YAP Gənclər Birliyi 8 mart-Beynəlxalq Qadınlar Günü münasibəti ilə tədbir keçirib

Bakı:

26 °C

73 %

4 m/s

Əlaqə

AZ RU EN

Ana səhifə / YAP xəbərləri / YAP Gənclər Birliyi 8 mart-Beynəlxalq Qadınlar Günü münasibəti ilə tədbir keçirib

YAP Gənclər Birliyi 8 mart-Beynəlxalq Qadınlar Günü münasibəti ilə tədbir keçirib

08.03.2014 [09:45]

Martın 7-də Yeni Azərbaycan Partiyası (YAP) Gənclər Birliyinin ofisində 8 mart-Beynəlxalq Qadınlar Günü münasibəti ilə tədbir keçirilib.
Tədbirdə çıxış edən YAP Gənclər Birliyinin sədri, partiyanın Siyasi Şurasının üzvü Seymur Orucov dünyanın əksər ölkələrində, eləcə də, Azərbaycanda qeyd olunan Beynəlxalq Qadınlar Gününün tarixi barədə məlumat verib. Bildirib ki, qadınların kişilərlə bərabərhüquqlu olmaq uğrunda apardığı mübarizənin başlanğıcı 8 mart 1857-ci ildə ABŞ-ın Nyu-York şəhərində geyim sektorunda çalışan yüzlərlə qadının aşağı maaş, uzun iş saatları, eyni zamanda, ağır iş şəraitinə etiraz olaraq tətil etməsi ilə qoyulub: “Nümayişdə ilk dəfə olaraq dekret icazəsi istəyən qadınların şüarı “Çörək və Gül” idi. Çörək həyat eşqini, qarın toxluğunu, gül isə daha rifah həyat tərzini ifadə edirdi. Bu hadisələrdən 52 il sonra Kopenhagen şəhərində keçirilən Qadın Sosialist İnternasyonalının qurultayında bir alman sosialist qadını, Amerikada 8 martda yandırılaraq öldürülən 129 qadın işçinin xatirəsinə hər il 8 martı Dünya Qadınlar Günü olmasını təklif edib və bu təklif qəbul edilib”.
Qadınlarımızın Azərbaycanın ictimai-siyasi həyatında rolunu yüksək dəyərləndirən YAP Gənclər Birliyinin sədri ölkəmizin inkişafında, müxtəlif sferalarda nailiyyətlərin qazanılmasında onların xüsusi rolunun olduğunu vurğulayıb. Bildirib ki, Ümummilli lider Heydər Əliyevin Azərbaycanda qadın siyasətinin həyata keçirilməsi barədə müvafiq sərəncamları ölkəmizdə ictimai həyatın müxtəlif sahələrində qadınlara kişilərlə bərabər işləmək üçün yeni imkanlar yaradıb: “Bu gün ölkəmizdə qadınlar istər idarəetmə, istərsə də qərar qəbuletmədə təmsil olunurlar. Dövlət qulluğunda çalışanlar arasında qadınların xüsusi çəkisi artaraq 28 faizə çatıb. Milli Məclisdə qadın deputatların sayı artır, hazırda ölkə parlamentində qadınların xüsusi çəkisi 16 faizdir. Artıq respublikanın əksər rayonlarının icra başçılarının müavinləri qadınlardır. Yeni Azərbaycan Partiyasının siyasətində də qadınlara önəm verilir”
Seymur Orucov tədbirdə iştirak edən xanımların timsalında bütün qadınları 8 Mart bayramı münasibətilə təbrik edib, onlara cansağlığı, ailə səadəti və işlərində müvəffəqiyyətlər arzulayıb.
Bayram tədbirində iştirak edən xanımlara müxtəlif hədiyyələr təqdim olunub.
Sonda 8 mart-Beynəlxalq Qadınlar Gününə həsr edilmiş videoçarx nümayiş olunub.
SEVİNC

Paylaş:

Baxılıb: 1301 dəfə