Azərbaycan–Özbəkistan: Böyük Gələcəyə Aparan Qardaşlıq Yolu

Bakı:

26 °C

69 %

12 m/s

Əlaqə

AZ RU EN

Ana səhifə / YAP xəbərləri / Azərbaycan–Özbəkistan: Böyük Gələcəyə Aparan Qardaşlıq Yolu

Azərbaycan–Özbəkistan: Böyük Gələcəyə Aparan Qardaşlıq Yolu

25.08.2026 [14:47]

Elnur Əsədov
YAP Kəngərli rayon təşkilatının əməkdaşı

Azərbaycan Prezidenti İlham Əliyevin 2026-cı il avqustun 23-də Özbəkistana
dövlət səfəri çərçivəsində Daşkənddə mətbuata verdiyi bəyanat
Azərbaycan–Özbəkistan münasibətlərinin bugünkü yüksək səviyyəsini və gələcək
inkişaf perspektivlərini bir daha nümayiş etdirdi. Dövlət başçısının səfəri zamanı
səsləndirdiyi fikirlərdən aydın görünür ki, iki qardaş ölkə arasında əlaqələr artıq
yalnız siyasi və diplomatik münasibətlərlə məhdudlaşmır, iqtisadiyyatın,
investisiyaların, nəqliyyatın, energetikanın, təhsilin, mədəniyyətin və digər
sahələrin əhatə etdiyi genişmiqyaslı strateji tərəfdaşlığa çevrilib.
Prezident İlham Əliyev Daşkəndin və bütövlükdə Özbəkistanın son illərdə əldə
etdiyi böyük inkişafı xüsusi qeyd edərək bildirdi ki, “Daşkənd və bütün Özbəkistan
yüksəliş dövrünü yaşayır”. Dövlət başçısı vurğuladı ki, Şavkat Miromonoviç
Özbəkistana rəhbərlik etməyə başlayanda vəziyyət tamamilə başqa cür idi. Bu
dəyişiklikləri Özbəkistan vətəndaşları çox yaxşı bilirlər və Azərbaycan da bu inkişaf
prosesini yaxından izləyir. Bu fikirlər Özbəkistanda həyata keçirilən islahatların,
iqtisadi inkişafın və genişmiqyaslı quruculuq işlərinin real nəticələrinə verilən
yüksək qiymətin ifadəsidir.
Bu gün Daşkənd müasir şəhərsalma, yeni infrastruktur və böyük investisiya
layihələri ilə regionun ən sürətlə inkişaf edən şəhərlərindən birinə çevrilməkdədir.
Özbəkistanın iqtisadi və sosial həyatında baş verən dəyişikliklər ölkənin gələcək
üçün böyük hədəflər müəyyənləşdirdiyini göstərir. Azərbaycan da bu inkişaf
prosesində Özbəkistanın ən yaxın və etibarlı tərəfdaşlarından biri kimi fəal iştirak
edir. Səfər çərçivəsində müxtəlif layihələrin açılışının keçirilməsi və yeni layihələrin
təməlinin qoyulması bunun bariz nümunəsidir.
Azərbaycan–Özbəkistan arasında iqtisadiyyatın bütün sahələrində əməkdaşlıq
uğurla davam edir. İki ölkə arasında ticarət dövriyyəsinin artırılması, qarşılıqlı
investisiyaların genişləndirilməsi və birgə müəssisələrin yaradılması istiqamətində
mühüm addımlar atılır. Prezident İlham Əliyevin qeyd etdiyi bir milyard dollarlıq
ticarət dövriyyəsi hədəfi də artıq uzaq və əlçatmaz məqsəd kimi deyil, yaxın illərdə
əldə olunacaq real nəticə kimi qiymətləndirilir. Bu yanaşma iki ölkənin iqtisadi
potensialına və qarşılıqlı əməkdaşlığın gələcəyinə olan inamın göstəricisidir.

Azərbaycan və Özbəkistanın iqtisadi potensiallarının bir-birini tamamlaması
əməkdaşlığın daha da genişləndirilməsi üçün böyük imkanlar yaradır. Sənaye,
kənd təsərrüfatı, energetika, nəqliyyat və logistika, turizm, bank sektoru, təhsil,
informasiya texnologiyaları və digər sahələrdə yeni layihələrin həyata keçirilməsi
qarşılıqlı ticarətin və investisiyaların artmasına mühüm töhfə verə bilər. Bu
baxımdan iki ölkə arasında münasibətlər yalnız əldə olunan nəticələrlə deyil,
qarşıda duran böyük imkanlarla da xarakterizə olunur.
Azərbaycan Prezidenti Mərkəzi Asiya və Azərbaycanın böyük potensiala, eyni
zamanda, bundan da böyük inkişaf imkanlarına malik vahid geosiyasi və
geoiqtisadi region olduğunu xüsusi vurğuladı. Bu fikir Azərbaycan–Özbəkistan
əməkdaşlığının regional əhəmiyyətini də ortaya qoyur. Azərbaycanın Avropa ilə
Mərkəzi Asiyanı birləşdirən mühüm nəqliyyat və logistika imkanları, Özbəkistanın
isə Mərkəzi Asiyanın mühüm iqtisadi mərkəzlərindən biri olması iki ölkənin
əməkdaşlığını daha geniş regional layihələr üçün əlverişli edir. Xəzər dənizi
üzərindən keçən nəqliyyat marşrutlarının inkişafı, ticarət əlaqələrinin
genişləndirilməsi və qarşılıqlı investisiyaların artırılması gələcəkdə Azərbaycanla
Mərkəzi Asiya ölkələri arasında iqtisadi inteqrasiyanı daha da gücləndirə bilər.
Azərbaycan–Özbəkistan münasibətlərinin əsas üstünlüklərindən biri də bu
əlaqələrin möhkəm mənəvi və tarixi təmələ malik olmasıdır. Azərbaycan və özbək
xalqları arasında əsrlər boyu formalaşmış mədəni və mənəvi yaxınlıq
dövlətlərarası münasibətlərin inkişafına da mühüm təsir göstərir. Prezident İlham
Əliyevin qeyd etdiyi kimi, ikitərəfli münasibətlər həm mənəvi, həm də maddi
təməl üzərində qurulub. Bu amillərin vəhdəti Azərbaycan və Özbəkistan arasındakı
tərəfdaşlığın davamlı və uzunmüddətli olmasına şərait yaradır.
Daşkənddə Azərbaycan və Özbəkistan Ali Dövlətlərarası Şuranın 3-cü iclasının
keçirilməsi də münasibətlərin institusional baxımdan möhkəmləndiyini göstərir.
Bu mexanizm iki ölkə arasında əldə olunan razılaşmaların sistemli şəkildə həyata
keçirilməsi, yeni əməkdaşlıq istiqamətlərinin müəyyənləşdirilməsi və mövcud
layihələrin daha səmərəli icrası baxımından mühüm əhəmiyyət daşıyır. Prezident
İlham Əliyevin sözləri ilə desək, irəliləmək üçün iki ölkənin çox dəqiq fəaliyyət
planı var və hər bir layihə konkret məzmunla zəngindir. Bu isə əməkdaşlığın yalnız
xoş niyyətlər üzərində deyil, konkret layihələr və nəticələr üzərində qurulduğunu
göstərir.
Səfər zamanı Azərbaycan və Özbəkistan prezidentlərinin qarşılıqlı təltif olunması
da xüsusi əhəmiyyət daşıyan hadisə oldu. Prezident Şavkat Mirziyoyev ali dərəcəli
“Dostluq” ordenini Azərbaycan Prezidenti İlham Əliyevə təqdim etdi. Prezident

İlham Əliyev isə “Heydər Əliyev” ordenini Özbəkistanın dövlət başçısı Şavkat
Mirziyoyevə təqdim etdi. Bu təltiflər iki dövlət başçısının Azərbaycan və
Özbəkistan xalqları arasında dostluq və qardaşlıq münasibətlərinin inkişafına
verdiyi töhfənin yüksək qiymətləndirilməsinin rəmzi ifadəsidir.
Ümumilikdə, Prezident İlham Əliyevin Özbəkistana dövlət səfəri
Azərbaycan–Özbəkistan münasibətlərinin yeni və daha yüksək inkişaf mərhələsinə
daxil olduğunu nümayiş etdirdi. Siyasi dialoqun yüksək səviyyəsi, qarşılıqlı etimad,
iqtisadi əməkdaşlığın genişlənməsi, yeni investisiya layihələri və regional
əməkdaşlıq imkanları iki ölkənin qarşısında böyük perspektivlər açır. Azərbaycan
və Özbəkistanın bir milyard dollarlıq ticarət dövriyyəsi hədəfinə doğru irəliləməsi,
iqtisadiyyatın müxtəlif sahələrində yeni layihələr həyata keçirməsi və Mərkəzi
Asiya ilə Cənubi Qafqaz arasında əlaqələrin gücləndirilməsi gələcəkdə daha böyük
nəticələrin əldə olunacağına əsas verir.
Bu gün Azərbaycan–Özbəkistan münasibətləri qarşılıqlı hörmət, etimad, qardaşlıq
və strateji maraqlar üzərində inkişaf edir. Daşkəndin və bütün Özbəkistanın
yüksəliş dövrünü yaşadığı bir zamanda Azərbaycan da bu prosesdə etibarlı
tərəfdaş kimi çıxış edir. İki ölkə arasında mövcud möhkəm siyasi iradə və böyük
iqtisadi potensial qarşıdakı illərdə əlaqələrin daha da dərinləşəcəyinə və
Azərbaycan–Özbəkistan tərəfdaşlığının bütövlükdə regionun inkişafına mühüm
töhfə verəcəyinə əminlik yaradır.