BAKI VƏ DAŞKƏND ARASINDA YENİ TARİXİ DÖVR

Bakı:

24 °C

69 %

10 m/s

Əlaqə

AZ RU EN

Ana səhifə / YAP xəbərləri / BAKI VƏ DAŞKƏND ARASINDA YENİ TARİXİ DÖVR

BAKI VƏ DAŞKƏND ARASINDA YENİ TARİXİ DÖVR

26.08.2026 [13:30]

Böyük İpək Yolunun döyünən ürəyi sayılan Mərkəzi Asiya ilə Qafqazın qapısı olan Azərbaycan arasında körpülər heç vaxt indiki qədər möhkəm, bu qədər canlı olmamışdı. Azərbaycan və Özbəkistan münasibətlərinə nəzər salanda insan sadəcə iki dövlətin diplomatik əlaqələrini görmür — burada minilliklərə söykənən ortaq dil, din, mədəniyyət, oxşar dəyərlər və sarsılmaz qardaşlıq ruhu var. Tarixin sınaqlarından keçərək bu günə çatan bu mənəvi bağlar iki ölkənin gələcəyə birgə addımlaması üçün ən möhkəm təməldir.

Bünövrəsi Ümummilli Lider Heydər Əliyev və Özbəkistanın birinci Prezidenti İslam Kərimov tərəfindən qoyulan bu diplomatik münasibətlər, bu gün Prezident İlham Əliyev və Prezident Şavkat Mirziyoyev tərəfindən strateji tərəfdaşlığın ən yüksek zirvəsinə — müttəfiqlik səviyyəsinə qaldırılıb. Xüsusilə son illərdə qarşılıqlı dövlət səfərlərinin intensivləşməsi, Ali Dövlətlərarası Şuranın yaradılması və imzalanan Tarixi Müttəfiqlik Münasibətləri haqqında Müqavilə bu birliyin təkcə kağız üzərində deyil, reallıqda nə qədər güclü olduğunu sübut edir.

Münasibətlərin iqtisadi tərəfi isə sözün əsl mənasında intibah dövrünü yaşayır. Ticarət dövriyyəsinin ardıcıl olaraq artması və yaxın gələcəkdə 1 milyard dollarlıq həddə çatdırılması hədəfi təsadüfi deyil. Avtomobil sənayesindən tutmuş tekstilə, energetikadan kənd təsərrüfatına və sənaye kooperasiyasına qədər yaradılan birgə müəssisələr iqtisadi inteqrasiyanın əyani göstəricisidir. Azərbaycan-Özbəkistan Birgə İnvestisiya Şirkətinin fəaliyyətə başlaması yeni layihələrin maliyyələşdirilməsinə və biznes subyektləri arasında əlaqələrin daha da sıxlaşmasına güclü təkan verir.

Eyni zamanda, nəqliyyat-logistika sahəsində atılan addımlar bütün regionun çəkisini dəyişir. Orta Dəhliz çərçivəsində nəqliyyat əlaqələrinin genişlənməsi, Bakı Beynəlxalq Dəniz Ticarət Limanı və Bakı-Tbilisi-Qars dəmir yolu xətti vasitəsilə yükdaşımaların həcminin artırılması göstərir ki, Bakı və Daşkənd Şərq-Qərb dəhlizində regionun nəqliyyat xəritəsini birgə cızır. Yaşıl enerji sahəsində — Mərkəzi Asiyadan Avropaya bərpa olunan enerjinin ötürülməsi üzrə üçtərəfli əməkdaşlıq da iki ölkənin qlobal enerji təhlükəsizliyindəki rolunu artırır.

Amma bu əlaqələrin ən kövrək, ən qürurverici məqamı mədəni və mənəvi töhfələrdə özünü göstərir. Özbəkistanın işğaldan azad edilmiş Füzuli şəhərində inşa etdirdiyi Mirzə Uluqbəy adına 1 nömrəli Tam Orta Məktəb qardaş köməyinin, səmimi dostluğun ən gözəl nümunəsidir. Qarabağ torpağında ucalan o məktəb binası özbək xalqının Azərbaycan xalqına olan sevgisinin, sarsılmaz dəstəyinin canlı abidəsidir. Daşkənddə Nizami Qəncəvi adına Dövlət Pedaqoji Universitetinin fəaliyyəti, Bakıda Əlişir Nəvai abidəsinin ucaldılması, Şuşa ilə Səmərqəndin, Xankəndi ilə digər şəhərlərin qardaşlaşması da bu mənəvi təməli daha da möhkəmləndirir.

Türk Dövlətləri Təşkilatı çərçivəsində vahid yumruq kimi çıxış edən Azərbaycan və Özbəkistan, əslində bütün Türk dünyasının gələcək inkişaf modelini nümayış etdirir. Beynəlxalq platformalarda bir-birinin haqlı mövqeyini qeyd-şərtsiz müdafiə edən iki ölkə eyni kökdən bəhrələnən, eyni məqsədə doğru addımlayan iki qardaş dövlətdir.

Zaman göstərir ki, liderlərin siyasi iradəsi və xalqların mənəvi birliyi olduğu müddətcə Bakı ilə Daşkənd arasındakı bu dostluq körpüsü əbədi olacaq, hər iki respublikaya yalnız sülh, tərəqqi və yeni zəfərlər gətirəcək.

Nurdən Cəfərova

Kükü kənd tam orta məktəbində müəllim, YAP fəalı

Paylaş:

Baxılıb: 194 dəfə