyevin AQEM-in VII Zirvə Görüşündəki çıxışı bir daha göstərdi ki, Azərbaycan beynəlxalq münasibətlərdə ədalətin, suverenliyin və qarşılıqlı hörmətin müdafiəçisi kimi çıxış edir. Ölkəmizin tarixi Qələbəsi, ərazi bütövlüyünün və suverenliyinin bərpası, eləcə də sülh təşəbbüsləri Azərbaycanın güclü dövlət kimi mövqeyini möhkəmləndirib. Bu gün Azərbaycan yalnız öz milli maraqlarını qətiyyətlə qoruyan dövlət deyil, həm də Avrasiya məkanında əməkdaşlığın, təhlükəsizliyin və davamlı inkişafın gücləndirilməsinə töhfə verən etibarlı tərəfdaşdır.

Lalə Mədətova

YAP Kəngərli rayon təşkilatının əməkdaşı

Paylaş:

Baxılıb: 37 dəfə

Xəbər lenti

Hamısına bax